Koekedoor - Dinge begin kalmeer

Koekedoor Beoordeelaars

Hierdie is nou nie iets oor kos maak nie maar Man Kos hou van lekker TV en kosprogramme is baie aantreklik vir my. Koekedoor is mos Afrikaans en ek hou daarvan.

Tot op hede het ek myself weerhou om enige iets te sê oor Koekedoor. Ek het wel hier daar 'n paar opmerkings gelees en ek het ook 'n paar kwetsende brokkies gesien.

Miskien is dit die biker in my wat my goed geleer het dat jy nie jou bêk rek na die eerste draai in 'n bergpas nie ... nee jy bly stil en fokus want jy weet nie hoe lyk die volgende een nie.

Nou het ek episode 3 klaar gekyk en ek voel gemaklik om my ervaring te deel.

Mens kan duidelik sien dat die deelnemers en die beoordeelaars nou in die swing van die ding ingekom het en almal is meer gemaklik ... sommiges senuweeagtig gemaklik maar gemaklik. Die oordadige gegiggel is weg en die mense fokus ... niks soos 'n slagtery om die gekekkel hok te slaan nie

Ek het nog te min van die deelnemers gesien om regtig 'n gunsteling of twee uit te sonder maar wat wel duidelik is, is dat die ou girls nie die pyp gaan rook nie ... ek dink die fisiese eise van die kompetisie is te erg vir hulle.

Lyk my of die haan onder die henne sy man staan en sy teenwoordigheid goed laat voel. Die ou se hart is in die bakkery en ek kon vanaand sien sy siel gaan in daai Kenwood in ... keer op keer.
Dis seker nodig om waaghalsig te wees in die kompetisie maar as ek gewone wiskunde in die prentjie bring dan is daar geen formule waar dit na 'n goeie plan lyk om 'n roomyskoek te maak nie. 'n Hele paar se skeppinge het voor hulle oë weggesmelt. Die wat hulle roomys in bakkies aangebied het, het goed gedink.

Nou so bietjie oor die program ... hierdie tipe programme se werklike waarde vir die kykers lê in die geleentheid om te kan leer en dis waar ek dink die Engelse se koek storie ons Koekedoor bietjie in die stof laat byt ... met die vorige reeks het ek eenkeer daaroor geskryf en ek gaan dit nou weer doen ... deel julle beoordeelaars se kennis meer met ons. Ja dis sekerlik kykpret om te sien hoe spartel die deelnemers maar sekerlik kan julle so paar minute afknyp dat die beoordeelaars hulle menings met ons deel en ons vertel hoekom goed skeef loop ... daar was vanaand wel a goeie skeet van dit met die perskekoek maar julle is maar suinig.

Nouja ... ek sien uit na volgende week.

Ek wil darem graag dit net noem ... Mari-Louis het vanaand pragtig gelyk. Vir my was haar grimering baie mooi, amper bedeesd maar met so pikante wulpsheid wat in sprankel ontaard het sodra sy begin lag ... man, dit was vir my so opvallend.
Dankie Errieda ... dis lekker om na die program te kyk en te wonder of ek ooit so iets sal kan maak ... vir nou bly ek maar by die brood.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Sampioene - Maklik en lekker

Heerlik en geurig

Die mens wat my ken weet al by die tyd dat ek nie regtig moeilike resepte en metodes ophemel nie. Die basis van my hele kokery is dat dit Man Kos is en by definisie moet Man Kos maklik wees.

Speserye in die olie

Sampioene of Mushrooms is iets wat baie mense van hou maar o genade, die goedjies word gewoonlik verongeluk in die pan of die pot. Mushrooms het oor die algemeen 'n baie subtiele smaak wat baie maklik oordonder kan word en dan eindig jy met so rubberige refleksie van wat eintlik 'n baie lekker dingetjie kon wees.

Vandag gaan ek vertel hoe ek my mushrooms gewoonlik maak ... dis nou waneer ek die mushrooms self op die bord wil sit en nie in 'n sous of bredie wil gebruik nie.

Sit botter by

Vir die gaan jy 'n pakkie van die mushrooms nodig hê wat in die markte beskikbaar is. Kyk vir 'n pakkie waar almal min of meer dieselfde grootte is ... dis belangrik want dan weet jy almal word gelyk gaar.

Moenie jou mushrooms afwas in water nie ... vryf die kompos maar weg met 'n sagte kwassie. As jy dit in water afskoel verongeluk jy alles.

Braai en moenie roer nie

Vir my metode gaan jy 'n lekker warm pan nodig kry, genoeg olie om die pan bodem so vuurhoutjie dikte te bedek en a leker eetlepel botter of varkvet. Sit alles in die pan en gooi dan a goeie klompie van jou gunsteling braaispeserye in die warm olie.

Breek die stamme van die mushrooms versigtig uit, druk hulle liggies tussen jou duim en voor vinger dat hy plat word en bietjie split.

Daar begin die vog uitkom

Gooi nou die stamme in die olie en pak die pak die mushrooms in die pan dat die holtes boontoe wys. Strooi nou nog speserye oor die mushrooms en staan en wag ... moenie die goed roer nie. Spoedig sal jy sen daar vog in die mushrooms begin vorm. Gee so bietjie tyd dat die vogges mooi loop en draai dan die mushrooms vinnig om.

Een kant is nou reg.

Dis regtig belangrik dat jou pan baie warm is want as dit nie is nie gaan jy die mushrooms kook.

Strooi nog speserye nou op die gebraaide kant en braai vir min of meer dieselfde tyd wat jy die anderkant gebraai het. Haal die stammetjies uit en keer die mushrooms om ... so 15 sekondes en haal uit en bedien.

Moenie laat koud word nie.

Perfek vir die bord.

Ek maak my mushrooms sodra al die ander kos reg is om te bedien.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Aartappels - Raak so bietjie waaghalsig

Aartappels ... min mense glo 'n ete is volledig sonder aartappels en die meeste mans is lief vir dit. Daar is duisende resepte en maniere van aartappels voorberei en elke kok sweer syne is die beste. Ek het al baie maniere gebruik en baie flops gesien.

Dis nou mos Man Kos

Vanaand gaan ek julle vertel van 'n manier wat ek deesdae baie graag gebruik en die resultaat is gewoonlik iets wat die manne breed laat glimlag. Dis maklik en eenvoudig en verg net so bietjie geduld.

Almal van ons ... of altans die meeste van ons het herrinneringe aan die lekker bros gebakte aartappels wat ons oumas uit die oond uitgetower het. Baie van ons het dit sekerlik al probeer naboots en die meeste het agtergekom dat dit net eenvoudig nie so lekker soos ouma se aartappels is nie.

Na baie pogings en baie oplees het ek uitgevind wat my ouma se groot geheim was ... eerstens het sy nie olie gebruik nie ... nee dit was altyd vet, verkieslik gans of eend vet maar meesal was dit varkvet. Dit is die groot ding. Nou met die hedendaagse lawaai oor alles wat sleg is vir 'n mens kan mens seker nie verwag om dieselfde resultate te kry nie ... wat my meer fasineer is dat my ouma en oupa vet gebruik het en albei oor die 90 jaar oud geword het ... ek sien so om my dat baie van my tydgenote omkap al hier van die middel vyftigs af en hulle eet nie vet nie, gebruik nie botter nie en drink nooit volroom melk nie. Nou wonder ek maar ...

Sny jou gaar aartappels so

In my huis is LAE VET, POLI ONVERSADIG, SUIKER VRY alles skelwoorde en ek duld dit nie in my kos of in my yskas of op my tafel nie. Vir die laaste 3 jaar braai ek alles in varkvet wat ek kry as ek kaiings maak, ek gebruik net egte botter, volroom melk, volroom yoghurt en my dokter is verstom oor my cholesterol tellings en bloeddruk.

Terug by die aartappels. Ek gaan nou maar aanvaar dat die meeste mense nie vet in die huis het nie en gaan die meer "beskaafde" metode beskryf.

Vir elke aartappel het jy 'n teelepel botter nodig en dan genoeg kookolie om jou oondbakkie se bodem mooi te bedek, omtrent so vuurhoutjie dikte diep.

Stoom jou aartappels in die mikrogolf gaar of kook dit heel met skil en al.

Gebruik 'n groot genoeg pan

Kyk mooi na die fotos hoe jy dit sny nadat dit gaar is. Die skil gaan nou onder in die pan lê en gaan die aartappel bymekaar hou.

Strooi jou geliefde braai speserye oor die olie in die pan. Sit nou die botter in 'n bakkie en smelt dit. Met 'n kwassie verf nou die bokant van die aartappels baie mooi met die botter en maak seker alle kante is goed geverf. Dis belangrik dat jy die bak so kies dat die aartappels mooi oop kan lê en soos vingers boontoe wys. As jy teveel in die pan sit gaan daar nie ruimte wees vir die vingers om oop te staan nie en gaan jy minder "crunchie" stukke kry.

Strooi nou jou geliefde braai speserye mildelik oor die aartappel, moenie suinig wees nie.

Heerlik bros en smaaklik

Lekker warm oond van so 190C en sit die bak in. Laat dit gaan vir so 20 minute en haal nou uit, verf die vet in die pan weer oor al die aartappels met a kwassie en sit terug in die oond. Draai die temperatuur nou af na so 170C toe en bak vir nog 20 minute. Hierdie is slegs riglyne want oonde verskil kwaai, hou maar dop en moenie laat die aartappels brand nie.

Draai die oond nou af en los die bak in die oond tot jy moet opskep. Mooi netjiese porsies en liplek lekker.

As jy so gelukkig is om gansvet of varkvet in die yskas te hê, vervang die botter met die vet. Die olie is nodig om te keer dat die aartappels te maklik aanbrand.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Humor - Kombuismaniere

Laat in 2013 beland hierdie stukkie galbraak in my posbus en vanoggend maak ek bietjie posbus skoon en lees dit weer. Dis so goed geskryf dat ek wil deel en bewaar ...

Geniet hom ...


"Die kombuis by my werk is een van daardie plekke wat ‘n venster oopmaak op die menslike psige wat eerder toe moes gebly het. Oor die algemeen is ek nie mal oor die mensdom om mee te begin nie; vyf minute in die klein kombuisie op ons vloer en dit voel vir my dat dit miskien weer tyd is vir 'n handige verwoestende plaag wat so bietjie die bevolking uitdun.


Dit is nie net die spons – wat lyk soos 'n nalatenis vanuit die oertyd en partykeer vir mens grom as jy probeer om hom onder die kraan in te stoei – nee, dis nie net daai spons wat my laat dink dat meeste mense se ouers hulle duidelik nooit basiese higiëne of maniere geleer het nie.


Dit het ook te doen met die feit dat sommige mense dink dat dit helemal sosiaal aanvaarbaar is om die laaste bietjie water in die urn te gebruik en dit dan net so te los, kurkdroog en terwyl hy nog kook – net sodat die volgende persoon, wat tot dusver 'n heerlike oggend gehad het en wie se geloof in die goedheid van sy medemens stadig besig was om weer in sy binneste te bot en wat net 'n lekker koppie koffie wou gehad het om die dag mee te begin, eerder ontdek dat die urn weereens uitgebrand het en hy moet wonder of hy ooit weer sal kan sien terwyl hy deur die kokende stoomwolke steier om die plug af te sit.


Nog 'n faktor wat 'n belangrike rol speel is in hierdie scenario is hoe sommige mense blykbaar nie die konsep van suikerlepels begryp nie. Hiermee bedoel ek die tipe mens wat, ten spyte van die feit dat die lepel in die suikerpotjie lê, dit sal uithaal en dit vir hulle koffie gebruik, selfs om hulle koffie te roer en dit daarna TERUGSIT IN DIE SUIKER.


Ag shamepies, die lepel wat klaar in hulle besit is en op daardie oomblik teen die kant van hulle koppie rus is tog net te kosbaar en fragiel en moontlik ‘n erfstuk en is eintlik maar net daar om mooi te lyk en so af en toe die lig op ‘n estetiese manier te vang sodat mense hulle kan komplimenteer in hulle keuse van eetgerei.


Ek het al nagte omgelê en dink aan wat ek sal doen wanneer ek die persoon(e) vang wat sulke blatante haatmisdade pleeg. Die algemene konsensus blyk te wees dat ek ‘n halssnoer sal maak uit die verantwoordelike party(e) se interne organe en dan die res van hulle sal gebruik om ‘n groot tenk koffie te roer en daarna in ‘n silo vol suiker te gooi terwyl ek skree: “Wat ‘n roerende verhaal! Jy roer my hartsnare!” en ander sulke pittighede.


Daar is ook ‘n sekere tipe persoon wat dink dat ‘n vadoek vir alles – van vloere-vee tot neus-blaas – gebruik kan word. Dit word ook nie gedoen om die vadoek terug te sit waar jy hom gekry het nie. Nee wat, jy gooi hom sommer so in die hoek van die kombuis, daar in die donker waar hy kan lê en muf en nuwe vorms van lewe tussen sy klam voue kweek.


Daar is selfs die tipe mens wat skielik oorval sal word deur ‘n lus vir ‘n paar gekookte eiers en dan sal besluit om die urn te gebruik vir ‘n doel wat definitief die waarborg sal kanselleer. Ek sal nooit die uitdrukking op my baas se gesig vergeet toe sy groen om die kiewe vir my kom vertel wat sy ontdek het toe sy wou loer of die water al kook nie. Iemand het ‘n kous, wat vermoedelik oomblikke vroeër aan ‘n voet was, gevat en twee eiers daarin gesit en die toe in die urn gesit om te kook.


Ek dink nie daar is enige temperatuur waarteen mens die water kan kook om daardie urn skoon te kry nie. Ons het die menslike ding gedoen en die urn uitgevat in ‘n klein straatjie langs die gebou en hom geskiet en toe die oorblyfsels verbrand.


Dit gaan ook die verstand te bowe waarom sommige mense dit korrek en goed vind om jou kos te steel. Los mens ‘n bietjie melk in die yskas, of selfs net ‘n ou botteltjie water, kom een of ander analfabeet langs en eien dit hulself toe. Dit is hoekom ek nie eens my kos in die mikrogolf warm maak nie. Jy weet nie of dit nog daar gaan wees wanneer jy weer die deur oopmaak nie.


Maar dis reg, my wraak sal verskriklik wees om te aanskou.


Ek wil tog so graag eendag daardie trick probeer waar mens bietjie Brooklax in melk of iets anders sit, dit dan in die yskas los en dan uitkyk vir die persoon(e) wat baie benoud lyk en elke 2 minute toilet toe hardloop. Ek wil foto's van hulle neem soos wat hulle aan die toilet se mure vasklou en bid vir verlossing en dit dan op die internet pos.


Name en shame, bliksem, name en shame."

Mieliepap - Man Kos Paptert

Kyk as daar nou een ding is wat my die horries gee dan is dit die papterte wat niks anders 'n slopperige paperysel van pap en 'n wye verskeidenheid groentes is nie. Geen tekstuur of vorm nie net 'n paperysel.

Man Kos Paptert

Deel van my eksperimente met die 100% Braaipap meel moes net eenvoudig op 'n paptert uitloop ... en so was dit dan.

Sondagoggend en ons begin praat oor middagete. Dis mos tradisioneel 'n groot etery maar ek het die laaste twee jaar ernstig daarop gefokus om die tradisie van 17 disse op die tafel te verbreek. Dis tydrowend en meer belangrik, dis 'n grootskaalse vermossing van kos. My standpunt is dat mens nie nodig het om meer as drie elemente op 'n bord te sit nie. Sodoende kan jy werklik fokus op smaak en geur in plaas van om jou self mal te maak met 'n onpraktiese verskeidenheid. Op die einde is alles daar maar baie min is van uitstaande smaak en niemand kan dit regtig geniet nie want een lepel van alles laat jou bord lyk asof jy die buurt probeer voed.

Terug by die eintlike storie ... my oog val op die papot van gisteraand en ek lig die deksel ... ek krap die koue pap versigtig los met my tweetand vurk en my kop werk ... ek is nie lus om weer net pap by te maak nie ... ek moet iets anders doen.

Bestandele

En so word die paptert gebore.

Jy gaan benodig ...

2 koppies stywe pap of Putu.
2 Eiers
Melk of room
1 koppie gekapte uie

Meng mooi

1 koppie gekerfde wortels (Sirkels of plat skyfies)

Onthou, alles gaan oor geur, smaak en tekstuur as dit by goeie kos kom. Eerste die uie. Braai dit uit in so bietjie olie of botter ... ek gebruik varkvet. Tydens die braaiproses moet jy die uie lekker geur met peper en braaispeserye. Ek gooi ook rooipeper by. Sodra die uie lekker sag is, skep uit in 'n koppie.

Braai van die uie

Terwyl die uie braai, gooi die wortels in 'n potjie met water en botter en 'n knippie sout. Dit moet vinnig kook, jy wil dit net sag kry. Gooi so eetlepel suiker ook in die water en a stewige klompie witpeper. Sodra die wortels sag is, net sag nie pap nie, skep uit in a koppie ... moenie al die sous in die pot sambring nie, jy soek net die wortels.

Kook van die wortels

Jy is nou besig om die uie en wortels elkeen afsoderlik goed te geur. Dit is als deel van die proses om op die einde a lekker geurige dis te kry. Sorg vir elke element en die eindresultaat sal nie sommer verkeerd wees nie. As jy alles as 'n geheel sien gaan jy maklik opeindig met 'n verwarring van smaak en geur.

Reg vir die oond

Breek nou die eiers in maatbekertjie en klits goed. Gooi melk of room by om 200ml te maak. Ek gebruik a teekoppie, dis 200ml.

Finale produk

Meng nou alles behalwe die wortels mooi in 'n mengbak. Ek gebruik my hande sodat ek kan voel dis nie klonterig nie. Sodra dit glad is gooi die wortels by en meng dit versigtig in, jy wil nie wortels verbrysel nie. Hier kan jy gerus meer smaak byvoeg soos chilli flakes.

Nou het jy 'n mooi mengsel van drie basiese elemente en 'n interresante geur konkoksie. Smeer 180 x 180 oondbak mooi en skep jou mengsel daarin. Nou is hy reg vir die oond.

Jy sien seker ek sit geen tamaties in nie en ek doen dit omdat ek nie met 'n papperysel wil opeindig nie. Jy kan sampioen stukkies en greenpepper bysit as jy wil. Gedroogde cranberries en gekapte gedroogte vye of appelkoos is ook 'n goeie opsie.

Nou in 'n 180 C grade oond vir vir tussen 20 en 30 minute. Jy wil hom bak tot daar so mooi ligbruin korsie gevorm het. Haal uit en laat rus vir so 20 minute voor jy opdien.

Die is genoeg vir 4 tot 6 mense. Die tert sny in mooi skywe en jy kan dit baie maklik as bykos by 'n formele ete bedien. Jy kan 'n pikante sousie ook maak.

Vervang al die sout elemente met soetgoed soos kersies, rosyntjies en bietjie neute. Gooi so eetlepel bruinsuiker by en die word 'n nagereg wat lekker is saam met vla en roomys.

Nou daar is hy ... Man Kos se Paptert.


Nog Pap Stories:

Mieliepap - Man Kos en GWK se Braaipap
Mieliepap - Iets wat ons almal ken
Mieliepap - Rof en Grof met Semels
Pap - Plaatkoekies met Houding 
Pap - Krummelpap kan Stylvol wees 
Mieliepap - Laatnag Snaxie 

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Mieliepap - Man Kos en GWK se Braaipap

Ek het die lofliedere van lekker mieliepap alreeds goed besing en dis opgeteken in van my vorige stories oor mieliepap.

GWK 100% Braaipap

Vir my is mieliepap een van daardie dinge wat my altyd met nostalgie vervul en ek het duidende kinderdae drome oor mieliepap. Ek dink die hedendaagse jeug verstaan nie altyd baie mooi oor hoe arm was baie van ons ouers nie en hulle sien net die dinge soos dit vandag is.

Pure Mieliemeel

Ek onthou baie dae in my kleintyd waar mieliepap die hoofbron van voedsel was op die tafel en enige iets wat bygekom het was pure bederf en groot bonus.

Lekker vir ontbyt

Oor die jare het meel nogal verander en van die sewentigs af was die super fyn mieliemeel aan die orde van die dag. Tydens die groot droogte in die sewentigs het ons weer geel meel gekry en dit was vir my baie lekker. Maar toe word dinge weer beter en die geel meel verdwyn. In die laat tagtigs het ons in Natal die eerste Braaipap op die winkelrakke gesien en dit was fantasties ... lekker grof en semels duidelik sigbaar. In my huis was dit al mieliemeel wat gebruik is en nie net vir braai nie.

'n Mooi pot pap

Ongelukkig het die braaipap met tyd al hoe fyner geword en teen die middel negentigs was die braaipap op die winkelrakke maar redelik fyn en weinig verskil van die gewone fyn mieliemeel. Ek het van tyd tot tyd so hier en daar 'n sakkie growwe meel in die hande gekry in van die kleiner plattelandse dorpies waar daar 'n meule was maar dit was maar met rukke en stote.

So paar jaar terug toe verskyn daar weer 'n toegewyde braaipap op die toneel en hulle adverteer wyd en suid en dryf die produk op Facebook. Ek kry van dit by my SPAR en ek is woes beindruk met die meel. Lekker grof en dit maak heerlike pap. Ek is tevrede en my mieliepap laat my weer breed glimlag. Maar soos met baie produkte het die produk ook deurgeloop onder verwaarloosing, altans hier in die Laeveld en spoedig is dit nie meer by SPAR nie en net so hier en daar by 'n Slaghuis. Dit was terleurstellend vir my en my mieliepap etery het weer afgeplat en aartappels het die hoofrol gespeel in stysel in my kombuis.

Vroeg in Desember 2015 kom ek toe op die produk van GWK af op Facebook - 100% Braaipap. Hulle adverteer dit as 100% Braaipap en dis verkrygbaar in 4 tipes.

1. Lekker Grof
2. Bitter Grof
3. Rof en Grof met Semels
4. Geel Meel

Pap en maalvleis

Die verpakking is in regte egte meelsakkies en is gemerk 5lb ... daar is blykbaar ook 10lb sakkies beskikbaar. Ek doen navraag en na verskeie boodskap verwisselings beland die meel toe hier in my kombuis. Die verpakking laat my sommer dadelik na my ouma verlang en met 'n bree glimlag soek ek die die regte kant uit van die sakkie om die toutjies te laat ontrafel. Ai hoe onthou ek die dae op die plaas waar ek menigmaal gestaan en kyk het hoe my ouma die sakkies met haar krom vingers oopgetrek het. Die garing is versigtig opgerol want in daai dae is byna niks weggegooi nie.

Pap en Hoendervlerkies

Ek het die Rof en Grof met Semels eerste oopgemaak ... en ek staan en kyk na die inhoud. Dis regte egte mieliemeel die en ek vroetel met my vingers in die meel ... daar is baie tekstuur en die semels is duidelik sigbaar ... dit is mos "Man Kos" die dink ek terwyl ek my pappot op die stoof sit.

Pap en Skaapafval

En so begin my ontdekkingsreis in die wonderwêreld van GWK se Mieliemeel. Vir die volgende vier weke het daar byna elke aand 'n pot pap op die stoof gestaan vir aandete. Sels op oukersaand. Ek het al die tipes meel getoets en het slappap, putu en krummelpap gemaak. Ek het elke denkbare metode van pap maak uitgetoets en neergeskryf, hordes fotos geneem en oor en oor getoets. Ek het die mieliemeel werklikwaar deur die meule gedruk in my kombuis.

Lekker Putu

Die belangrikste ding wat baie vinnig duidelik geword het was die feit dat die grofgraad van die meel verseker die tradisionele maniere van papmaak so bietjie omkrap.

Eerste ding wat gou duidelik geword het is dat die meer stywe pap verseker langer vat om gaar te word as die meel waaraan ek gewoond is.

Superfyn Krummelpap

Tweede ding is dat die meel se growwe aard vereis meer water omdat daar baie meer tekstuur is wat vog trek.

Derde ding wat duidelik was is dat jy sal jou sout moet vermeerder en dit gaan vir my hand aan hand met die feit dat mens meer water moet ingooi.

Krummelpap en lekker sous

Die geel meel was vir my die grootste uitdaging. Die meel is nie grof nie maar helder geel en my eertse poging was 'n redelike flop. Met 'n ergerlike knor onder my snor deur het ek die pap uitgekrap in die emmer in wat vir die voëls gevoer word en my vrou het half geammuseerd gestaan en kyk hoe ek stoom.

"Man moenie so opgewerk raak nie ... dis net pap."

My gunsteling ... die brandsel

Kyk, sy het goed bedoel maar vir my was dit soos 'n rooiwarm yster in my agterstewe in ... ek haat flops ... met ingewikkelde disse is flops gewoonlik redelik naby maar met 'n eenvoudige ding soos pap ... goeie genade ... dis nou 'n "epic fail" soos my oudste sou sê.

Wat was dan fout ... wonder jy seker nou ... wel die pap was taai en daar was verseker te min sout in.

Die tweede poging het ek egter mooi geweet wat loop verkeerd en het my resep en metode ernstig aangepas. Die geel meel soek meer sout en verseker baie langer kooktyd. Normaalweg is my pap reg na so 75 minute ... die geel meel het na twee en half uur eers reg gesmaak vir my. Nou wil ek net byvoeg, my Poppie is nie 'n groot papeter nie en ek was verbaas toe ek sien sy gaan vir 'n tweede porsie van die geel pap en later toe sien ek sy peusel weer daar uit die pot uit.

"Jis maar die is baie lekker pap."

Nouja ... vir my was dit baie lekker maar om die woorde van my vrou te hoor is die grootste kompliment vir die geel meel.

Maak nou regtig nie saak wat die meeste mense sê nie ... pap maak is 'n kuns, ek meen nou, goeie pap. Meeste mense dink pap maak is speletjies en selde word daar ordentlik gemeet en dinge word so op gevoel gedoen. Wel, good luck met daai metode ... ek werk met maatbekers en ek kan keer op keer presies dieselfde resultaat kry.

Om lekker stywe pap of putu te maak gebruik ek 2 koppies meel en 3 en 1/2 to 4 koppies water saam met die GWK Braaipap ... hoe growwer, hoe meer water. Sout is so om en by een teelepel maar die geel meel soek meer sout. Dit lewer genoeg pap vir vier mense. Gebruik groter of kleiner koppies vir die afmeet maar hou die verhouding soos dit is. Sout moet jy aanpas na smaak maar pasop vir te min.

Na baie potte pap is ek nou gemaklik met die GWK Braaipap en my eie persoonlike voorkeur is om een en half koppies van die gekose grofgraad meel te meng met 'n half koppie van die geel meel. Dit is vir my baie lekker en die pap lyk mooi. Ek vervang ook van die water met melk en dit is baie lekker. Ek sit standaard twee eetlepels botter in my pap se water waneer ek dit kook.

Ten slotte ... die GWK Braaipap is van die lekkerste meel wat ek ooit gebruik het vir pap en ek hoop werklik dat die produk wyd en suid beskikbaar gaan word. Die prentjies op die sakkies is kostelik maar ek dink dit gaan verwarring skep by die publiek. Die meel soek 'n sterk handelsmerk om dit te laat uitstaan en om volgelinge getrou te maak.

Doen moeite ... soek vir die meel en jy sal moontlik nooit weer met ander meel tevrede wees nie

Ek hoop die storie laat jou met nuwe oë na mieliepap kyk. Hierdie spesifieke meel het 'n baie lekker tekstuur en 'n baie lekker geur. Tans is dit die beste Braaipap wat ek ken.

Nog Pap Stories:

Mieliepap - Iets wat ons almal ken
Mieliepap - Rof en Grof met Semels
Pap - Plaatkoekies met Houding 
Pap - Krummelpap kan Stylvol wees 
Mieliepap - Laatnag Snaxie 

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Nagereg - Man Kos Kluitjies

Man Kos Kluitjies

Menige man is baie lief vir so ietsie soets aan die einde van die ete. Ek persoonlik is nie baie lief vir warm nageregte nie maar hierdie een is die uitsondering. So ruk gelede het Dine van Zyl my gevra of ek nie 'n lekker maklike nagereg het wat op die vuur gemaak kan word nie en dit het my so bietjie laat sit en dink ... en toe kom ek met die een op.

Dis 'n baie eenvoudige resep en die bestandele is nie ingewikkeld nie.

Eenvoudige bestandele

Hierdie nagereg kan op die stoof of op die vuur gemaak word. Dis vinnig en baie lekker. Dit is
verseker ryk maar nie te soet nie.
Die resep lewer 6 tot 10 porsies, afhangende van hoe honger die mense is maar as jy dit in koppies opskep behoort jy maklik 10 koppies te kan vul.
Die is 'n regte Man Kos nagereg waarvan vrouens ook hou. Meer belangrik, dis baie maklik om te maak en die kluitjies is altyd lekker lig.

Karamel en water in die pot

Bestandele:
1x Blikkie Nestle Caramel Treat
1x Houertjie 500ml Vars Room
1x Blik 410gr ingelegde Appelkose (Jy kan Perskes ook gebruik)

Perskes en room bygevoeg

Nota: Die poeding is glad nie baie soet nie. As jy dit meer soet wil maak kan jy so 2 eetlepels goue
stroop in die sous sit. Lekker fynbos heuning is vir my 'n beter opsie. Ek stel voor jy maak dit een maal en proe self of dit soet genoeg is. Ek persoonlik verkies 'n nagereg wat nie te soet is nie. Ek hou maar die bottel heuning byderhand sodat die gaste self besluit hoeveel hulle wil by sit.






Sous:

Kluitjie deeg

Plaas die karamel in 'n ysterpot en dreineer al die stroop in die vrugte blik ook in die pot in. Gooi
nou een en 'n half maal van die karamel blikkie vol water by en verhit. Roer maar gereeld totdat
alles mooi opgelos is. Moenie omgee as dit lyk of die karamel skif nie.
Haal nou die pot van die hitte af en maak jou kluitjies aan.

Kluitjies ingeskep

Hierdie stap is belangrik want as jy die kluitjie deeg aanmaak moet dit vinnig gebeur anders gaan jy die veerligte tekstuur verloor as jy te lank wag voor jy dit in sous skep. Daarom kook ek die stroop en maak dan die deeg aan.


Kluitjies:
250 ml koekmeel – 1 Koppie
125 ml wit suiker - ½ Koppie
5 ml bakpoeier – 2 Teelepel
2 ml sout - ½ Teelepel
40 g margarien

Kook lekker vinnig

1x eier en genoeg koue water om saam 100 ml op te maak. Die is belangrik want dit gaan bepaal hoe hanteerbaar is jou rou kluitjie deeg.





Meng al die droë bestandele saam en vryf dan die margerien of botter in soos waneer jy skons bak.

Deksel toe

Gooi nou die room in jou SOUSPOT en laat dit goed en vinnig kook. Gooi nou die perske stukke ook in die sous en meng solank jou meel met die eier-water mengsel.

Meng nou die meel mengsel en eier-water ... moenie getempteer raak en meer water by sit nie. Jy soek 'n taai deeg. Jy moet nou vinnig werk want jou pot kan oorkook.

Lekker lig en romerig

Nou gebruik ek 'n grootlepel en skep sulke hompies deeg in daardie borrelende sous in. Werk vinnig en maak die deksel toe. Draai die hitte nou laag af en los die pot uit vir 30 minute. Moenie die deksel oplig nie want die stoom proses is baie nodig om jou kluitjies gaar te kry.

Na 30 minute sit jy die hitte heeltemal af en laat die pot net so staan vir nog 30 minute. Jy kan loer as jy wil maar dis beter om nie die deksel op te lig nie. Die kluitjies is veerlig en gaan nou staan en die sous ordentlik opslurp.

In die koppies

As jy jou kluitjies bietjie droër wil hê kan jy die halwe blikkie water uitlos wat jy in die begin ingooi, met ander woorde jy gooi net 1x blikkie water in die sous.

Jy kan kaneel of mixed spice ingooi as jy wil om so bietjie feestelikheid in die pot te sit.

Die nagereg is heerlik saam met geklopte room of roomys ... jy kan ook vla by bedien as jy wil ... ek doen dit nie want die poeding is souserig genoeg.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.