Menu - Rumpsteak vir vier

Hierdie dis is saamgestel om 'n lekker kuier aandjie by die tafel te geniet. Geen gespook en spartel met die menu nie want die dis is alles bymekaar.

1.2kg Rumpsteak

Voorgereg, hoofgereg en nagereg. Jy bestel net Rumpsteak vir vier en ons bring die geregte tafel toe. Elke gereg sluit ook 4 glase wyn, rooi of wit of vier biere in ... so dis jou keuse, wyn of bier of gemeng.

Crostinni

Hierdie gereg is baie aards en geen fieterjasies nie. Dis 'n gereg wat jy bestel vir vier mense as jy nou betaamlik is ... maar een of twee groot vleisvreters kan hom kaf draf. So dit hang af van wie jy by jou tafel gaan onthaal ... as dit fyn besnaardes is dan is die reg vir 4 mense maar as dit nou net jy en jou groot maat is, wel dan gaan julle knuppeldik opstaan.

Jy gaan begin met die met die crostinni en 'n doopsousie. Net die regte ding om die geselskap aan die loop te kry en die smaakpapille op te wakker.

Krummelpap en sous

Dan kom die hoof maal ... regte krummelpap met 'n lekker ryk sous ... ons gaan vir jou 'n lepel gee vir die as jy wil lekker eet. Die plank met die rumpsteak is natuurlik die ster van die tafel. Om en by 1.2kg Rumpsteak ... vlamgebraai en in repies gesny. Daar sal vanselfsprekend meer gaar dele wees maar die lyf gaan nie sommer by medium-rare verby nie ... jy kan dit nie aan so edel stuk vleis doen nie. As jy van jou vleis goed gaar hou dan moet jy nie die rumpsteak bestel nie. Die dis is spesifiek gemik op die groot vleisvreters.

Vanilla Roomys, Suurlemoenkonfyt en koek

Elkeen help hom maar self met soveel repies as wat jy wil hê en dis 'n goeie plan om maar eerder versigtig te vat want die vleis is groot ... jy wil nie opeindig met a paar repe op jou bord en maag trommeldik en een van jou vriende sit nog hongerig en rondkyk nie.

Ons sluit af met 'n eenvoudige maar baie lekker nagereggie ... vanilla roomys met 'n wakker suurlemoen konfytjie by en 'n stukkie geurige sponskoek. Jy het 'n jeuse van koffie of muskadel om jou keel mee nat te maak.

So, vir 'n aandjie wat jou gaan laat ontspan en sommer tuis laat voel ... gaan vir die Rumpsteak vir vier.


Geniet hom ... hy is gemaak van net die beste. Hierdie is nou ManKos waarvan vrouens ook hou.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Menu - Stew - Bees en Bone

Op die ManKos menu sal jy hierdie een sien ... Stew - Bees en Bone ... en dit is daar omdat dit my laat terugdink aan dae toe my ma drie groeiende seuns en 'n hardwerkende man moes voer. Dit was 'n luuksheid om vleis in die bord te kry en sy was 'n towenaar om die vleis te rek.

Bees en Bone Stew

Hierdie stew word gemaak van blade steak ... en dis maar taai, vir seker nie 'n prima snit nie. Maar daar is geen taai stuk vleis wat kan staande bly teen 'n lang stadige kook nie. Hy word gekook en geprut totdat elke veseltjie murg sag is en jy met 'n sous in die pot sit wat sprankel van geur.

ManKos maak daardie sous lank en dik en hy kry uie en drie soorte bone in. Die geur en smaak kom hoofsaaklik van die bene en vleis en dan tert ons dit op met lekker speserye en kruie ... alles werk mooi saam om jou te laat glimlag as jy daarna kyk, laat grinnik as jy daaraan ruik en dan is jy doodstil en kou stadig ... baie stadig want jy wil niks mis nie.

Vir kleur en bietjie ekstra geur gee ons so paar blokkies gebraaide soet pampoen ... 'n man hou mos van 'n soetigheidjie op sy bord.

Ek dink terug aan Augustus winde wat huil om die huis se hoeke en 'n koolstoof wat gloei in die hoek. Die pot se deksel wat wat so liggies rittel soos die stoom die deksel kort kort oplig ... en bo alles onthou ek die geur van daardie stew.

Dan by die tafel ... daar sit ons in groot afwagting en kyk terwyl my ma vir elkeen sy bakkie uitskep. Pa vra die Seën en dan word dit stil om daardie tafel. Die klik klanke van lepels op porselein is omtrent al wat jy hoor ... o ja ... en natuurlik die huilende wind. In my agterkop dink aan die mense wat minder bevoorreg is, soos pa dit in sy gebed altyd noem en ek maak my oë weer vir 'n wyle toe.

Die stukkies bees val uitmekaar tussen my tande en elke byt breek 'n boontjie ... die ryk sous smeer my tong en dan sluk ek ... maar die volgende lepel vol is alreeds op my lippe.

En dan op die einde, so lekker sny vars brood wat jy so deur die bakkie sleep en elke druppel van die sous opsuig. Man dit was goeie tye.

So sit aan, vra die Seën en stuur jou siel op 'n salige reis van geur en smaak wat jou sal laat dink voor jy weer van die beste stew praat wat jy al geëet het.

O ja ... natuurlik gee ons vir jou 'n sny of twee brood ... heerlike vars brood. Mens kan mos nie die sous in die bord los nie.

Geniet hom ... hy is gemaak van net die beste. Hierdie is nou ManKos waarvan vrouens ook hou.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Menu - Toeba - Steak en Chutney

ManKos gaan nie net oor die kos nie, nee, dit gaan ook oor die storie agter die kos ... die herinneringe wat deur jou kop flits as jy 'n spesifieke dis sien of ruik. Die Steak en Chutney Toeba vat my na 'n plekkie toe wat baie van ons ken ... altans ek glo so.

Steak en Chutney Toeba

Dis Braaidag by jou huis en vriende en familie trek saam vir die geleentheid. Dit gaan jolig en almal lag en drink en gesels ... maar daar in die agtergrond spartel jy en jou vrou om seker te maak dat almal ordentlik gaan eet. Jy hou 'n glimlag op jou gesig maar jou krop trek op 'n knop as jy sien hoe aspirant braaiers rond donner met die vleis op die rooster ... elkeen dink mos diep in sy binneste dat hy is die beste braaier op die kontinent en die metodes, souse en speserye is legio. Jy gee maar gelate toe want jy is 'n goeie gasheer. Jy sien hoe vroutjie jou oog probeer vang want diep binne in haar binneste weet sy dat jy nou deur hel gaan. So Braai geleentheid is nie eintlik die plek waar ware Braaimanskap gedemonstreer word nie. Daar is teveel stuurmanne en baie keer ook teveel drank betrokke. Ek hou maar my Braai vaardighede vir my gesin en 'n paar intieme vriende, by so Braaidag laat ek maar toe dat die meulstroom my meesleur en terwille van die vrede bly ek ook maar weg van die vuur af ... dit gaan mos meer oor die samesyn as die kos.

Die rook trek en die vet spat en die dop vloei en voor jou oë sien jy hoe mooi stukke vleis stadig maar seker na 'n gewisse einde van droeë vesels en verbrande vel en vet toe gaan. Jare se opvoeding deur 'n baie streng ma verhoed dat jy ongeskik raak, en beheersd vat trek jy maar stadig aan jou sigaret en kyk hoe die blou rook lui, lui, die skemerlig in trek.

Almal begin opskep en soek 'n plekkie om te sit ... jy vat ook maar wat daar is en krap so hopie rooi kole bymekaar. Sonder baie drama maak jy die bakkie oop wat jou vrou amper skelm in jou hand in druk. Jou oë dwaal oor die stuk steak wat blink van die olyfolie en dik gegooi is van die gemaalde swart peper. Die skare is diep in hulle borde in en merk nie eintlik op hoe die vlamme opspring as die steak die rooiwam rooster vang nie. Jy staan met jou rug na die vuur toe maar in jou gedagtes hou jy tyd ... dan net vir so paar oomblikke kyk jy wat jy doen en jy draai die steak om ... met genoegdoening sien jy die lekker swart skroeimerke. Sonder om aandag te trek draai jy die steak nog so keer of wat en dan terug in die bakkie. Jou vrou vat die bakkie, verskuil tussen 'n paar ander vuil bakke en borde en gaan kombuis toe. Sy lig die vleis uit die bakkie sit dit neer op 'n plankie. Druk 'n stuk foelie oor dit en plaas die plank iewers waar geen oog dit gaan opspoor nie.

Net die beste

Julle twee wuif vir die laaste vertrekkende motor en dan is dit kombuis toe. Die berg skottelgoed wag en terwyl jy was maak vroutjie die voorhuis en patio aan die kant.

'n Halfuur of so later sit sy die plankie op die tafel neer en jy glimlag .... nou gaan julle eet. Sonder woorde kyk sy hoe jy daai steak met sorg kerf en sy smeer die broodjies.

Wel op die ManKos Menu is daardie laatnag broodjie ... heerlike vars brood, lekker botter en kwaliteit blatjang. Die soutkristalle glinster orals ... en op die kant staan 'n stomende beker koffie.

Geniet hom ... hy is gemaak van net die beste. Hierdie is nou ManKos waarvan vrouens ook hou.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Menu - Toeba - Peanut Botter en Jam

Meeste manne hou van 'n toebroodjie maar die gemeenskap het ons ongelukkig na 'n plekkie toe gevat waar toebroodjies verfynde poefter goedjies geword het wat grênd mense saam met hulle tee drink. ManKos hou nie van die ding nie en en ons maak 'n Toebroodjie met stamina ... of nog beter ... ons noem dit 'n Toeba.

Op ons spyskaart is daar so paar Toebas en vandag wys ek julle die een wat die meeste van ons met sulke wasige ogies na die horison, of plafon, laat staar.

ManKos Toeba

'n Toeba wat herinner aan koue wintersoggende, speeltyd op die skoolgronde en daar waar jy langs die pawiljoenmuur wegkruip vir daai skerp windjie ... jou kniekoppe rittel terwyl jou lyf die flou winter sonnetjie probeer insuig. Met koue stram vingers worstel jy daai deksel af van die Tupperware bakkie en dan kom daar 'n vonkeling in jou oë. Die sagte vars brood lê kant aan wal in die bakkie en jy lig die een helfte uit ... en jou hart sing.

Lekker dik botter met peanut botter en jêm ... jy vat daai eerste hap, sommer so uit die middel van die Toeba, ons byt nie klein happies van die hoekies af nie, nee, ons vat hom vol in die middel.

Die kante van die Toeba smeer jêm en botter aan albei wange af en jou oë gaan sommer toe as jy daai mondvol begin kou. Die ryk romerige botter en peanut botter gly oor jou tong en dan vang jy daai super soet stukkies konfyt. Jy kou stadig en elke beweging ontsluit nog geure en smake en dan loer jy af na dit wat oor is in jou hand, tog te bang dis te min. Die tandmerke lê duidelik afgeets deur die lagies botter en jy grinnik ... ongestoord oor die jêm kolle op jou wange.

"Jis ma jy kan darem 'n Toeba maak."

Nou vat jy die krom punt aan die een kant en dan die die ander kant en as jy die die laaste hap vat dan knip jy die plastiek bak toe en vee jou mond skoon met die agterkant van jou hand. Die koue vergete en net so lekker warm gevoel in jou ingewande.

En dis wat 'n ManKos Toeba is ... nie net innerlike versterking nie maar ook geestelike verkwikking.

Ons is nie suinig nie

Daar is verskeie Toebas op die Mankos Menu en jy moet maar jou oë laat dwaal oor wat daar is en moenie bang wees om vir jou eie mengsel te vra nie ... ons is nie bang nie ... ons meng enige ding wat in die spens is. Kaas en Marmite, konfyt en kouevleis, roereier en heuning ... vra maar, ons is gek oor Toebas en enige versoek word na geluister ... niks is te mal vir ons nie. Hoekom ... want 'n Toeba is die vervulling van smagtinge en nie noodwendig net kos nie.

Bestel een of twee of drie ... peuselhappie of maaltyd ... ManKos Toebas kan hulle man staan. Tamatie met sout en peper vir voorgereg, Ham, kaas en roereier vir hoofgereg en lekker vyekonfyt vir nagereg ... ek sê mos ... peuselhappie of maaltyd ... ManKos Toebas is daar vir jou.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Menu - Padkos

Op die ManKos menu is daar 'n gereg, dis meer as 'n gereg ... dit is 'n plank met siel ... reg vir 'n vinnige aanvulling in 'n besige dag. Dit is nie eintlik 'n voorgereg nie maar 'n lekker klomp goedjies om jou deur 'n besige dag te help ... dis hoekom ek dit PADKOS noem want dis wat dit is.

ManKos se Padkos

Die dis bring herinneringe terug van langpad reise saam met my ouers. Dit was 'n tyd waar reise nog deeglik beplan moes word want paaie was nog nie snelweë nie en karre was nog vol nukke.

Ek onthou hoe my ma so aan my pa se skouer sou vat en sê ...

"Dawie jy moet nou vir ons 'n stopplek kry, die kinders raak honger."

Agter in die kar het ons opgewonde begin help uitkyk vir 'n stopplek en dan op die Hoëveld horison verskyn die teken ... 'n groot ou bloekomboom wat langs die pad staan, eensaam in die grasvlakte en ons weet ... onder daardie boom sal die sement tafeltjie en bankies wees waar ons gaan stop.

Terwyl my pa om die kar loop, die bande bekyk en dan die enjinkap oopmaak om die water en olie na te gaan breek my 'n paar takkies met blare af en stof die sement tafeltjie af. Sy haal die mandjie uit die kar uit en sit hom op een van die bankies neer. Eerste kom die rooi en wit blokkies doekie uit en hy word oor die tafeltjie gesprei. Dis reg, my ma het altyd 'n tafeldoek oor 'n tafel gesprei .... selfs oor die sement tafeltjie langs die pad.

Dan kom die eetgoedjies uit, hardgekookte eiers, frikkadelle, boerewors stukkies en die toebroodjies. Die toebroodjies was lekker dik gesmeer met botter, konfyt en kaas ... ja kaas was 'n luukse maar so reis was mos spesiaal en ma het uitgehaal en gewys.

En so sit ons om daardie tafeltjie, hou hande terwyl my pa die Seën vra en ook vir Liewe Jesus vra om ons te bewaar op die pad ... en dan eet ons die padkos ... verbygaande motoriste blaas toeter en waai ... dit was 'n tyd toe mense nog mensliewend was. Die Thermos fles word oopgemaak en ons kry elkeen so halwe bekertjie koffie ... regte blikbekers want in daardie dae was daar nie goed soos weggooi glasies nie. En dan as ons klaar was, dan het pa die watersak gebring en ma het 'n vatlappie uitgehaal ... natgemaak en die kinders se hande en monde skoongemaak terwyl pa die mandjie pak. En so val ons weer in die pad ... los niks agter nie behalwe ons spore.

Nouja ... dis wat op hierdie ManKos spyskaart te vinde is onder Padkos. Jy is dalk op reis tussen twee afsprake, of op pad terug van 'n kliënt af ... of dalkies moet jy iemand gaan besoek maar dit gaan 'n lang afspraak wees en jy weet jy gaan middagete mis.

Kom sit aan en ons gee vir jou PADKOS ... 'n Paar repies heerlike biefstuk, twee snytjies lekker vars Brood met botter, tuisgemaakte konfyt en geurige kaas. Ons gebruik botter en ons is nie suinig nie. Ja dis twee oop Broodjies want Toebroodjies is iets anders op die ManKos Spyskaart. Jy gaan ook 'n lekker gekookte eier kry wat gerol is in sout en peper mengsel ... daardie lekker bietjie brand net om jou smaak organe wakker te skud voor jy in die heerlikheid insak. En aan die kant ... stomende koffie.

As jy nou nie 'n rooivleis eter is nie kan ons vir jou 'n hoenderboudjie gee of 'n frikkadel ... dis mos ook goed wat in so padkos mandjie ingaan.

Eet sommer met die hand maar as jy fiemies het sal jy op die tafel sien daar is messe en vurke. Eet die broodjies een een of sit die vleis bo-op die kaas en vou hulle toe en maak jou eie toebroodjie. Maar pasop ... dit gaan 'n stewige toebroodjie wees want ManKos is nie fyn en pikant nie. En as jy klaar is sal jy vind ons gee vir jou 'n klam lappie om jou hande mee af te vee ... ons gee eintlik twee, een vir die afvee voor jy begin eet en een vir na die tyd.

En dis ManKos se PADKOS ... dalk ongewoon maar nie regtig volksvreemd nie. Eet dit eenmaal en moenie verbaas wees as jou kar sommer vanself die stilhou plekkie gereeld kom opsoek nie.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.