Gewig - Jou lyf is al wat jy het

Ek het al so paar stories oor diete, gewig en gesondheid geskryf. Die wat my ken weet dat ek baie agterdogtig is teenoor dieet foefies en oor die algemeen vertrou ek op die Grotman om leiding te gee.

Sondag - Gebraaide hoender en aartappel

Gedurende Oktober 2016 het ek 'n wilsbesluit geneem om my leefstyl aan te pas. Ek was lelik oorgewig, het pre-diabeties geraak en het verskeie probleme met my hande, bene, voete en rug gehad. In kort, ek was letterlik in my moer in en het besef dat die kanse skraal is dat ek Kersfees 2016 gaan sien.

Op aanbeveling van my oudste seun het ek vir Eli Fourie gaan sien. 'n Merkwaardige man, hy is 10 jaar ouer as ek en sy hele lewe lank betrokke by die Ligaamsbou bedryf. Wat vir my die belangrikste was is dat hy duidelik ou ligame goed verstaan want hy het self een en is in goeie kondisie.

So begin ek met die kastyding, Maandae, Woensdae en Vrydae. Om te sê dat ek sleg was is heeltemal te sagkens gestel en verskoon maar die kruheid, maar feiete is feite en die feit was dat ek ordentlik gefok was. Oor 'n periode van 15 jaar het ek my ligaam verwaarloos en verniel tot op 'n punt waar hy letterlik begin ingee het.

Maandag - Sampioene, hoender en chili roomsous

Die aanvanklike oefensessies was pure hel en ek het my afgesluit van wat ander mense waar kon neem. Ek het die sessies omgewroeg en heeltyd verskonings gesoek om op te gee. Ek dink Eli het heimlik maar net sy kop geskud en deur die motions gegaan ... Goddank bly as die 55 minute verby was. Ek het my 108.5kg lyf met moeite deur die proses gesleep.

Terselfdertyd het ek begin oplet na wat ek eet en het daadwerklik gewerk aan my porsie beheer en dit afgeskaal na wat mens as ordentlik en genoeg sou kon beskou. Geen tweede skeppies nie en versigtig met die fyngebak.

Omdat die porsies kleiner was het begin fokus op smaak en tekstuur om darem die ete so aangenaam as moontlik te maak alhoewel dit baie minder was.

Dinsdag - Mossels Al Fredo

So worstel ek voort maar kan sien dat dinge verander en by Maart 2017 is my gewig af met 4kg. Meer bekangrik is dat ek kon sien ek begin verander in vorm en my klere raak al hoe losser. Ek het nie veel meer gewig verloor nie maar het daadwerklik sentimeters afgegooi. Duidelik was ek besig om spiermassa te vermeerder en dit het die gewigsverlies uitgekanselleer.

Ek gaan nou nie besonderhede gee van my oefenprogram nie, want dis nie belangrik nie. Wat interresant is, is dat ek begin het met Size 42 broek. By Oktober 2018 is ek vas in die roetine van 3x per week gym toe en my broek staan by los 38. En toe laat Oktober sien ek op 'n TV program hoe 'n Hart spesialis verduidelik wat die rol van oefening is vir gewig verlies. In kort kom dit bloot daarop neer dat jy in die eerste 30 minute van oefen vet verbrand, daarna stop dit en jy brand spiere vir energie. Die Sondag daarna sien ek 'n program waar 'n man praat oor die sogenaamde Wolf dieet. In kort is dit maar bloot net 'n Een Maaltyd per Dag ding.

Woensdag - Hoenderlewer, groenmielies en tamatie

Die eerste week in November 2018 begin ek myself dryf in die gym en druk om my roetine wat normaalweg 55 minute neem, in 30 minute in te druk. Dit het 3 sessies geneem en toe is ek daar. Dit was hel en my lyf het dit gevoel maar ek het dit gemaak.

Ek het terselfdertyd begin om my lyf te leer om net een maal per dag te eet. Dit was woes, party dae wou ek mal word en in die nag het ek gedroom van kos. Ek het gekerfde biltong en gekookte eiers byderhand gehou vir die tye wat ek absoluut gek wou word van die honger. Maar ek het vas gebyt en sterk daarop gefokus om my suiker en stysel inname kwaai af te skaal. In wese maar Banting of Atkins.

Drie weke in en my gestel het aangepas en die peusel ding het kwaai afgeskaal tot by die punt waar ek slegs op gym dae so ietsie tussin in geneem het. Vandag is dit 'n leefwyse vir my en ek doen dit sonder enige werklike konsentrasie. Soms eet ek miskien net twee eiers en 'n stukkie roosterbrood vir aandete en daar gaan ek.

Die beste was dat van November 2018 tot Maart 2019 verloor ek gewig van 104.5kg na 90.5kg toe. Broek size is nou 34, iets wat ek in die laat 80's laas gesien het.

Donderdag - Skaaprib met Appel, peer en wortelslaai

Die afgelope naweek kuier ons by ou vriende in Pretoria en natuurlik kom oefen en dieet ter sprake. Hulle is nie heeltemal so seker oor die een ete per dag ding nie. Gisteraand het ek vir hulle fotos gewys van my voorafgaande 5 maaltye. Ek sit die fotos ook nou hier op. Dit is smaakvolle etes en heeltemal genoeg om my 24 uur aan te dryf.

Wat ek geleer het is dat 'n mens nie jou lyf kan opdonner oor 10 of 15 jaar en dan dit wil regmaak in 90 dae nie. Dit sal nie werk nie. Ek het van Maart 2019 tot nou my gewig so rondom 91kg gehou en kan met gemak aanvaar dat dit gestabiliseer is. As ek sou uitskiet dan trek ek net die belt bietjie styf vir 'n dag of twee en die gewig is weer reg. Maak dit 'n gewoonte om jouself een maal per week te weeg en altyd min of meer op dieselfde tyd. Sodoende kry jy nie verrassings nie.

Ek het 'n lewensfilosie ... If you can measure it, you can manage it.

Kyk na die fotos, ek eet vir seker lekker maar ek eet ook smaaklik. Alle souse is met room en varkvet gemaak. Sekerlik nie wat deur meeste mense as dieetkos gesien word nie maar die Grotman in my hou van dit en kan dit hanteer.

Ten slotte, as ek die spiermassa aanwins en beendigtheid vermeerdering in berekening bring dan het ek omtrent so 26kg vet afgegooi. Dis hel baie en dink so daaroor, hoeveel werk moes my hart doen om daardie vet instand te hou, hoeveel stres moes my skelet verduur om daardie vet rond te dra. Dit is net eenvoudig waansin om jou ligaam so te verwoes. Vir myself was dit skokkend om die waarheid in die oë te kyk maar ek is Goddank bly ek het dit gedoen. Ek is vandag gesond, sterk en fiks en op byna 68 jarige ouderdom voel ek beter as wat ek op 48 gevoel het.

So, kyk na jouself sonder emosie en verander as jy langer en gesonder wil lewe. Dis nie maklik nie maar glo my, dis die moeite werd.

Begin iewers en begin klein maar ... BEGIN.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Gewig - Eet lekker maar verstandig

Ek wil iets met julle deel wat nou nie regtig oor kos kook of bak gaan nie maar oor my eetstyl. Ek het in Oktober 2016 besef dat ek nie die einde van daardie jaar gaan sien nie. Ek was oorgewig, my hande en voete was besig om dood te gaan vir sensasie en ek kon beswaarlik uit 'n stoel uit kom. Ek het sleg geslaap en was altyd moeg. In kort ... ek was depressief en vinnig op die afdraande.

Vark vlenters en pap

Ek het by 'n Gym aangesluit en 'n personal trainer gekry. Eli Fourie is self 76 jaar oud en was sy hele lewe lank in die fiksheds en ligaamsbou sektor. Hy verstaan ou mense se lywe. Ek het by hom begin en my gewig was op 108.5kg.

Oorskiet Steak met mielies in roomsous

Met moeite, verskonings en baie kibbel het ek commit na die program toe en na so 3 maande het dit roetine geword vir my. Aanvanklik kon ek beswaarlik een pushup doen ... Vrydag het ek 3x stelle van 15 gedoen. Daar is nog 'n klomp ander goed wat dramaties verbeter het.

Ek het ernstig begin fokus op my eet program. My gewig het geleidelik geval maar volgens my skaal het die vet % verminder en die spiermassa het verhoog. Na 18 maande staan ek toe op 104.5 kg maar het sigbaar baie verander en centimeters het geval.

Repies steak en slaai toebroodjie

In Oktober 2018 sit ek en kyk na Slank op Kyknet en die kardioloog verduidelik toe dat mens se brein na so ongeveer 25 minute 'n hormoon afskei wat vet verbranding blok. Hy verduidelik toe ook dat mens moet probeer om tenminste 10 ure in 24 uur niks te eet nie. Kort daarna het ek na 'n program gekyk waar daar gepraat word oor die voordele van die sogenaamde Wolf Dieet. In kort kom dit maar neer op bykans die banting roete wat my goed pas maar die aanpassing was slegs een ete per dag.

Ek plaas fotos van my laaste week se etes.

Boontjie in pepersous met vark worsies

Ek het oorgeskakel na die wolf dieet toe. In 'n neutedop, ek eet een maaltyd per dag en dis gewoonlik in die aand. Ek eet basies wat 'n wolf sou eet met so bietjie stysel tussen in. My inname van aartappels en brood is drasties besnoei. Ek eet selde rys en ek is goed ingestel op my porsie grootes.

Oor die algemeen eet ek ek waarvoor ek lus kry en as ek in die dag sou honger raak eet ek 'n stukkie oorskiet vleis, wors of steak. Die knibbel porsie is selde meer as 'n appelkoos groote.

Steak tartare met aartappel

Ek het ook my gym sessies aangepas en waar my roetine gewoonlik so 50 tot 55 minute geneem het het ek dit ingekrimp na 20 to 25 minute toe. Dit was hel in die begin maar spoedig het my lyf aangepas en ek was verbaas toe ek sien hoe ek gewig begin verloor. Dit was 'n groot oomblik toe ek onder 100kg kom ... 'n gewig wat ek laas in die 80's gesien het.

Ek voel beter as wat ek in baie jare gevoel het.

Steak en chips

Ek het 4 maande terug begin om daggaolie te gebruik vir spier spasmas en binne 6 dae het die spasmas verdwyn. Ek slaap beter en het baie krag. Ek het vir my 'n Polar Activity Monitor gekoop en poog om my aktiwiteit op datum te hou elke dag. My gemiddelde aktiwiteit 137% van die teiken per dag. Dis die laaste maand se syfers.

Dit was 'n moeilike pad aanvanklik maar deesdae is dit my leefstyl. Ek het byna 12kg gewig verloor en 27.5cm sedert Oktober 2016.

Ek doen baie moeite om die kos lekker te laat smaak en goed te laat lyk op my bord.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Potjiekos - Slowveld 2018

Saterdag 13 Oktober 2018 en die dag breek oor die Laeveld. Ek staan in my kombuis en kyk deur die venster terwyl die ketel aan die kook kom. Ek sukkel om ordentlik wakker te word as ek nie my oggend koffie in kry nie.

Finale aanbieding

Dis 'n grou dag, ligte windjie maar hy het 'n skerp kant en daar is so mistige reëntjie wat nie eers die geute aan die praat kry nie ... net so sukkelende druppery ... amper soos my skoolmaatjie, Fanie ... net 'n gehakkel.

Ons Kookskerm

Ek is nogal gespanne, die Slowveld Potjiekos Kompetisie is bekend vir strawwe kompetisie en uitstekende kos. Soort van die UITHANG potjiekos geleentheid van die jaar. #ManKos neem vir die eerste keer deel en ek weet dat ons te staande gaan kom teen spanne wat gekonfyt is in die potjiekos ding.

So vat ons die pad Witrivier toe. Nie baie geselsies in die motor nie, elkeen maar besig met sy eie gedagtes.

Varkvel Krakers en Kaiings

Met ons aankoms by Casterbridge is dit reeds woelig en almal pak af, pak uit en slaan op. Hier is dit koud en die misreën is bietjie meer manhaftig as by my op die plaas. Dit laat my nogal angstig voel. Die hoofpot is nie regtig 'n probleem nie want hy kook met sy deksel op en die Mashesa stofie sal kan oorleef in so trietsigheid. My probleem is kaiings en varkvel krakers ... dis oop potte met kokende varkvet in en dit gaan nie goed werk as daar water inval nie.

Ons slaan ons kookplek aanmekaar en spoedig begin die rokies trek. Die reën neem die wyk maar die koue bly maar knibbel.

Op 'n stadium het ek gevrees ons gaan nie betyds klaar kry nie maar met toewyding stook en kook die span en 11h50 is ons gereed vir die beoordeelaars. Nadat ek die opdiening gedoen het, haal ek diep asem en ontspan. Nou is daar niks meer wat gedoen kan word nie en ek en Jedske neem die bord na die beoordeelaars toe.

Beoordeling

Lekker Buffalo Bacon Bytes
Varkvel Krakers en Kaiings
Gemmer Varkpens
Vetkoekies
Tuisgebakte Broodrolletjies

Daar was so bietjie groente maar #ManKos is Vleis en Brood 👍

Sukses

Op die oog af het ek goeie tekens gesien tydens die beoordeling en toe is dit verby. Terug by die kookskerm is ek stomgeslaan ... alles is uitverkoop ... 22 porsies. Vir die eerste maal gaan sit ek in my stoel, nou eers besef ek hoe lekker moeg is ek werklik. Zaan en Jedske ruim op en pak die goeters in die kratte ... dankie meisies, julle is sterre.

En toe breek die oomblik van waarheid aan ...

Die amateur wenners van die Slowveld Potjiekos Kompetisie 2018 ... #ManKos

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Potjiekos - Loggers Pub and Grill

Saterdagoggend 7 Julie 2018 skrik ek wakker ... jip, skrik is die regte woord. Dis 05h15 en nog nag. Vir my is dit 'n ongoddelike tyd om op te staan en ek kreun terwyl ek myself sit maak op die kant van die bed. Ons het baie voorbereiding gedoen vir die kompetisie in Sabie maar ek voel hondsleg. Dinsdag teen sononder het my neus begin brand en spoedig het ek geweet dat sulke tyd is ... grieptyd en die moerigheid begin prut in my. Tenspyte van medikasie en wat nog voel ek maar kakkerig vanoggend.

Tafel is gedek

Met 'n ernstige snuif kies ek koers badkamer toe. Vyftien minute later staan ek in die kombuis en staar deur die venster terwyl ek wag dat die ketel moet kook. Dis nog donker buite so ek weet nie hoe die weer lyk nie maar die termometer dui aan dat dit 'n skamele 7C in die tuin is. Nou vir die res van die land is dit warm maar vir ons Laevelders is dit koud.

Jedske en Wiehann en die Kaiingpot

Vanoggend het die koffie nie regtig 'n uitwerking op my nie en ek mompel aanhoudend terwyl ek vir die laaste keer deur my kontrolelysie gaan.

Net na 06h30 daag Wiehann en Jedske op en ons laai die bakkie. Dis nou darem al mooi lig en ek kan sien daar is dik wolke in die suidweste. Die twee jonges is baie opgewonde oor die dag se uitdaging en ek is maar stil en stemmig. In my kop maal die resepte en die tydsberekeninge en ek kyk in die pad sonder om regtig iets te sien.

Net na 07h30 draai ons in die parkeerterrein in by Loggers Pub en Grill ... daar staan alreeds so paar gazebos en ons soek vir ons 'n gepaste staanplekkie. Dis bewolk en koel maar gelukkig geen noemenswaardige wind nie.

Johan en Zaan en die Broodpot

Soos 'n goed geoliede masjien spring ons aan die werk en voor agtuur staan ons gazebo, is die braaiers opgestel en die tafels gedek.

Wiehann is in beheer van die kaiingpot en hy moet so spoedig as moontlik aan die gang kom. Sy pot doen ook die Varkvel Krakers en die Vetkoekies. Hy moet ook die Buffalo Bacon Bits afrond in die varkvet.

Johan is in beheer van broodbakkery en Zaan staan hom by. Hy gaan 'n besige dag met die broodpot hê en weinig kans kry om te ontspan.

Ek doen die hoofpot, Gemmer Varkpens en Jedske staan my by. Zaan en Jedske help ook met die tafel vir die beoordeelaars.

My spanmaats

Elke lid van die span het sy spesifieke take en verantwoordelikhede en almal weet presies wat van hom of haar verwag word. Ons het vrede gemaak met die feit dat die ManKos span nie sommer die prys vir die beste GEES sal wen nie want ons is heeltemal te besig om te kook ... en dis ook reg so vir ons almal ... vir ons gaan alles oor die finale opdiening. Dit moet net die beste wees ... niks minder nie.

Beoordeling

By die middel van die dag prut die potte mooi en die kaiingbak en broodmandjie begin vol raak. Ek voel steeds maar olik maar die dinge loop mooi. Natuurlik befoeter die snotterigheid my smaak vermoë en ek moet sterk staatmaak op my spanmaats om my te lei met die geur van ons disse.

En toe is dit sulke tyd ... 15h15 en die beoordeelaars stap in ons plekkie in. Ons tema vandag is DIE VARK in die Verhaal. Ek lees vir hulle ons Spyskaart Storie en toe staan ons terug en kyk ... reg om vrae te antwoord maar eenkant ... die mense moet tyd kry om te proe, dink en weer te proe. Die algemene opmerkings en die bree glimlagte laat my goed voel. #ManKos span het weereens 'n meesterstuk opgedien.

Teen skemeraand is dit die prysuitdeling en ek is trots om te sê dat die #ManKos Potjiekos Span het hulle goed van hulle taak gekwyt ... Die Wenners van die Loggers Pub en Grill 2018 Potjiekos Kompetisie.

Dankie aan die organiseerders, die beoordeelaars en 'n groot dankie aan my spanmaats ... welgedaan manne en meisies ... julle is tops.

Spesiale dank aan #ManKos se Borge ...

1. ESKORT Butchery Mbombela
2. Corporate Collect
3. Tripwired Clothing
4. ACS Security


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Potjiekos - Canarywalk Corporate Challenge

Potjiekos ... dis 'n ding wat baie mense laat glimlag maar dis ook iets wat baie mense laat frons. Die algemene opinie rondom die tipe kosmaak is dat dinge net ingemoer word en dat die pot basies na homself sal kyk. Dis 'n langdradige proses en in die meeste gevalle net 'n goeie verskoning om te kuier.

Die manne staan bont

So tydjie terug het ek die vraag gevra ... Wat is vir jou lekker van 'n potjie en wat kan jy gladnie verdra nie ?
Wel daar was letterlik dosyne antwoorde en elke antwoord het basies dit bevestig wat ek altyd vermoed het. Laat ek dit net duidelik stel, ek het nog nooit in my lewe werklik 'n potjie gemaak nie ... hoofsaaklik omdat die proses in sy gewilde vorm, gladnie sin maak vir my nie en die resultate is normaalweg maar baie middel van die pad.

Die pot prut

So paar weke gelede nader my seun en twee van sy vriende my en vra of ek wil deel word van hulle potjiekos span wat gaan inskryf vir die Canarywalk Corporate Challenge in Nelspruit. Hulle wou dit graag onder die ManKos vaandel doen. Ek het so rukkie geluister na hulle stories en toe besluit ek ... Hoekom nie, miskien is dit tyd dat ManKos sy toon in die kompetisie wêreld insteek.

Vars broodjies uit die oond

Potjiekos is 'n erg tipiese Suid Afrikaanse benaming maar die werklike kookproses is wêreldwyd bekend. Die vernaamste verskil tssen Potjiekos en 'n Bredie is die feit dat die potjie uit duidelik onderskeibare lagies bestaan waar 'n bredie maar
'n mengelmoes is.

Die volgende paar aande reis ek deur kombuise op Youtube en soek vir iets wat nie net uiters smaaklik gaan wees nie maar ook iets wat nogal kan uitstaan.



En so word die ManKos Varkpens Potjie gebore.

'n Potjie sonder maniere ... hy verlei jou en bederf jou sonder om skaam te kry.

Dan roep hy nog sy vriende ook in om jou verleiding tot die uiterste te dryf ... Kaiings, varkvel krakers en as jy nou genoeg gekneus is dan offer hy jou 'n broodjie met romerige plaasbotter as salfies vir jou bederfie.

Brosgebraaide kaiings

Moet net nie vir jou vrou vertel hoe jy hier gekafoefel het nie ... sy sal nie verstaan nie.

Wees gewaarsku ... daai groot glimlag en vetring om jou bek gaan jou weggee.

Ek drie proeflopies gedoen en toe is ek tevrede.

Kos is op die tafel.

En toe breek die groot dag aan. Saterdagoggend 16 Junie 2018. Ek glo dit was 'n ondervinding vir my 3 spanmaats, Wiehann, Janus en Johan ... ek dink hulle verwagting was 'n dag van pret en jol om die vure rond maar die ouman het ander planne gehad ... net die beste moet gelewer word en geen tyd vir speletjies nie. Ek het so hier en daar opmerkings opgevang wat woorde soos "slawedrywer" "army korporaal" en "blixem" ingesluit het ... die sweet het getap en die manne het gefokus en uiteindelik toe die beoordeling moet gebeur het almal rustig gestaan en geweet ... die Varkpot is goed.

ManKos Potjiekos span het die eerste plek gekry vir die Beste Stalletjie en het tweede gekom met die potjie self. Nie sleg vir 'n eerste maal nie. Daar was 35 spanne wat meegeding het.

Ons oorweeg nou om gereeld aan sule kompetisies deel te neem.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Brood - BoerekosTwist Brood bak kompetisie

Brood ... vir my is dit 'n byna heilige ding. 'n Mens moet eintlik nooit Brood met 'n klein lettertjie spel nie want Brood is waarskynlik die grootste bydraende faktor dat ons as mens sovêr kon ontwikkel. Vir baie jare was dit die stapelvoedsel van die mens en selfs vandag nog is dit bykans ondenkbaar om jouself 'n lewe voor te stel sonder Brood.

Heerlike vars Brood

Min dinge ruk 'n mense se hartsnare soos die geur van varsgebakte Brood en menige van ons het wonderlike herrinneringe van die vars Brood uit 'n ouma se oond ... stomend warm en 'n kors wat kriek en kraak soos die Brood afkoel. Broodbakkers sê dat die Brood sing. En dan daardie magiese oomblik as die broodmes deur die kraakvars kors saag en die krummels en skerwe spat so weg van die broodplank af.

Jy staan en kyk, met 'n mond wat water, hoe die sagte sny op die plank neer sak. Jy sluk vinnig want die kwyl loop nou vrylik. Met vinnige bewegings skraap ouma die ryk geel plaasbotter van die blok af en die waterspatsels vorm druppeltjies teen die mes se lem. Met 'n elegante swaaitjie plak sy daardie botter krul op die warm sny Brood en jy sien hoe die botter sag word en so goudgeel vet randjie om die botter vorm en in die brood in smelt.

Brood met geur en smaak

Hierdie is die gedagtes wat by my opkom as ek aan Brood dink. Dis ook hierdie gedagtes wat my in die Lente van 2016 gemotiveer het om die ou tradisionele suurdeeg Brood proses te bemeester. Winkelbrood het oor die jare so verfynd geraak dat dit bykans geen smaak het nie. Annelien het my baie bemoedig en aangepor om deur te druk met die proses en soos die maande verby gegaan het het my vaardigheid verbeter. Sedert middel September 2016 koop ons gladnie meer Brood vir die huis nie en as ek op reis is en winkelbrood moet eet dan is ek net meer vasberade om dit so min as moontlik te eet.

Dons sagte Toebroodjie

So kom dit dan dat ek die advertensie sien vir die Boerekos Twist Brood bak kompetisie en ek sit en wonder. Ek is nie erg oor kompetisies nie maar dit prikkel my nuuskierigheid en ek lees meer. Wat my dadelik opval is die feit dat die aanbevole resep kitsgis gebruik ... vir my is dit effens negatief want ek het nou al gewoond geraak dat Brood lekker sterk geur en smaak kan hê. Ek haal Annelien Pienaar se Boerekos met 'n Twist boek uit my boekrak uit en spoor die resep op. Uit ondervinding weet ek dat Annelien se brood resepte goed is en dat mens dit kan volg sonder enige spanning. Die kompetisie noem dat jy die resep kan "Twist" en ek sit en wonder. Siende dat dit 'n effe verrykte deeg is, is daar moontlikhede ... maar vir my, en dis baie persoonlik, is die meeste "Twists" op brood wat ek sien, so vêr van Brood af dat dit einlik koek is ... dit is vir my nie 'n opsie nie.

Heerlike French Toast

Net daar besluit ek dat my "Twist" moet die Brood die "Hero" hou van die verhaal, geen tierlantyntjies, bolletjies, balletjies, stafies of plaatjies nie ... nee, doodgewone tradisionele Brood maar met 'n bevonkte smaak.

Omdat Brood die Held van my skepping moet bly is dit ook vir my belangrik dat die Brood baie veelsydig moet wees ... met ander woorde die Brood moet vele baadjies kan aantrek en steeds die ster van die ete bly, alhoewel dalk net 'n ondersteunende ster.

Kraakvars korsie en sag binne Roosterbrood

My eerste uitdaging is om die kenmerkende geurige smaak van suurdeeg Brood in die kitsgis brood te kry. Terselfdertyd moet ek die tekstuur bewaar en my brein werk oortyd. Ek maak my yskas oop en kyk na die bestandele wat ek gereeld in my beskuit en Brood gebruik.

Ek lees die resep weer en besluit om die melk met dubbelroom, vol vet Griekse Yoghurt te vervang. SPAR het 'n nuwe variasie met Aalwyn in en dit is wat ek vat. My heuning is rou Fynbos Heuning en ek gebruik Himalayan Pienk Sout.

My volgende variasie is op die meel en ek meng 25% Millstone Volgraan met 75% GWK Ongebleikte Koekmeel. My doel is om 'n tipe Plaasbrood te bak en ek soek bietjie sterker gluten strukture in die brood want ek verwag hy gaan hoog rys.

Met my metode, volg ek min of meer die suurdeeg paadjie en 3 ure later kom die Brood uit die oond uit. Na my beskeie mening het die brood baie goed uitgekom en ek is hoog in my noppies met die kors kleure. Toe ek die Brood uit die pan lig en op die rakkie sit, sing hy mooi en ek glimlag van oor tot oor. Ai hoe bitter graag sou ek nou so snytjie hiervan met my ouma wou deel.

Al wat nou oorbly is om geduldig te wag dat die Brood afkoel, dis belangrik want die Brood bak nog steeds vir 'n tydjie na jy hom uit die oond haal en as jy te gou sny kan jy die brood se tekstuur bederf.

Vars Brood en botter

Met groot verwagting plaas ek die Brood op my snyplank, die Brood is lekker pofferig en die korsie voel krakerig ... baie versigtig kry ek my merkie reg en trek die lang mes oor die kors. Vir 'n oomblik veg die korsie terug maar die skerp tandjies wen die stryd en die blink lem sak in die brood in ... met elke haal vlek die Brood verder oop en met genoegdoening sien ek hoe die sny op die broodplank val ... heerlik lig, sag en die geur is wonderlik. My ouma sou waarlik trots gewees het op hierdie kleinseun van haar.

Ek sny nog twee snye en toe haal ek die botter uit en 'n botteltjie van my tuisgemaakte appelkooskonfyt ...

Byna gewetenloos skraap die bottermes deur die bakkie en die lem skil 'n ordentlike reep botter af ... in my geestesoog sien ek hoe Poppie ril en ek lag hardop ...

"Die Brood soek botter, ordentlike botter en botter in oormaat."

Mooi kors

Met mening plak ek die botter op die Brood neer en met groot genoegdoening sien ek hoe die kinkels uitsak van die hitte ... die geel botter suig neer op die snoesige Brood en onwetend knik ek my kop.

Die appelkooskonfyt klou halstarig aan die lepeltjie, amper asof dit vrees vir wat voorlê maar die halstarrigheid is weerloos teen my vingerpunt. Versigtig versprei ek die oranje konfyt oor die sny Brood, versigtig om nie die sagte boter weg te skraap nie.

Ek lig die Brood op en ruik versigtig, nee, aandagtig is 'n beter woord ... die geure is wonderlik. My mond water behoorlik maar ek moet myself nou eers beteuel want daar moet fotos geneem word. Amper geiriteerd doen ek die foto ding en dan kan ek ontspan ... ek lig die snytjie op en 'n heerlike geurmengsel vul my brein ... ja, my brein ... die eerste hap ... die korsie bied weerstand maar ek verskuif my voortande en ... HEMELS ... natuurlik is die appelkoos eerste op die tong en dan verdof dit ... die botter smeer my verhemelte en ek stop om te kou ... nou wil ek net proe ... en dan proe ek dit ... die wonderlike kakafonie van koringmeel en die byna pikante yoghurt nasmaak.

Oor die volgende dag beproef ek die Brood as ...

Roosterbrood en dit is heerlik. Kraakvars korsie en lekker sagte binnekant.
French Toast en die sagte brood slurp die eier op. Heerlike sagte geurige Broodjie.
Toebroodjie wat sag en is en maklik eet, ek het grondboontjie botter en appelkooskonfyt opgesit.

Metgesel by Hoenderlewers

Ek het ook die Broodjie as metgesel gebruik vir romerige hoenderlewertjies met 'n peper sous. Die Brood het sy ondersteunende rol skitterend gespeel en elke druppel van die sousies opgeslurp.

Laastens het ek die Broodjie ingespan by ontbyt. Die roosterbrood het weereens die sagte eiers mooi ondersteun en die hele maaltyd afgerond.

Afronding by ontbyt

Vir my is die doelwit bereik. Die is 'n veelsydige Brood en is vinnig om te bak ... so om en by 3 ure van begin tot hy uit die oond kom. Ek het die uitdaging geniet..

Wow ... die is 'n heerlike Brood en in my gedagte 'n wenwaardige Brood.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Koekedoor - Terte inspireer my

Nouja, Koekedoor is nou mooi aan die gang en van die oudstryders het in die stof gebyt. Ek het nogal gedink die drie gaan die pyp nie rook nie. Die pas is net eenvoudig te moordadig vir die meer senior koekmakers ... niks te doen met hulle vaardigheid nie ... net doodgewone hoë druk en stamina.

Sitrus Yskastert

Die wat my ken weet ek is nie 'n tierlantyntjie koker nie, nee, ek doen die basiese dinge en ek doen dit so goed en met soveel smaak as moontlik. Wat ook waar is, is dat ek altyd in Koekedoor soek na iets wat ek kan aanpak.

Donderdagaand pak hulle hulle toe goed aan wat ek verstaan en kan maak. Mari-Louise se twee terte vang my verbeelding vas en veral die Lemoentert. Daai pragtige lemoen skywe roep my soos 'n hans lam.

Saterdag middag besluit ek om die  ding aan te pak en begin met die lemoene. Ek wil soet lemoenkonfyt maak en het nog altyd teruggedeins vir die proses. Nou het ek nie 'n keuse nie, ek soek daai tert en om hom te kry moet ek lemoenkonfyt hê.

Laat Saterdagnag is die konfyt gebottel en 'n lekker bottel ekstra stroop is in die yskas.

Sondag pak ek die tert aan ... ek gaan hom nie bak nie maar as 'n yskastert doen. Ek gebruik een van Nina Timm se yskasterte as riglyn en bou die een. Lekker goeie koppie vol van die lemoenstroop in die beslag en daar gaan ek.

Laataand sit ek weer en kyk Koekedoor en besef ek moet nou daai dun lemoenskyfies maak wat op die tert gebruik word ... my konfyt gaan bietjie lomp lyk dink ek. So spook ek agter die pan vir omtrent 'n uur en toe gaan slaap ek.

Vanoggend vroeg vat ek 'n blaaskansie en rond die tert af. Goeiste maar hy is lekker.

Vir my lyk hy mooi, onthou ek is nie fyngebak man nie ... ek braai groot stukke vleis en bak menere van brode.

Dankie Koekedoor ... julle inspireer my.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Koekedoor - Dinge begin kalmeer

Koekedoor Beoordeelaars

Hierdie is nou nie iets oor kos maak nie maar Man Kos hou van lekker TV en kosprogramme is baie aantreklik vir my. Koekedoor is mos Afrikaans en ek hou daarvan.

Tot op hede het ek myself weerhou om enige iets te sê oor Koekedoor. Ek het wel hier daar 'n paar opmerkings gelees en ek het ook 'n paar kwetsende brokkies gesien.

Miskien is dit die biker in my wat my goed geleer het dat jy nie jou bêk rek na die eerste draai in 'n bergpas nie ... nee jy bly stil en fokus want jy weet nie hoe lyk die volgende een nie.

Nou het ek episode 3 klaar gekyk en ek voel gemaklik om my ervaring te deel.

Mens kan duidelik sien dat die deelnemers en die beoordeelaars nou in die swing van die ding ingekom het en almal is meer gemaklik ... sommiges senuweeagtig gemaklik maar gemaklik. Die oordadige gegiggel is weg en die mense fokus ... niks soos 'n slagtery om die gekekkel hok te slaan nie

Ek het nog te min van die deelnemers gesien om regtig 'n gunsteling of twee uit te sonder maar wat wel duidelik is, is dat die ou girls nie die pyp gaan rook nie ... ek dink die fisiese eise van die kompetisie is te erg vir hulle.

Lyk my of die haan onder die henne sy man staan en sy teenwoordigheid goed laat voel. Die ou se hart is in die bakkery en ek kon vanaand sien sy siel gaan in daai Kenwood in ... keer op keer.
Dis seker nodig om waaghalsig te wees in die kompetisie maar as ek gewone wiskunde in die prentjie bring dan is daar geen formule waar dit na 'n goeie plan lyk om 'n roomyskoek te maak nie. 'n Hele paar se skeppinge het voor hulle oë weggesmelt. Die wat hulle roomys in bakkies aangebied het, het goed gedink.

Nou so bietjie oor die program ... hierdie tipe programme se werklike waarde vir die kykers lê in die geleentheid om te kan leer en dis waar ek dink die Engelse se koek storie ons Koekedoor bietjie in die stof laat byt ... met die vorige reeks het ek eenkeer daaroor geskryf en ek gaan dit nou weer doen ... deel julle beoordeelaars se kennis meer met ons. Ja dis sekerlik kykpret om te sien hoe spartel die deelnemers maar sekerlik kan julle so paar minute afknyp dat die beoordeelaars hulle menings met ons deel en ons vertel hoekom goed skeef loop ... daar was vanaand wel a goeie skeet van dit met die perskekoek maar julle is maar suinig.

Nouja ... ek sien uit na volgende week.

Ek wil darem graag dit net noem ... Mari-Louis het vanaand pragtig gelyk. Vir my was haar grimering baie mooi, amper bedeesd maar met so pikante wulpsheid wat in sprankel ontaard het sodra sy begin lag ... man, dit was vir my so opvallend.
Dankie Errieda ... dis lekker om na die program te kyk en te wonder of ek ooit so iets sal kan maak ... vir nou bly ek maar by die brood.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Humor - Kombuismaniere

Laat in 2013 beland hierdie stukkie galbraak in my posbus en vanoggend maak ek bietjie posbus skoon en lees dit weer. Dis so goed geskryf dat ek wil deel en bewaar ...

Geniet hom ...


"Die kombuis by my werk is een van daardie plekke wat ‘n venster oopmaak op die menslike psige wat eerder toe moes gebly het. Oor die algemeen is ek nie mal oor die mensdom om mee te begin nie; vyf minute in die klein kombuisie op ons vloer en dit voel vir my dat dit miskien weer tyd is vir 'n handige verwoestende plaag wat so bietjie die bevolking uitdun.


Dit is nie net die spons – wat lyk soos 'n nalatenis vanuit die oertyd en partykeer vir mens grom as jy probeer om hom onder die kraan in te stoei – nee, dis nie net daai spons wat my laat dink dat meeste mense se ouers hulle duidelik nooit basiese higiëne of maniere geleer het nie.


Dit het ook te doen met die feit dat sommige mense dink dat dit helemal sosiaal aanvaarbaar is om die laaste bietjie water in die urn te gebruik en dit dan net so te los, kurkdroog en terwyl hy nog kook – net sodat die volgende persoon, wat tot dusver 'n heerlike oggend gehad het en wie se geloof in die goedheid van sy medemens stadig besig was om weer in sy binneste te bot en wat net 'n lekker koppie koffie wou gehad het om die dag mee te begin, eerder ontdek dat die urn weereens uitgebrand het en hy moet wonder of hy ooit weer sal kan sien terwyl hy deur die kokende stoomwolke steier om die plug af te sit.


Nog 'n faktor wat 'n belangrike rol speel is in hierdie scenario is hoe sommige mense blykbaar nie die konsep van suikerlepels begryp nie. Hiermee bedoel ek die tipe mens wat, ten spyte van die feit dat die lepel in die suikerpotjie lê, dit sal uithaal en dit vir hulle koffie gebruik, selfs om hulle koffie te roer en dit daarna TERUGSIT IN DIE SUIKER.


Ag shamepies, die lepel wat klaar in hulle besit is en op daardie oomblik teen die kant van hulle koppie rus is tog net te kosbaar en fragiel en moontlik ‘n erfstuk en is eintlik maar net daar om mooi te lyk en so af en toe die lig op ‘n estetiese manier te vang sodat mense hulle kan komplimenteer in hulle keuse van eetgerei.


Ek het al nagte omgelê en dink aan wat ek sal doen wanneer ek die persoon(e) vang wat sulke blatante haatmisdade pleeg. Die algemene konsensus blyk te wees dat ek ‘n halssnoer sal maak uit die verantwoordelike party(e) se interne organe en dan die res van hulle sal gebruik om ‘n groot tenk koffie te roer en daarna in ‘n silo vol suiker te gooi terwyl ek skree: “Wat ‘n roerende verhaal! Jy roer my hartsnare!” en ander sulke pittighede.


Daar is ook ‘n sekere tipe persoon wat dink dat ‘n vadoek vir alles – van vloere-vee tot neus-blaas – gebruik kan word. Dit word ook nie gedoen om die vadoek terug te sit waar jy hom gekry het nie. Nee wat, jy gooi hom sommer so in die hoek van die kombuis, daar in die donker waar hy kan lê en muf en nuwe vorms van lewe tussen sy klam voue kweek.


Daar is selfs die tipe mens wat skielik oorval sal word deur ‘n lus vir ‘n paar gekookte eiers en dan sal besluit om die urn te gebruik vir ‘n doel wat definitief die waarborg sal kanselleer. Ek sal nooit die uitdrukking op my baas se gesig vergeet toe sy groen om die kiewe vir my kom vertel wat sy ontdek het toe sy wou loer of die water al kook nie. Iemand het ‘n kous, wat vermoedelik oomblikke vroeër aan ‘n voet was, gevat en twee eiers daarin gesit en die toe in die urn gesit om te kook.


Ek dink nie daar is enige temperatuur waarteen mens die water kan kook om daardie urn skoon te kry nie. Ons het die menslike ding gedoen en die urn uitgevat in ‘n klein straatjie langs die gebou en hom geskiet en toe die oorblyfsels verbrand.


Dit gaan ook die verstand te bowe waarom sommige mense dit korrek en goed vind om jou kos te steel. Los mens ‘n bietjie melk in die yskas, of selfs net ‘n ou botteltjie water, kom een of ander analfabeet langs en eien dit hulself toe. Dit is hoekom ek nie eens my kos in die mikrogolf warm maak nie. Jy weet nie of dit nog daar gaan wees wanneer jy weer die deur oopmaak nie.


Maar dis reg, my wraak sal verskriklik wees om te aanskou.


Ek wil tog so graag eendag daardie trick probeer waar mens bietjie Brooklax in melk of iets anders sit, dit dan in die yskas los en dan uitkyk vir die persoon(e) wat baie benoud lyk en elke 2 minute toilet toe hardloop. Ek wil foto's van hulle neem soos wat hulle aan die toilet se mure vasklou en bid vir verlossing en dit dan op die internet pos.


Name en shame, bliksem, name en shame."

Mieliepap - Man Kos en GWK se Braaipap

Ek het die lofliedere van lekker mieliepap alreeds goed besing en dis opgeteken in van my vorige stories oor mieliepap.

GWK 100% Braaipap

Vir my is mieliepap een van daardie dinge wat my altyd met nostalgie vervul en ek het duidende kinderdae drome oor mieliepap. Ek dink die hedendaagse jeug verstaan nie altyd baie mooi oor hoe arm was baie van ons ouers nie en hulle sien net die dinge soos dit vandag is.

Pure Mieliemeel

Ek onthou baie dae in my kleintyd waar mieliepap die hoofbron van voedsel was op die tafel en enige iets wat bygekom het was pure bederf en groot bonus.

Lekker vir ontbyt

Oor die jare het meel nogal verander en van die sewentigs af was die super fyn mieliemeel aan die orde van die dag. Tydens die groot droogte in die sewentigs het ons weer geel meel gekry en dit was vir my baie lekker. Maar toe word dinge weer beter en die geel meel verdwyn. In die laat tagtigs het ons in Natal die eerste Braaipap op die winkelrakke gesien en dit was fantasties ... lekker grof en semels duidelik sigbaar. In my huis was dit al mieliemeel wat gebruik is en nie net vir braai nie.

'n Mooi pot pap

Ongelukkig het die braaipap met tyd al hoe fyner geword en teen die middel negentigs was die braaipap op die winkelrakke maar redelik fyn en weinig verskil van die gewone fyn mieliemeel. Ek het van tyd tot tyd so hier en daar 'n sakkie growwe meel in die hande gekry in van die kleiner plattelandse dorpies waar daar 'n meule was maar dit was maar met rukke en stote.

So paar jaar terug toe verskyn daar weer 'n toegewyde braaipap op die toneel en hulle adverteer wyd en suid en dryf die produk op Facebook. Ek kry van dit by my SPAR en ek is woes beindruk met die meel. Lekker grof en dit maak heerlike pap. Ek is tevrede en my mieliepap laat my weer breed glimlag. Maar soos met baie produkte het die produk ook deurgeloop onder verwaarloosing, altans hier in die Laeveld en spoedig is dit nie meer by SPAR nie en net so hier en daar by 'n Slaghuis. Dit was terleurstellend vir my en my mieliepap etery het weer afgeplat en aartappels het die hoofrol gespeel in stysel in my kombuis.

Vroeg in Desember 2015 kom ek toe op die produk van GWK af op Facebook - 100% Braaipap. Hulle adverteer dit as 100% Braaipap en dis verkrygbaar in 4 tipes.

1. Lekker Grof
2. Bitter Grof
3. Rof en Grof met Semels
4. Geel Meel

Pap en maalvleis

Die verpakking is in regte egte meelsakkies en is gemerk 5lb ... daar is blykbaar ook 10lb sakkies beskikbaar. Ek doen navraag en na verskeie boodskap verwisselings beland die meel toe hier in my kombuis. Die verpakking laat my sommer dadelik na my ouma verlang en met 'n bree glimlag soek ek die die regte kant uit van die sakkie om die toutjies te laat ontrafel. Ai hoe onthou ek die dae op die plaas waar ek menigmaal gestaan en kyk het hoe my ouma die sakkies met haar krom vingers oopgetrek het. Die garing is versigtig opgerol want in daai dae is byna niks weggegooi nie.

Pap en Hoendervlerkies

Ek het die Rof en Grof met Semels eerste oopgemaak ... en ek staan en kyk na die inhoud. Dis regte egte mieliemeel die en ek vroetel met my vingers in die meel ... daar is baie tekstuur en die semels is duidelik sigbaar ... dit is mos "Man Kos" die dink ek terwyl ek my pappot op die stoof sit.

Pap en Skaapafval

En so begin my ontdekkingsreis in die wonderwêreld van GWK se Mieliemeel. Vir die volgende vier weke het daar byna elke aand 'n pot pap op die stoof gestaan vir aandete. Sels op oukersaand. Ek het al die tipes meel getoets en het slappap, putu en krummelpap gemaak. Ek het elke denkbare metode van pap maak uitgetoets en neergeskryf, hordes fotos geneem en oor en oor getoets. Ek het die mieliemeel werklikwaar deur die meule gedruk in my kombuis.

Lekker Putu

Die belangrikste ding wat baie vinnig duidelik geword het was die feit dat die grofgraad van die meel verseker die tradisionele maniere van papmaak so bietjie omkrap.

Eerste ding wat gou duidelik geword het is dat die meer stywe pap verseker langer vat om gaar te word as die meel waaraan ek gewoond is.

Superfyn Krummelpap

Tweede ding is dat die meel se growwe aard vereis meer water omdat daar baie meer tekstuur is wat vog trek.

Derde ding wat duidelik was is dat jy sal jou sout moet vermeerder en dit gaan vir my hand aan hand met die feit dat mens meer water moet ingooi.

Krummelpap en lekker sous

Die geel meel was vir my die grootste uitdaging. Die meel is nie grof nie maar helder geel en my eertse poging was 'n redelike flop. Met 'n ergerlike knor onder my snor deur het ek die pap uitgekrap in die emmer in wat vir die voëls gevoer word en my vrou het half geammuseerd gestaan en kyk hoe ek stoom.

"Man moenie so opgewerk raak nie ... dis net pap."

My gunsteling ... die brandsel

Kyk, sy het goed bedoel maar vir my was dit soos 'n rooiwarm yster in my agterstewe in ... ek haat flops ... met ingewikkelde disse is flops gewoonlik redelik naby maar met 'n eenvoudige ding soos pap ... goeie genade ... dis nou 'n "epic fail" soos my oudste sou sê.

Wat was dan fout ... wonder jy seker nou ... wel die pap was taai en daar was verseker te min sout in.

Die tweede poging het ek egter mooi geweet wat loop verkeerd en het my resep en metode ernstig aangepas. Die geel meel soek meer sout en verseker baie langer kooktyd. Normaalweg is my pap reg na so 75 minute ... die geel meel het na twee en half uur eers reg gesmaak vir my. Nou wil ek net byvoeg, my Poppie is nie 'n groot papeter nie en ek was verbaas toe ek sien sy gaan vir 'n tweede porsie van die geel pap en later toe sien ek sy peusel weer daar uit die pot uit.

"Jis maar die is baie lekker pap."

Nouja ... vir my was dit baie lekker maar om die woorde van my vrou te hoor is die grootste kompliment vir die geel meel.

Maak nou regtig nie saak wat die meeste mense sê nie ... pap maak is 'n kuns, ek meen nou, goeie pap. Meeste mense dink pap maak is speletjies en selde word daar ordentlik gemeet en dinge word so op gevoel gedoen. Wel, good luck met daai metode ... ek werk met maatbekers en ek kan keer op keer presies dieselfde resultaat kry.

Om lekker stywe pap of putu te maak gebruik ek 2 koppies meel en 3 en 1/2 to 4 koppies water saam met die GWK Braaipap ... hoe growwer, hoe meer water. Sout is so om en by een teelepel maar die geel meel soek meer sout. Dit lewer genoeg pap vir vier mense. Gebruik groter of kleiner koppies vir die afmeet maar hou die verhouding soos dit is. Sout moet jy aanpas na smaak maar pasop vir te min.

Na baie potte pap is ek nou gemaklik met die GWK Braaipap en my eie persoonlike voorkeur is om een en half koppies van die gekose grofgraad meel te meng met 'n half koppie van die geel meel. Dit is vir my baie lekker en die pap lyk mooi. Ek vervang ook van die water met melk en dit is baie lekker. Ek sit standaard twee eetlepels botter in my pap se water waneer ek dit kook.

Ten slotte ... die GWK Braaipap is van die lekkerste meel wat ek ooit gebruik het vir pap en ek hoop werklik dat die produk wyd en suid beskikbaar gaan word. Die prentjies op die sakkies is kostelik maar ek dink dit gaan verwarring skep by die publiek. Die meel soek 'n sterk handelsmerk om dit te laat uitstaan en om volgelinge getrou te maak.

Doen moeite ... soek vir die meel en jy sal moontlik nooit weer met ander meel tevrede wees nie

Ek hoop die storie laat jou met nuwe oë na mieliepap kyk. Hierdie spesifieke meel het 'n baie lekker tekstuur en 'n baie lekker geur. Tans is dit die beste Braaipap wat ek ken.

Nog Pap Stories:

Mieliepap - Iets wat ons almal ken
Mieliepap - Rof en Grof met Semels
Pap - Plaatkoekies met Houding 
Pap - Krummelpap kan Stylvol wees 
Mieliepap - Laatnag Snaxie 

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.