Sjokolade - Smelt dit sonder swetse

Die oomblik as ek in 'n resep lees dat daar sjokolade gesmelt moet word dan gaan ek klaar aan die swets. Ek het al so baie metodes probeer en soveel gadgets gekoop om die ding reg te kry dat ek wil naar word daarvan.

Gesmelte Sjokolade

Ek glo baie van ons het al met die beste voornemens begin en dan opgeeindig met 'n klomp klonte en vet in die bak.

Laasweek maak ek gesonde koekies vir die kleinkinders en daar is dit weer ... die koekie moet afgerond word met gemelte sjokolade strepies. Jissim my moermeter klim sommer dadelik in die rooi in.

Ek maak die koekies klaar en Poppie stap in die kombuis in. Sy kry my waar ek na die glasbak staar wat vol sjokolade skyfies is.

"En nou ... bid jy ?"

"Nou nie regtig nie maar ek dink ek moet." brom ek en steek 'n Camel aan die brand. Terwyl die blou rook so deur die lug draal werk my kop oortyd. Daar moet 'n makliker manier wees en ek is vasberade om dit te kry.

Dan onthou ek Mary Berry se woorde aan Paul Hollywood ... "Remember, chocolate melts in a child's hand."

Vadoek in die Mikrogolf

Die ding met die sjokolade is vir my die volgende ... as jy teveel hitte gee dan split en "seize" die spul en as jy bietjie room bysit word dit ganache en stol nie altyd weer hard nie. Jy moet ook pasop dat daar nie water in die bak beland nie want dan is die sjokolade ook in sy maai in.

Bakkie op die warm vadoek

Ek vat 'n klein vadoekie en maak dit nat onder die kraan. Vou dit dubbel en dan weer en sit hom in die mikrogolf oond. Een minuut op hoog en die stoom trek uit die vadoek uit. Ek sit die glasbak op die warm vadoek neer en maak die oonddeur toe. Na een minuut kyk ek ... en sien dat van die sjokolade begin blink lyk. Ek roer die spulletjie en sien dat daar reeds gesmelte strepies is. Ek haal die bak uit die oond en blits daai nat vadoek weer vir 30 sekondes.

Glasbak terug op die warm lap en maak die deur toe. Wag nog a minuut en toe roer ek die spulletjie weer. En daar voor my oë verander dit in die mooiste en gladste gesmelte sjokolade wat ek al ooit reggekry het.

Indien jou sjokolade stukke groot is mg jy dalk die laaste roetine nog so keer of wat moet herhaal.

Nouja ... en nou is die draak ook afgemaai. Probeer dit gerus. Onthou net ... ek maak net die vadoek warm, nie die sjokolade nie.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Sourdough - You and your oven

When baking bread, especially sourdough, the most important goal is to get a good crust.

Lovely crust

I have tried a lot of the methods, DO, Stone, Stone with Dome, Roasting pan with ice, Roasting pan with water, Roasting pan with Lava Rocks, Loaf pans, perforated pans ... you name it.
 
Some may know yet many wont ... I run an Afrikaans Language FB Page and Blog ... Colyn Kook Man Kos ... loosely translated as Colyn cooks Man Food or Dude Food if you like.
My mission is to encourage men to cook and as such I try and find the easy routes because as a rule men don't want complicated, especially if you are not a natural cooking guy.
After many failures and violent bouts of swearing I have settled on a simple way of getting a decent loaf.

The DO thing is not easy because many do not own a proper DO and then the ever confusing question, DO Hot or DO Cold ... I have done both and the difference is negligible for a home baker.
The roasting pan for the steam is a problem in domestic ovens because it shields the underside of the bread from the bottom element ... if you bake full thermofan then this is not an issue. I prefer to bake FAN ASSISTED.

Small loaf pans for water

The stones requires a long warming up cycle and not everyone has a stone.

On simple sheet pans

So I have settled for two small loaf pans, one on each side of the oven on the shelf set in the lowest setting. Then another wire rack in the middle. Filled the loaf pans with lava rocks.
I shape and form my loaves and bake on a metal sheet pan, the thinner the better. This metal heats up almost immediately on placing it in the oven because it is so thin.

I put 500ml of water divided between the two loaf pans and then spray the inside of the oven till the loaf is wet.

This gives me enough steam to last for around 15 minutes and by that time the loaf is steaming itself if it is a high Hydraditon dough.

I get acceptable results every time and I bake like this almost every day.

My oven is a Defy and there are two steam vents next to the handle, top and bottom ... in the image you can see the steam escaping through the bottom vent after 20 minutes with a 70% hydration loaf.
Hope this helps somebody ... it is cheap and uses what most have in their kitchens. This is how I teach men to bake their own Daily Bread.

Good crust, good oven spring and nice blisters

I bake on 220C Fan assisted and after 20 minutes I tune the oven down to 200C for another 10 minutes. Then I measure the internal temperature of the loaf to decide if it needs more baking. You want to see 195F and plus. Most bakers that hit a snag is caught by "under baking" ... for me the only sure way is to measure the internal temperature.


Here are my other Sourdough Stories ... LINK

Enjoy your baking till I write another story.

Hier is my Facebook Page... Man Kos ... like it if you want.

Kombuis - My gunsteling Gadgets

So tydjie gelede vra 'n goeie Kubervriendin my ...

"Wat sou jy graag in jou Kersfeeskous wou sien die jaar?"

Op daardie stadium was ek baie besig met met my regte lewe en kon haar nie antwoord nie maar die vraag het in my agterkop gedraal.

In my Kerfeeskous

Ek is seker baie julle het dieselfde probleem as ek ... jy sien 'n interesante dingetjie en dit lyk oulik en jy koop dit ... net om na een of twee keer se gebruik die ding in 'n kas of laai te sit en nooit weer te gebruik nie. Linza se vraag maal in my kop en ek staan en kyk in die negosielaai ... volgende maak ek die kas langsaan oop. Daar is handmengers, stickblenders, raspers, klitsers, kerfgoed wat my net laat lag. Meeste van die goed is duplikate van duplikate en niks word regtig ernstig gebruik nie.

Poppie klim in die kaste in en ons begin uitgooi ... twee goedjies glip terug in die kas in, een is 'n kerfdingetjie wat ek by die Pretoria skou in 1978 gekoop het en dis ietsie wat ek nogal kwaai gebruik het op 'n stadium. Deesdae lê hy maar net daar as 'n goeie herinnering ... sy weer wil nie afskeid neem van die ou bruin en roomkleur elektriese kerfmes nie. So elkeen van ons stoor maar ietsie wat sentimentele waarde het.

Twee groot plastiek kratte later en daar is plek in die laai en in die kas. Volgende gaan ek na Yuppie Chef toe en op hulle voorblad terg hulle my met 'n nuwe Kenwood ding ... hy doen alles wat ek in die krat gegooi het vanoggend en ek koop hom ... gaan terug kombuis toe en gooi nog 'n paar goed in die krat.

En so het ek my Kersfeeskous gevul met 'n handge meerdoel ding van Kenwood.

Nou gaan ek julle vertel van die gadgets wat ek baie gebruik in my kombuis ... goed wat ek nie sommer sonder wil wees nie ... verskoon my maar, maar ek is 'n groot Kenwood aanhanger en dus sal jy sien die goed is omtrent alles Kenwood. Hmmm ... Kenwood moet gerus my in gedagte hou as hulle weer dinge wil weggee.

Staatmaker menger

Eerste masjien is my Kenwood Titanium Chef. Hierdie masjien is 'n werkesel en hy doen omtrent alles wat ek wil hê hy moet doen ... van brood knie tot meringue maak ... hy doen dit sonder om swaar asem te haal. Ja ek weet die celebrity chefs maak groot bohaai oor Kitchen Aid maar vir my is hulle speelgoed teen my Kenwood.

Handig vir ligter take

Die volgende ding wat ek baie gebruik is so Kenwood Handmenger wat ook met 'n staander kom. Hy is nogal handig vir kleiner dinge en is maklik om skoon te maak. Ek gebruik hom gereeld vir die maak van versiersel en die meng van baie sagte koek mengsels. Hulle sê hy kan deeg knie maar ek het eenkeer probeer en die gekners en gekerm het my dadelik na die krag skakelaar laat gryp ... die outjie is kapokgewig.

Baie goeie opsies

Dan het ek ook 'n Kenwood Voedselverwerker, foodprocessor ... dis iets wat baie min mense regtig tenvolle benut want dis mos 'n storie om die ding te was na die tyd. Ek het daardie mental block eenkant toe geskuif want die realiteit is dat hy 500gr wortels rasper in 'n minuut of twee, hy vreet a 500gr blok kaas op in 'n japtrap en hy verpulp 'n kilogram mangoes sonder om eers te sweet. Ek gebruik die ding baie.

Handig en maklik om skoon te maak

Dan my jongste aankoop, die Kenwood Stickblender met al sy stukkies. Meeste mense gebruik die soort ding hoofsaaklik om sop te verpulp of kos vir babas te maak. Die ding het egter 'n magdom aanwendings en wat ek baie van die een hou is dat die ding waarmee jy goed kan fynkap is grootgenoeg om maklik dinge voor te berei vir twee mense. So ek gebruik dit baie in plaas van om die groot verwerker uit te haal.

Nog 'n ding van die Stickblender is die twee bybehore waarmee jy aartappels kan fyn maak ... 'n gewone Stickblender is nie goed vir kapok aartappels nie want die lem aksie aktiveer die stysel en dan sit jy met 'n taaierige pasta in plaas van donsligte kapokaartappels.

Altyd 'n wenner

En nou vir iets wat nie Kenwood is nie maar wel AEG ... my elektriese stoompot. Dis 'n ding wat van onskatbare waarde is. Ek maak geweldig baie stews met die pot. Jy koop die goedkoop bene en gooi dit in die pot saam met 'n aftreksel en 'n paar stukke groente en 45 minute later is daar 'n basis vir 'n pastei, of 'n stew of 'n sop en as jy slim werk sommer al drie voorafgenoemde.

Die grootste voordeel van die stoompot is die feit dat hy nie water verloor nie en derhalwe is daar feitlik geen kans dat hy kan aanbrand nie.

Ek hoop die storie is van waarde vir iemand en dat dit jou met nuwe oë laat kyk na al die gadgets wat jou kaste en laaie vol maak.

Moenie die waarde van die stukke gereedskap onderskat nie en gebruik die goed vir dit waarvoor dit ontwerp is.

Moenie die moeite van die skoonmaak toelaat om jou te laat voort ploeter met handgereedskap wat nie die gewensde resultate lewer nie, net omdat dit minder moeite is om te was.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Kombuis - Meet jou meel reg af

Hierdie kwessie ... die kwessie van afmeet van bestandele ... dis 'n ding wat al menige aspirant bakker op sy knieë gekry het. Jy het alles perfek gedoen soos die resep aandui en dan op die einde is dit 'n katastrofe. Brood is te dig of die koek is swaar en amper kluitjierig. Ek is seker baie het dit al ondervind en dan summier aanvaar die resep is verkeerd of hulle kannie bak nie.

So leer ek meet

Wel, die groot waarheid is dat meer as 90% van bakkers maak 'n fout met die afmeet van die meel. Baie van julle frons seker nou en dink by jouself ... "Dis onmoontlik ... 'n KOPPIE is 'n KOPPIE en dis al."

Wat ek nou met julle gaan deel het my baie geld gekos om uit te vind en baie flops laat maak wat my laat swets het soos 'n dronk matroos wat vergeet om te koets vir die lae kosyn op die boot ... drie letter woorde, vier letterwoorde, die hele alfabet en dan nog sommer 'n paar paragrawe by vir die effek.

So vind ek myself toe op 'n wintersoggend in Annelien Pienaar se Kook ateljee aan die voet van die Magaliesberge. Vol verwagting en baie opgewonde vir al die groot dinge wat gebak gaan word. Ek staan en kyk hoe sy die werksbank gereed kry en toe draai sy om en kyk my reg in die oë ...

"Meet asseblief vir my een koppie meel af."

Vir 'n oomblik frons ek en dink, is sy lam, sy kan dit mos sommer self doen. Wel omdat ek 'n gentleman is en dit gaan vyf dae wees met my en haar alleen in die kombuis, besluit ek maar om die minste te wees en skep die meel in die maatkoppie. So uit die sak uit en vee dit plat met die sak se kant soos ek ek dit al duisende male gedoen het ... net soos dosyne kokke dit op TV doen, soos my ma dit gedoen het ... my ouma het dit sommer so met die oog geskat of so bakhand uit die sak geskep.

Lekker styf vol koppie

Ek sien Annelien sit a bakkie op die skaal en sy dui met so kopbeweging aan dat ek die meel in die bakkie moet uitgooi. Ewe gedweë doen ek dit en voel baie trots op die 175gr hopie meel ... eerste stappie het ek duidelik reg gedoen. Ek kyk na haar en sy het so effe van skewe glimlag en haar oë vonkel ondeund.

"Hmmm ... en is dit soos jy dit altyd doen ?"

170gr meel

Heel verbaas kyk ek na haar, toe na die hopie meel en toe na die koppie en probeer uitwerk presies waar het ek nou die eenvoudige proses opgedonner.

"Ja ... " Dit was verseker met baie minder selfversekering as wat dit hier op papier lyk en ek staan en wag vir haar reaksie ... jissim, dis mos geen kuns om een koppie meel af te meet nie.

Skep die meel in die koppie

"Ok, wel dan is ek seker jy het al 'n paar lelike flops gemaak met koeke en korse."

Nou was ek nie instaat om windgat te antwoord nie want dis waar, en in my geesteoog sien ek menige flops wat uiteindelik vir die honde of die erdwurms gegaan het.

"Nou wil ek hê jy moet mooi kyk wat ek doen en doen jy dit en weeg die meel weer."

Skraap gelyk af

Sy vat die maatkoppie en 'n eetlepel en begin meel in die koppie in skep. So omtrent vyf eetlepels vol. Toe vat sy 'n palet mes en skraap die die hopie versigtig gelyk.

"Dit is hoe mens 'n koppie meel afmeet." en haar oë vonkel. "Probeer jy nou."

Een vol koppie

Wel om by die punt te kom ... ek het dit drie keer namekaar gedoen en die gewig van die meel was elke keer so tussen 130 en 135gram. Verskoon die matroos in my maar eenvoudige wiskunde het my onmiddelik laat besef dat daar 'n moerse verskil is ... 40gr gemiddeld ... dis 25% ... en dit is BAIE.

132 gram

Sedert daardie oggend in Annelien se ateljee het ek al baie gaan lees oor die ding en op een van die groot kosgroepe waar ek admin is, kom daar voortdurend die vraag op ... hoeveel koppies is een kilogram of iets dergeliks. En die antwoorde verstom my. In 'n onlangse gesprek is daar konsensus bereik dat daar sewe koppies in 'n kilogram meel is. Wel ek is ook ingelig dat dit met die skep en vryf metode afgemeet is. Die persoon kla toe dat die brood baie dig uitgekom het ... nouja ... wat verwag jy ... met die skep en vryf metery het sy heelwaarskynlik so om en by 280gr teveel meel in daai mengsel gesit.

Dit word internasionaal aanvaar dat goeie resepte wat na koppies meel verwys, aanvaar dat jy dit met lepel en skraap proses moet doen. As jy skep en vryf dan gaan jy teveel meel in die mengsel sit. Moenie sleg voel oor SKEP EN VRYF nie want ek sien baie Celebrity Chefs op die TV wat so doen ... weet net dat jy soek vir moeilikheid as jy so afmeet. Enige goeie resep wat werklik betroubaar is, sal altyd gewigte gebruik. Ek het 'n paar goeie boeke oor brood bak en die Chefs weeg selfs die water.

So as jy ernstig is oor jou bakery maak seker jy kry 'n goeie stel maatkoppies, goeie stel maatlepels en 'n elektroniese skaal. Dis 'n klein belegging as jy dit meet teen die moeite en geduld en bestandele wat in koeke, terte en brode in gaan.

Ek som op ...

1 koppie meel SKEP EN VRYF = 175gr Plus minus.
1 koppie meel LEPEL EN SKRAAP = 130gr Plus minus. 5gr heen en weer.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Kombuis - Sakkies met houding

Uie Sakkie

Ek glo dat baie van ons kokers dieselfde siekte het as wat vissermanne het ... die gadgets ... 80% van die kuns ase in die rakke by die winkel vang meer hengelaars as vis ... so ook gaan dit met die goetertjies by die kookwinkels. Die ding lyk absoluut onmisbaar en jy kannie dink hoe jy so lank sonder dit oor die weg gekom het nie en jy koop ... met bewende vingers maak dit oop by die huis en jy gaan in Masterchef Mode in ... en dan maande later as jou goetertjies laai so vol is jy kannie meer jou teesif opspoor nie dan begin jy uitpak en daar lê 'n klomp goed op die tafel wat jou laat wonder of jy op dwelms was toe jy dit gekoop het.

Mooi paartjie

Maar so nou en dan ... dan loop ek 'n ding raak wat my eers baie laat wonder maar uiteindelik swig ek maar voor die versoeking en koop die ding. En dan kom jy by die huis en die nuwe dingetjie kruip diep onder jou vel in.

Nou ja ... onlangs bestel ek weer 'n klompie goed by 'n aanlyn winkel en sien hierdie goiingsak sakkies vir aartappels en uie. Ek lees die beskrywing en dit maak dadelik sin vir my. Die sakkies het 'n voering wat dit donker hou binne in die sak en ek dink terug aan my ouma se groente stoortjie op die plaas. Klein geboutjie onder die appelboom en hy was pikdonker ... ja pik donker. En dis hier waar die aartappels, uie en nog baie ander groentes gestoor was vir die af seisoen. Deesdae gooi ons mos alles in die yskas sonder om te onthou dat ons voorsate het nie yskaste gehad nie en hulle het ook produkte vir a lang tyd gestoor.

Die sakkies kom hier op die plaas aan en die oomblik toe ek die plastiek omhulsel breek, toe kry ek daai bekende reuk van goiingsak. Reuk is mos maar die grootste ding wat ons terug laat dink aan tye wat verby is. Ek raak sommer nostalgies en dop die plastiek sakkie aartappels om in die nuwe sakkie in. Trek die wurgtou styf en daar staan hy ... mooi regop en die aartappels snoesig en veilig in die donker. So het my ouma se sakkies aartappels en uie vir maande in haar groente stoortjie gestaan sonder om sleg te word en sonder om uit te loop.

Hierdie was nou 'n goeie kopie en dit lyk ook sommer spoggerig in my kombuis. Die sakkies is baie mooi en netjies gemaak ... bietjie duur maar nouja ... dis mos 'n Goeterjie en Goetertjies is mos nooit te duur nie.



Die sakkies is beskikbaar by Yuppiechef ... Aartappels  en Uie


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Kombuis - Stel jou Kenwood in

Diep winter van 2015 gaan kuier ek by Annelien Pienaar aan die hange van die Magaliesberge. Kuier is miskien nie die regte woord nie ... sy het ingestem om my op 'n "crash course" te vat in haar kombuis.

Aangesien dit 4 dae van bak en brou sou wees het ek besluit om my Kenwood Chef saam te vat want ek was nie seker of ek vir vier dae aanmekaar sou kon knie en klits nie. Dit was 'n wyse besluit, ons het elke dag vier goed gemaak en so 6 kg meel weggebak in die vier dae.

Kenwood Chef

Ek gebruik my Kenwood nou al so 18 maande en is nogal vertroud met die masjien. Die eerste oggend toe ons wegspring staan Annelien die masjien so en bekyk terwyl hy werk en ek sien sy frons ... ek is egter te besig om regtig aandag daaraan te gee en gaan aan. Na middagete kom sy daar aan met 'n paar "spanners" in haar hand.

"Ek hoop nie jy gee om nie maar die masjien van jou moet so bietjie "getune" word."

Die meeste van julle wat met Kenwoods werk het seker opgelet dat aan die punt van die verskillende spane wat jy kan gebruik is daar 'n as wat in die masjien in druk en so metaal skerm wat die kop van die masjien beskerm teen spattery van mengsels. Wel bokant die metaal deksel sit daar 'n moer. Ek het altyd gedink dat dit maar net eenvoudig 'n sluitmoer is vir die dekseltjie. Jy benodig a 19mm ring spanner.

Sluitmoer

In a japtrap het sy die moer los van die deeghaak en toe sien ek hoe sy die assie draai.

"Die haak van jou is te hoog bokant die bodem van die mengbak ... ek gaan hom nou bietjie laat afsak sodat die haak die deeg beter van die bak se bodem af optel."

Gebruik so moersleutel

Kyk, ek is 'n handige man en ook 'n groot chauvinis maar Annelien se hande vat raak en vat vas en ek kon dadelik sien die vrou weet wat sy doen.

So twee of drie toetsies en toe maak sy die moer vas.

Die res van die middag het daai Kenwood brood geknie dat dit bars en ek kon duidelik sien dat die masjien somer spanne beter vaar met die deeg.

Later die aand toe dit stil word daar op die plaas toe staan ek in die kombuis en verstel die ander drie spane ook.

En so leer hierdie ou ballie toe wraggies meer as net koek en brood bak by Annelien.

Ek stel voor jy kyk mooi na jou masjien en maak seker die spane is op die optimale hoogte. Ek het 'n vadoek in die mengbak gesit en die verstelling gemaak totdat die vadoek net net uit kan trek.

Miskien moes ek die ding se boek beter gelees het.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Kombuis - Houtbakke en houtborde

Ou houtbak

Man Kos en houtborde is eintlik sinoniem. Vir my is hout baie spesiaal en ek raak bedonnerd as ek sien mense verniel hout produkte. Ek raak veral erg befoeterd as ek sien dat hardehout vermors word ... hoekom ... feit is dat daai mens wat daardie hardehout boom afkap kan in sy lewe nooit weer daardie boom vervang nie. Hierdie geit van my kom al van baie jonk af en dit was 'n sterk motiverende ding vir my in die jare toe ek houthuise en houtdekke gebou het. Ryk mense probeer hulle "power" bewys en dan lê hulle skaars inheemse hardehout planke op 'n dek ... sotheid in Suid Afrika ... daardie hout het nie 'n kans in ons klimaat nie en ek gaan nou nie oor die tegniese aspekte praat nie. Feit is, aangeplante dennehout wat reg behandel is sal enige hardehout dek in Suid Afrika met baie jare oorleef.

Onderkant van houtbak

Maar kom ek kom by die punt ... baie van die wat hier lees sal sekerlik 'n hardehout snyplank hê en baie sal ook die eienaars wees van hardehout bakke. Die bakke word langs die paaie verkoop deur smouse en jy kan van dit in snuistery winkels kry. Ek het nie 'n probleem met die aankoop van die goed nie ... die skade is reeds gedoen toe die boom afgekap is ... koop die bord en versorg dit ... dan het die boom nie verniet gesterf nie.

Klaar olie gesmeer

Die waarheid is dat as jy jou houtborde en bakke goed versorg sal dit vir langer as jy bestaan en waarskynlik jou kinders en kleinkinders ook oorleef.

Ek verkies om my bakke by die smouse te koop want hulle smeer nie allerhande selers of vernisse op nie. Die meeste van hulle gebruik gewone vloer politoer. Dis om die ding te laat blink en mooi te laat lyk ... dis die wat ek koop maar verkies eintlik die wat nog rou en vaal is.

Eindresultaat.

Eerste stap as ek by die huis kom is om die bak ordentlik te skroop met warm water en seep en 'n potskuur spons. Raak ontslae van die politoer ... dit gaan jou kos in elkgeval sleg laat proe.

Nou moet jy die bak los dat hy kan droog word ... nie in die son nie ... dis ongesond om so nat bak in die son te sit. Hy kan kraak.

Nadat hy mooi droog geword het, so dag of wat later, kan jy hom begin behandel. Ek doen gewoonlik die onderkant eerste. Gebruik lekker silwerskoon vars Canola olie ... of sonneblom olie ... ek verkies Canola want dis redelik smaakloos en is baie lig in kleur.

Jy het so omtrent een eetlepel vol nodig, afhangende van die grootte van die bak. Gooi die olie op die bak en nou moet jy nie vol fiemies wees nie. Vryf die olie mooi egalig oor die hele bak met jou kaal hand ... nie 'n lap of 'n kwas nie ... jou hand. Maak seker jy smeer dit lekker dik aan en as die hout wit vlekke in het, smeer dit daar meer aan want die wit is gewoonlik sagter.

Nou sit ek die bak so onderstebo in die son vir so 30 minute. Na 30 minute gebruik ek papierhandoek en maak die bak mooi skoon. Vee die olie goed af ... niks natkolle moet oorbly nie.

Nou doen ek die binnekant net soos die buitekant en terug son toe. Dan na 30 minute vee ek die binnekant ook mooi droog met papierhandoek.

Nou is jou houtbak weer fiks en mooi vir die volgend jaar of wat. Doen dit gereeld met jou houtbakke en borde en hulle sal vir jare en jare mooi bly. Jy kan dieselfde doen met jou houtlepels en slaai vurke.

Ek sal gladnie voorstel dat jy olyfolie gebruik nie want olyfolie het 'n kenmerkende smaak en geur en dit wil jy nie in jou houtbakke hê nie. Hierdie spesifieke bak as is meer as 10 jaar in my kombuis en hy gaan nog baie jare diens gee ... net so bietjie liefde en respek.

O ja ...moenie jou houtborde en bakke in die skottelgoedwasser sit nie. Was met warmwater en seep en spoel goed af, maak dadelik mooi droog.

Ek hou altyd 'n halwe suurlemoen handig op die wasbak ... sodra ek klaar is met 'n snyplank, spons dadelik skoon met skottelgoed seep, spoel af met warm water ... vryf met die suurlemoen en spoel af met koue water. Nou is die kans vir slegte reuk baie skraal. Hou jou borde dop, as jy sien hulle begin droog lyk, olie maar weer.

Deesdae kry mens bamboes snyplanke ... hulle moenie geolie word nie en jy kan hulle na die was proses net laat staan en droog word, nie nodig om af te droog met vadoek nie ... jou houtborde moet jy droog maak.

Nog 'n onding ... moenie jou snyplanke in die water laat lê nie. As jy dit doen het jy 'n baie goeie kans om jou bord of bak te laat bars ... of hy bars tydens die lê in die water of as jy hom laat droog word. Hardehout suig nie sommer water nie en as jy hom in water laat lê dan trek slegs die buitenste lagie vog. Dit veroorsaak groot spanning op die opervlak en dis wat jou houtbord of bak sal laat kraak.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Kombuis - Ek maak weer botter

Man Kos ... soos ek al baie gesê het, Man Kos is iets waarvan die manne hou maar baie vrouens hou ook daarvan. In sy fynste essensie is Man Kos vir my, vleis en brood. Maar en dis 'n groot maar, daardie brood word opgeskuif na nuwe hoogtes toe as dit saam met regte lekker vars tuisgemaakte botter op jou bord beland.

Vars Botter

Dadelik kom die vraag dan op ... waar kry ek egte tuisgemaakte botter, ek noem dit spesifiek nie plaasbotter nie want baie min van ons het nog toegang na plase toe, wat nog plaasbotter.

Nou hoe gemaak ... wel, dis eintlik maklik, makliker as wat die meeste mense dink. Maak jou eie. Omskep jou werksbank en so paar eenvoudige stukkies toerusting in 'n botter produksie eenheid.




Al wat jy benodig is ...

Min is nodig

1. 250 ml Room ... Ek koop vir die doel altyd 'n plaaslike produsent se room en nie die Nasionale verpakkers s'n nie. Eerste rede vir die is omdat dit gewoonlik omtrent die helfte van die prys is. Tweedens is dit gewoonlik rou room, aards en word efens suur binne a paar dae in jou yskas. Ek verkies dit dat die room so bietjie "af" is voor ek die botter maak maar dis my persoonlike smaak. Jy kan verseker kraakvars room gebruik.

2. 'n Lekker groot mengbak, ek verkies 'n glasbak maar 'n metaalbak is reg. As jy nou ernstig op die wiskunde wil fokus kan jy die bak ook so 30 minute in jou vrieskas sit voor jy begin want dan sal die koue bak help om die uitgeklopte bottervet gouer te laat klonte maak.

3. Elektriese klitser. Voorheen het ek beskryf hoe ek dit in 'n voedsel verwerker maak en toe laat weet my een kind my ... "Ek het nie so ding nie." So, toe besluit ek maar ek gaan die keer 'n elektriese handmenger gebruik. Die meeste van ons het so iets. Moenie my verkeerd verstaan nie, as jy energiek en fiks is kan jy die botter afskei met 'n draad handklitser ... whisk, vir die van ons wat gewoonweg praat.

4. My vierde stukkie gereedskap is 'n houtlepel met gleufies in. Die is ook maar net my persoonlike keuse hoofsaaklik omdat ek een het. Enige groot lepel kan werk.

Ok kom ons maak nou die botter ...

Gooi jou room in die mengbak en begin klits. Jy sal sien hoe gaan die room deur die stadiums waarvan ons baie lees. Hou maar net aan klits, verby die sagte punte stadium, dis die room wat op nageregte bedien word en die wat nie skrik vir cholesterol nie, dryf so lepeltjie vol op hulle koffie. Dan word dit stywer en dis wat jy op koeke en terte smeer.

Op die regte pad

En dan skielik sien jy dit begin nou regtig styf raak en word droog ... wel dis die stadium waar menige kompetiesie deelnemers die trekpas kry ... nou is dit nie meer room nie en begin erg vetterig proe.

Nou is jy sterk oppad na botter toe ... skielik sien jy die bak is vol krummels en die menger begin kreun onder die vrag. As jy nou 'n klompie vriende oorgenooi het vir skemerkelkies en jy het a klompie bordjies met versnapperings, dan kan jy nou net hier stop ... gooi bietjie sout en rooipeper in en bedien die saak met lekker sout beskuitjies. Sien Man Kos kan stylvol wees. Dis ook hier waar menige Masterchef deelnemer al die pot mis gesit het en die as botter aangebied het ... dis nog nie botter nie.

Amper daar

Maar ons soek botter, so hou aan klits. Hou die bodem van die bak mooi dop, skielik asof in 'n towerslag begin daar so melkerige afskeiding in die bak vorm ... nou is jy amper daar ... dit wat jy sien in die bak is nou wat karringmelk is ... dit was my oups s'n ... ons kinders kon so lepeltjie vol kry maar die bekertjie vol was oupa s'n.

Dis ook nou waar dit morsig kan raak om die mengbak want die karringmelk gaan in sulke misreën druppeltjies rondspat as jou bak nie diep genoeg is nie ... myne is gewoonlik nie diep genoeg nie en dit spat maar lekker.

En daar is dit

Sodra jy dink die meeste bottervet het geskei moet jou ophou klits. Nou kom daar so bietjie spierkrag tersprake. Maak die botter bymekaar met die lepel en pers sovceel vog uit as wat jy kan. Ek druk die botter stewig teen die rand van die bak uit.

Gooi nou die karringmelk af ... moenie weggooi nie ... dis heerlik as dit yskoud is.

As jy wil kan jy nou so twee of drie eetlepels yswater in die bak gooi en deur die botter werk om nog karringmelk uit te spoel ... gooi die spoelwater maar weg.

Volgende maal ek growwe sout oor en meng deur en plaas in die yskas. Jy kan enige ding inwerk om die botter te geur na gelang van wat jy daarmee wil doen.

Heerlike vars Botter

En daar het jy dit ... een botteltjie 250 ml vars room is sowat 125 gram heerlike botter en om en by 80 ml karringmelk.

Al wat nou kort kom is 'n sny lekker vars brood.

Kook lekker tot ek weer 'n storie skryf.


Hier is my Facebook Bladsy ... Man Kos ... like hom as jy wil.

Kombuis - Miet o die pyngedagte

Miet ! ... dis 'n woord wat omtrent elke kok se hare laat orent vlieg en mense in trane laat uitbars. Daai klein wettertjies wat oor jou hande stroom as jy 'n pak meel oopmaak. Hulle lê daar in die spierwit meel soos fennel saadjies en jy wil sommer die geweer gaan haal ... dan besef jy dit gaan nie help nie en jou oë dwaal oor die inhoud van die gifkas ... moord is ligtelike vir dit wat werklik in jou gedagtes omgang.

Goeie houers

Ek twyfel of daar kokers is wat hulleself nog nie in die goedjies vasgeloop het nie. So klein dingetjie wat so groot gemors van jou koskas kan maak. Hulle geliefkoosde rondhang plekkie is meel maar hulle klim in omtrent al jou droë goed in ... rys, pasta, hawermout, koekies, krummels, beskuit, jellies, soppoeiers, koring ens. As hulle daar in is, wel dan is dit maar gooi weg. As jy mooi oplet sal jy sien dis hoofsaaklik produkte wat mielies of een of ander graan bevat.

Daar is ander infestasies wat amper soos die meel mot miet lyk wat ander produkte in ons kombuis aanval maar dis nie dieselfde ding nie. Kerrie produkte kan wurms in kry en ander speserye kry 'n ding in wat die poeier in klonte maak asof dit met spinnekop web gemeng is. Dis 'n tipe swam.

Gelukkig is al die goed min of meer onskadelik vir ons as mense en kan op die ergste tot 'n ligte los magie aanleiding gee vir die meer gekunsteldes. Vissermanne, jagters en bikers kom gewoonlik niks oor nie.

Vanaand skryf ek die storie want die afgelope week of so is omtrent al die kosgroepe op Facebook vol stories oor miet. Ek dink die algemene klimaat maak dit net makliker vir die goed en hulle is besig om mense tot raserny en soms tot waansin te dryf.

So rukkie terug het ek 'n storie geskryf oor die bewaring van die bessies wat ons so ten duurste koop en dan binne 'n dag of twee is hulle poegaai. Bewaar jou aarbeie ... is iets wat jy gerus kan gaan lees.

Nou laat ons fokus op MIET ... eerstens is die woord MIET eintlik nie korrek nie want dit is 'n generiese term vir 'n stadium in baie insekte se lewens. Die MIET wat ons as kokke mal wil maak is 'n stadium in die lewenssiklus van die Meel Mot.

Vir menigte is 'n miet infestasie 'n ernstige refleksie op hulle higiëne en dit maak hulle waansinnig as die goed opgemerk word.

Die van julle wat my goed gereeld lees sal weet dat ek baie keer verwys na WISKUNDE. Nouja kom ons kyk na die wiskunde agter die miet probleem.

Om jou huis, en veral kombuis, miet vry te hou moet jy so paar basiese voorsorgmaatreëls toepas. Net soos met die aarbeie ... doen so klein bietjie ekstra moeite en jy kan jou meel en graanprodukte vir baie maande beskerm.

Dink mooi ... my ouma het na die oes haar meel laat maal en dan was dit in sakkies in die spens gebêre tot die volgende oes. Sy het nie yskaste, vrieskaste of plastiese houers gehad nie. Al wat sy gedoen het was om vyetakkies en stukke kerse tussen die sakkies meel te bêre. Glo my vry ... jy kan vandag nog so werk met jou meel produkte.

Baie kaste met baie deurtjies

Wat is anders in meeste huise as by my ouma ... mees opvallend is al die kaste met mooi deurtjies. Dis die begin van jou probleem want as daar nou ietsie is wat die miet se lewe darem lekker verryk dan is dit 'n donker plekkie. Gaan nou verder en kyk dieper ... daai kas is gepak met goed dat die rakke buig en elke gleufie en hoekie bied skuiling vir die ongediertes.

Genoeg wegkruipplek vir gediertes.

Drie maande terug haal ek 'n pak meel uit my meelkas uit ... dis so deftige swart plastiese krat kompleet met 'n deksel en al. Toe ek die pak meel op die tafel neersit spring my hare orent ... nou kyk vir 'n ou met 'n bles is dit 'n lelike gesig want nou lyk my kop soos 'n takkraal. Ek is nie iemand wat bang is om die nodige kragwoord te tik nie maar ek gaan verseker nie dit hier tik nie want die stroom obsene klanke laat my vrou angstig uit die kamer in die gang af draf. Die ou man klink wild !

"Hier is miet in my meel !" is die afgewaterde weergawe van my woorde aan haar toe sy in die kombuis inkom.

"Kom slaap ... dis al middernag ... ons kan môre in die daglig kyk wat gaan aan."

Nouja ... so pak ek daai kas uit die volgende dag en my bloed kook. Heel pakkies koring en mieliegrys is soliede blokke ... swart en vrot. Ek gebruik Eureka se meel en ek inspekteer elke pak behoorlik. Spoedig is dit duidelik dat die meel niks oorgekom het nie. Die miet wat ek gesien het was onder die flappe van die pakkies maar die pakkies is ordentlik geseël, so die miet was nie in die meel nie.

En nou kom ek by die eerste stap wat jy moet doen om jou kombuis miet vry te hou. As jy daar in die winkel staan ... kyk mooi na daai pakkie meel wat jy wil koop. Dop hom om en tik hom sommer so liggies met die plathand. As hy lêk ... los hom net daar. As hy 'n gaatjie in het is die kanse goed dat hy miet in het.

Tweede stap ... kry vir jou ordentlike plastiese houers vir die produkte wat miet in kan kry. Moenie die gekleurde goed koop nie want jy kan nie deur dit sien nie. Ek het bykans 'n sielkundige probleem met boksies en is 'n ou wat boksies het waarin ek my boksies bêre.

Meel houer met Lourier blare in die meel.

Hier by my is 'n Plastiek Winkel wat houers verkoop van alle groottes en kleure en daar het ek die regte goed vir my kos gekry. Dis vierkantige en reghoekige houers met 'n deksel wat aan al vier kante so flappie het wat die deksel toeknip en lugdig seël. Mens kry dit by omtrent al die winkels wat plastiesehouers verkoop.

Ek koop nie rondes wat soos koekblikke lyk nie want so ronde ding vat teveel plek. Die boksies stapel maklik en pak maklik.

Ek was nou 'n man op 'n missie en ek het die internet deurkruis. My kop het vir my gesê dat miet is nie 'n nuwe ding nie en die oumense moes die goed hanteer het. So paar dinge het gou duidelik geword ...

1. Meeste van die tyd bring ons die miet van die winkel af huistoe.
2. Miet hou van donker plekke.
3. Moenie vir hulle voerplekke maak nie.

Alles mooi oop en duidelik sigbaar.

Volgende stap bel ek my broer en vra hom om my yskas kamer te kom opknap. Ek wou die plek nog altyd as 'n spens ingerig het en nou was dit tyd vir dit. Ons skuif die yskas en vrieskas so bietjie rond en daar kry ek 'n lekker stuk oop muur vir my spensrakke.

Die rakke word mooi uitgemeet en ek maak seker dat dit ruim genoeg is om ordentlike pakplek te voorsien.

Volgende stap is om Plastiek Winkel toe te ry ... nou kyk, dis nogal 'n uitgawe maar as jy dit afspeel teen die koste van kos en die skades wat mens lei dan is dit 'n goeie belegging. En soos die wat my ken weet ... ek kort nie baie aanmoediging om boksies te koop nie.

Die 9 liter houers is perfek vir 2x2.5kg pakke meel. Ek koop ook 'n klompie van 5 liter en so klompie kleineres.

Alles mooi toe en sigbaar

Volgende stop is by my Koekbak Winkel ... Bakers Bin ... en daar koop ek 'n pak Lourier Blare ... Bay Leaves ... ek het so 6 maande terug 'n paar vyebome geplant maar hulle is nog te klein om takkies te gee vir die spens.

Volgende stop koop ek twee pakkie outydse wit kerse.

Nou was ek reg vir die groot oorlog teen die miet. Die oumense se grootste wapens was vye takkies, lourierblare en wit kerse en ek het dit alles. Die plastiese houers is 'n bonus.

Terug by die huis begin ek die kaste in die kombuis uitpak. Alles word sorgvuldig inspekteer en dan in die plastiese houers gesit. Laastens gooi ek so paar lourierblare in die houer en maak toe.

Twee ure later is die rakke mooi gepak en die kaste omtrent leeg. Aanvanklik was my vrou half opgetrek oor die goed wat nou so oop staan maar so paar dae later toe noem sy so terloops dat ons dalk meer rakke in die spens moet insit.

Ten slotte ... moenie dat mense jou stories vertel oor gif nie ... die goed is gevaarlik by kos en amoniak en motballe gaan jou kos laat stink en vreemd laat proe.

Goedkoop en effektief

Dis onprakties om alles in die yskas of vrieskas te pak want die nadeel van dit is dat dit jou meel en ander produkte klam kan laat word. Veral vandag se dae met "loadshedding" ... as daai yskas of vrieskas afgaan dan vorm daar groot hoeveelhede kondensaat op die houers.

So dis eenvoudig ... maak seker jy bring nie die miet huistoe van die winkel af nie. Hou jou goed in lugdigte houers en sit lourierblare in die meel en in die houers. Laastens sit die kerse in jou kaste. Ek breek elke kers in drie stukke en versprei dit.

As jy toegang tot vye takkies het ... gebruik dit.

Sodra jy die voedselbron vir die miet afsny sal hulle verdwyn.

Mense sê maklik jy moet alles wegsmyt ... dis onnodig ... as dit nog in die begin fase is met so klompie wat rondskarrel kan jy dit uitsif ... maar jy sal dadelik kan sien of jy dit kan doen.

Hierdie goed is bekend daarvoor dat dit die Meel Motte afskrik ...
1. Bay Leaves
2. Cedar
3. Lavender
4. Mint
5. Fig Stems

Geniet jou kokery en trap daai miet se gatte vas op die ou boeremanier sonder om jou kos te vergiftig.

Hier is my Facebook Blad ... Man Kos ... Like hom as jy wil.

Kombuis - Bewaar jou aarbeie

9 Oktober - pas gekoop

Vandag gaan ek bietjie gesels oor die bewaring van die duurgekoopte aarbeie. Meeste van ons ken die terleurstelling ... jy betaal ten duurste vir a houertjjie aarbeie en jy sit dit in die yskas vir Sondag se nagereg. O wee ... Sondag maak jy dit oop en al wat daar is, is pap en muf bedekte bolletjies in die bak ... jou bloed wil kook want dis dan skaars drie dae terug wat jy gestaan en wik en weeg het en toe maar ingegee het en gekoop het.

Klaar gewas ...

Nou my ma het my geleer ... "Waste not ... want not!"

Ek gaan julle nou vertel hoe ek my aarbeie bewaar. Die waarheid is dat jy kan alle bessies wat jy koop so behandel. Probleem met my plan is dat dit bietjie moeite verg en uit dure ondervinding het ek al geleer dat luiheid mos maar eintlik die wenner is in die meeste gevalle waar klein dingetjies gedoen moet word.

29 Oktober - 10 dae later

As my ma groceries gaan koop het en sy kom by die huis, dan het sy sorgvuldig elke blikkie, botteltjie of pakkie met a klam lap afgevee want sy wou nie die "vuil" goed in haar koskaste hê nie. Goed wat yskas toe moes gaan is afgevee met a klam vadoek wat in Jik water gedoop was.

Terug by die aarbeie ... gooi so liter koue water in 'n glasbak en gooi dan twee eetlepels asyn in die water.

5 November - geen muf

Dompel nou die aarbeie hier in en beweeg dit goed rond. Haal die aarbeie uit en pak oop op a skoon vadoek. Gooi 'n ander vadoek bo-oor en druk liggies, jy wil die aarbei droog maak maar nie kneus nie. Ek gebruik papier handoek vir dit.

Laat lê vir so dertig minute en dan plaas jy papierhandoek onder in a goeie houer wat lugdig kan toemaak. Pak nou die aarbeie versigtig in die houer in, ek sit die grootstes onder. Moenie die stingels en blare afbreek nie.

Sit nou in die yskas.

Die aarbeie wat ek hier wys was na drie weke nog kraakvars en geen muf nie.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Botter - Maak jou eie

Vars brood en plaasbotter

As daar nou een ding is wat menige boerseun breed laat glimlag is dit die gedagte aan vars brood met plaasbotter. Plaasbotter is deesdae iets waaroor die meeste van ons net kan droom terwyl ons die gekoopte maasa geproduseerde botter skepties aankyk.

Click here for this story in English

My ma het 'n geliefde gesegde gehad ...

"Waste not, want not !"

In die kort gesegde is 'n groot waarheid weggesteek wat deel geword het van my algemene bestaan. Ek is nie iemand wat sommer iets weggooi nie en as ek a leë botteltjie of bakkie sien dan was ek dit mooi uit en pak dit weg wat eendag gaan ek so houertjie nodig kry en dan gaan daar een gekoop moet word.

Vinnig en maklik

Nou by die botter ... ek is dood seker dat meeste van ons al gesien het hoe ons botteltjie vars room sy vervaldatum verbysteek en dan met ergenis dink ... "En wat nou !"

Natuurlik kan jy die suurroom gebruik op aartappels en ander plekke mar die feit bly, die room het suur geword.

Miskien weet baie van julle dit, miskien nie. Daar is 'n baie goeie gebruik vir die suurroom, maak BOTTER !

Dis reg ... maak jou eie botter ... dit vat so 15 minute van jou tyd en so bietjie skottelgoed op die einde maar jy sit met heerlike botter.

Die bonus is dat jy dit kan geur na jou smaak.

Eerste stap ...  gooi die suurroom in jou voedselverwerker. Jy kan natuurlik vars room ook gebruik maar die suur room maak net lekkerder botter.

5 minute

Klits nou op die hoogste spoed tot jy die botter sien vorm. Vat so 5 minute.
Gooi nou so drie eetlepels yswater in en klits weer vir 30 sekondes.

Lekker botter

Gooi die karringmelk nou af ... ja dis reg ... karringmelk.

Gooi weer so drie eetlepels yswater in en klits weer 30 sekondes.
Gooi nou die water ook af ... hou die vog, dis lekker in plaatkoekies.

Skep die Botter in a metaalbakkie en pers dit met a lepel se agterkant. Gooi die vog ook af.

Druk die laaste watertjies uit.

Nou gooi ek so bietjie growwe sout in en werk dit deur. Gooi enige water wat nog uitkom ook af.

Dis die stadium waar jy nou enige geurmiddels kan ingooi, knoffel, peper, rissies.

Skep in 'n klein bakkie en sit in die yskas. Heerlike vars botter uit 'n 500ml botteltjie room wat suur geword het.

Ek kry so 170 gram botter uit 500ml room.

Al wat oorbly is om 'n lekker stukkie varsbrood nader te trek en te glimlag.

Daar is baie maniere om die water uit te pers en mense gebruik kaasdoek, hout perse ensovoorts.

Ek doen dit sommer op my manier en dis vinnig en maklik vir my.

'n Mooi balletjie vars botter.

Jy hoef nooit weer te frons as die room suur geword het nie ... glimlag en trek jou voedselverwerker nader. Pasop net dat jy nie die botter te kwaai klits op die einde nie.

Kook lekker tot ek weer 'n storie skryf.

Hier is my Faceboek Bladsy ... Man Kos ... Like hom as jy wil.