Wild - Bielie van 'n wilde Frikkadel

Vandag se storie gaan oor iets wat ny na aan die hart lê ... wildsvleis. Maar vandag gaan ek spesifiek oor maalvleis praat. Ons is gelukkig in die land om so baie wild te kan hê maar dis vir my so verstommend oor hoe min mense regtig wildsvleis eet. Sommiges is sommer neusoptrekkerig as dit by wildsvleis kom.

Danksy al die kookprogramme op televisie en op die radio is daar 'n groot oplewing in die belangstelling van kos voorberei.

Dit is vir my fantasties want mense soos Dine van Zyl, Hetta van Deventer Terblanche, Errieda du Toit en Anel Potgieter grou die ou hartskos resepte uit en sit dit voor ons neer. Wat my meer opgewonde maak is die feit dat dit in Afrikaans gedoen word. In Dine se jongste nuusbrief sê sy ...

"Ek weet jy praat Afrikaans. Ek weet jy praat dit dat die spoeg so spat. Dis reg so, ons taal het ʼn kwylbek klank."

Heerlike Man Kos

Wildsvleis is nie volksvreemd vir ons nie maar baie mense het 'n heeltemal verkeerde idee van hoe dit regtig proe. Iets wat my sommer rooi laat sien is as iemand vra ... "Hoe kry ek die wille smaak uit die vleis uit."

Goeiste mens, dis dan wild, hoe dink jy nou moet die smaak wees ... wil jy dit soos hoender of skaap laat proe ... dan is dit beter gaan koop hoender of skaap en gee die wildsvleis vir my.

Deesdae sien ek by baie winkels dat daar wildsvleis is. Party winkels het baie snitte, snitte wat ons ken uit die bees en skaap etery uit. Dis goed so want dit gee jou dadelik 'n aanduiding van watter rigting om in te slaan met die kokery.

Meeste plekke het maalvleis en die pryse is baie goed in vergelyking met skaap of bees. Iets wat jy moet onthou is dat wildsvleis as 'n reël nogal droog kan wees want daar is nie eintlik vet aan die bokke nie.

So koop ek toe 500 gram wilds maalvleis. Poppie loer my so onderlangs aan en ek kan sien sy is lus om te vra wat my plan met dit is maar sy bly liewer stil. Ok maar goed so want my Poppie is erg agterdogtig as dit by vreemde vleis kom. Sy kan egter maar ontspan, ek het 'n duidelike plan met die maalvleis.

By die huis gekom is dit reguit yskas toe met die bakkie vleis. Dis vroeg en ek wil die dis vir aandete maak.

Vanaand gaan ek 'n vleisbrood maak ... dis maar dieselfde ding soos 'n frikkadel maar die is net een helse groot frikkadel.

Nou die wat my ken weet dat ek nie baie spesifiek oor resepte skryf nie maar eerder oor hoe ek die ding gemaak het. Hierdie is maar weer dieselfde. Jy gaan die vleis geur met speserye waarvan jy hou en wat jy ken.

Man Kos Bielie van 'n wilde Frikkadel:

500 gr Wilds maalvleis
250 gr Hoender Hartjies
250 gr Repies Spek - Streaky Bacon
1 Ui in blokkies gekap.
1 Koppie Gedroogde Cranberries. (Sultanas werk ook)

Basiese Geurmiddels ...

1 Teelepel Gemaalde swartpeper
1 Teelepel Koemein
1 Teelepel Rissie vlokkies
1 Teelepel Robertsons Pimento Allspice
1 Teelepel Robertson Chicken Spice
1 Eetlepel Bruinsuiker
1 Eetlepel Worcestershire Sous

Eerstens moet jy die hartjies deurkyk en as jy van hulle sien wat nog so klossie aartjies aan het, sny dit af en gee vir die hond. Moenie die vet afsny nie want jy het dit nodig, die wildsvleis is baie maer.

Volgende pols die harte so twee of drie keer in jou voedselverwerker. Anders kan jy dit fyn kap met 'n skerp mes. Jy wil dit nie pap maak nie, net fyngekap.

Maalvleis mengsel

Hou jou spek eenkant en gooi al die ander goed saam in 'n mengbak. Nou is nie die tyd om vol fiemies te wees nie. Klim in met jou hande en meng die spulletjie baie goed. Werk dit met jou hande tot jy voel die die mengsel raak taai. Soos jy seker opgemerk het, ek gooi geen brood of eiers in nie, sommige mense noem dit bindmengsel maar ek dink dit is net goed wat jou van geur gaan beroof. As jy die vleis goed gemeng het sal dit mooi bind as jy die frikkadel begin maak.

Jy het ook seker opgelet dat ek geen melding van sout gemaak het nie. Dis doelbewus want baie van die goed wat ingegooi is het sout in.

Doen die toetsie

Nou vir 'n baie belangrike stap ... sit vir jou a klein pannetjie op die stoof en maak hom baie warm. Vat so opgehoopte teelepel vleismengsel en maak 'n balletjie. Druk die balletjie plat en sit in die warm pan. Braai die toetsie nou gaar ... laat bietjie afkoel en proe ... jy moet nou besluit of jy sout wil bysit en of jy van die ander geure moet versterk. Vir die sout gooi ek sout op die toets stukkie en proe of dit beter smaak.

Soms maak ek tot 3 sulke toetsies voor ek die Bielie Frikkadel bou. Dit klink dalk bietjie langdradig maar glo my ... jy wil seker wees die basiese mengsel is reg voor jy voortgaan. Hier is 'n wenk. Sny 'n appel in blokkies en voor jy proe, eet 'n stukkie appel ... maak so elke keer as jy 'n verstelling gedoen het en weer wil proe. Die appel vervars jou mond en laat jou beter proe.

Moenie tamatiesous of chutney in jou mengsel gooi nie want dan gaan jy die mengsel te nat maak.

Bou die Bielie

Vat nou 'n bakplaat en bou jou Bielie Frikkadel op die bakplaat. Druk hom mooi styf en vleg hom toe met die bacon. Ek sit nie die bacon onder die frikkadel in nie.

Nou in die oond ... 180C vir 20 minute en dan af na 160C toe vir nog 20 minute.

Toegevleg in Bacon

Terwyl hy bak maak jy vir jou 'n lekker smeersous ... tamatiesous, Worcestershire sous, bruinsuiker, braai speserye. Meng dit goed en piets hom in die mikrogolf vir so 2 minute.

Haal die Bielie Frikkadel uit die oond en laat rus vir tenminste 15 minute voor jy hom sny.

Nou met 'n lekker skerp getande mes, sny skywe van so 15mm dik ... en siedaar ... Man Kos ... 'n Bielie van 'n Frikkadel wat vrouens ook van hou.

Heerlik en vars

Jy gaan verstom wees oor die tekstuur en daai hartjies se vet maak die vleis lekker sappig. En die beste is, jy kan nog proe dis wildsvleis.

Ek maak net een lekker vars koolslaai saam met die gereg maar jy kan kapokaartappels of rys maak.

Die smeer is lekker oor die vleis. Die volgende dag sny jy dunner skywe en sit dit op toebroodjies.

Kyk die mooi tekstuur

Nouja ... lekker kook tot ek weer 'n storie skryf.

Hier is my Facebook bladsy ... Man Kos ... Like hom stukkend as jy wil.

Bosvark - Colyn bak Bosvark Boud

Nouja, nou is ek by die laaste stuk van die Bosvark, die Boud. Hier is die skakels na die ander stukke toe wat ek reeds gaar gemaak het.

Bosvark Nek
Bosvark Ribbes
Bosvark Blad
Bosvark Rugstring

Bosvark Saaltjie

Bosvark boud en die speserye

Hierdie stuk vleis het baie moontlikhede en my eerste keuse gaan wees om hom in die oond te doen soos my ma en ouma skaapboud gedoen het. Niks van pienk vleis nie, goed gaar met 'n lekker lang sous.

Mooi gesmeer en nou yskas toe

Eerste gooi ek speserye en smaakmiddels, Texan Braai Rub, Steak en tjops speserye, soet chili sous, bruinsuiker, olyfolie, Worcestershire sous en suurlemoen. Steek so paar gleufies in die boud en smeer die mengsel mooi egalig oor die boud. Dan yskas toe vir so twee ure of wat. Die boud weeg 1.5 kg.

Gereed vir die oond

Volgende maak ek twee koppies van Ina Paarman se Bruin sous poeier aan en gooi dit onder in die oondpan. Ek sny 'n ui in kwarte, kap a stingel seldery en gooi ook wortels in die pan.

Nou plaas ek die boud bo-op die groente en maak hom dig toe met foelie. Oond op 140 C vir 3 ure.

Mooi bruin gebak en reg vir die tafel

Na 2 ure en 45 minute maak ek die boud oop. Gooi die pan se inhoud in 'n pot en sit 'n draadrak in die oondpan. Nou sit ek die boud terug in die oond. 190 C vir 15 to 20 minute, ek doen dit om die vetjies so bietjie bruin te bak.

Bosvark boud, aartappels en pampoen

Die sous in die pot word nou met my stingel versapper bygekom en toe versterk ek die sous so bietjie met soja, chutney, botter, suurlemoen en heuning. Kook hom dat hy kan verminder en roer so bietjie mielieblom by om hom dikker te maak.

Nou ek is iemand wat gewoonlik sukkel met 'n boud se snyery en so oor die jare heen het ek geleer om 'n skaapboud van die been af te haal voor ek hom sny vir die tafel. Ek doen maar die een ook so. Sny op die been langs tot by die heup en dan as die been oop is druk ek die mes dwarsdeur net bokant die been sny op tot teen die heupbeen. Dan swaai ek die mes 90 grade en sny die helfte los. So doen ek met die onderste stuk ook en endig op met twee dele. Die been het nog so bietjie vleis aan en dit is die kok se lekkerte tot op a punt en dan gaan dit vir die wagtende brakke.

Ek kerf nou die twee stukke in mooi snye en siedaar ... boud reg vir opdiening.

Hierdie is dan nou die einde van my groot Bosvark Avontuur. Ek het nou elke stuk van die Bosvark gaar gemaak en baie geleer. Verseker sal Bosvark nou op my lys wees van vleis om in voorraad te hou. Ek is mal oor die tekstuur en geur van die vleis en die lae vet maak dit net nog beter.

Kook lekker tot ek weer 'n storie skryf.

Hier is my Facebook blad.

Wees so vriendelik en "Follow" my hier en SHARE dit ook wyd en suid. Ons maak nie geld uit die goed uit nie maar dis baie lekker om te sien dat lesers die inhoud waardeer. O ja en +1 is ook belangrik.

Lees ook gerus my Briekmerke Blog.

Bosvark - Colyn kook Bosvark Saaltjie

Vandag kook ons weer Bosvark hier in my kombuis. Ek is nou by die 5de deel van die Bosvark en dit word al hoe lekkerder. Die stukke wat reeds gaar gemaak is ...

Bosvark Nek
Bosvark Ribbes
Bosvark Blad
Bosvark Rugstring

Bosvark saaltjie

Nou weet ek nie of Saaltjie heeltemal reg is nie maar ek vermoed so. Maar laat ek verduidelik ... dis die laaste stuk van die rug vanaf die laaste ribbes tot by die stert.

Hierdie stukkie vleis het my baie laat dink en hoe meer ek daaroor gedink het meer het ek besef dat en nie eintlik regtig mooi weet wat gaan die beste wees nie.

Bosvark fillette, porterhouse en rump

Laat ek dit sommer nou duidelik maak ... ek is geensins 'n gekwalifiseerde blokman nie. Ek het oor die jare heen maar self geleer hoe om karkasse uitmekaar te haal en soms sny ek so effens anders as wat die slagters dit sou doen. As ek sny dan sny ek min of meer so dat ek die stukke uitlry wat ek van hou om gaar te maak. As ek vir biltong sny dan breek ek die karkas anders op as wanneer ek vir kook en braai sou opsny.

Ontbeen skoon ...

Die snit het so paar van die tradisionele snitte in. Aan die onderkant of binnekant is daar die sagte fillette, nou die weet ons almal, is gewoonlik murgsag. Dan is daar die deel waar skaap lende tjops gesny word. Verder agtertoe is 'n deel wat gewoonlik saam met die boud uitgesny word maar ons het die boud alleen afgehaal spesifiek om die saal te kon uitkry. By bees sou die agterste deel van die "rump" snitte in hê.

Hier kom 'n lekker Bosvark sous

Eerste het ek die fillette uitgesny. Daarna het ek die bokant van die rug gesny en die twee rugstukke, in bees is dit ook soms bekend as Porterhouse, uitgehaal. Laastens het ek so stukkie boudvleis afsny, gewoonlik deel van die rump ... en toe bly daar die stuitjie deel oor op die been.

Ek staan en kyk na die stukke op die tafel en wonder hoe ek die vleis moet benader. Die bene en die ander snippers gaan dadelik pot toe om te kook vir 'n lekker sous.

Speserye op en in die yskas

Volgende gebruik ek Woolworths se Moroccan Rub om al die vleis lekker mee te bedek. Gooi so bietjie bruinsuiker, suurlemoensap en Worcestershire sous by en sit in die yskas vir 4 ure.

Drie ure later is die bene in die pot besig om skoon te raak en ek haal die bene uit. Skraap die vleis af van die bene en gooi die fyn vleisies terug in die sous pot.

Die sous kom mooi aan.

Soos gewoonlik het ek Ina Paarman se hoender aftreksel poeier in die sous. Pas net op, dis souterig so jy moenie te gou sout by wil gooi nie. Al wat ek eksta bysit is gekerfde uie en gemaalde swart peper. Nou moet hy maar aan kap op die stoof en dikker word. Net voor ek reg is om op te dien gooi ek so twee eetlepels van my Maroela Konfyt, 100ml varsroom en twee teelepels Mielieblom in.

Bosvark braai in die pan

Nou is dit tyd om die vleis gaar te maak. Eerste doen ek die twee fillette ... die goedjies is maar klein en dun want dis 'n jong varkie gewees. Botter en olie in die pan en dan net so 4 tot 5 minute en uit. As jy dit te lank gaan braai is daar min oor en ek dink dit gaan taai wees.

Volgende braai ek die porterhouse stukke. Hier was ek verras, die vleis is wit, soos by 'n vlakvark. Ek braai ook die stukkie rump in die pan.

Daarna die agterste rugstuk. Die stuk is groterig en ek begin met die bene kant in die pan. Na so 6 minute draai ek hom om en braai weer so 6 minute. Draai hom om en sit die deksel op die pan. Nog so 6 minute.

Ek laat die vleis so 10 minute rus en toe sny ek dit in dun skyfies. Lekker kapok aartappels met sous op die bord en toe begin die fees.

Bosvark op die bord. 3 Snitte.

Nouja, die fillette was puik en so ook die stukkie rump. Heerlik sag en baie geurig. Die porterhouse stukke was nie baie lekker op die manier nie. Dit was taai. Volgende rondte sal dit pot to gaan of oond toe. Die vleis aan stuk om die stuitjie was lekker maar kon meer gar gewees het.

Volgende keer sal ek dit in die pan begin en afrond in die oond. Maar miskien sal ek die boud liewer van die karkas afhaal soos a skaapboud met die heupbeen deel van die boud.

Ek hoop julle het die een ook geniet. So stukkie vir stukkie is ek besig om die Bosvark op te eet en dis nogal 'n kook avontuur.

Kook lekker tot ek weer 'n storie skryf.

Hier is my Facebook blad.

Wees so vriendelik en "Follow" my hier en SHARE dit ook wyd en suid. Ons maak nie geld uit die goed uit nie maar dis baie lekker om te sien dat lesers die inhoud waardeer. O ja en +1 is ook belangrik.

Lees ook gerus my Briekmerke Blog.

Bosvark - Colyn kook Bosvark Blad

Lekker Bosvark Blad

Soos julle seker gesien het, ek is besig om die Bosvark so stuk vir stuk op te eet. Hier is die skakels na die ander Bosvark stukke toe wat ek reeds gaar gemaak het ...

Bosvark Ribbetjies
Bosvark Nek
Bosvark Rugstring

Elke keer as ek 'n snit van die Bosvark vleis bewerk dan word ek weer van vooraf beïndruk deur die gehalte, smaak en tekstuur van hierdie besondere wildsvleis. Ek dink dit word hopeloos onderskat en onder benut. Ek is baie bly dat ek nou 'n goeie bron opgespoor het en ek sal verseker nie sommer weer sonder Bosvark in my vrieskas wees nie.

Nouja Vrydagaand het ek my broer oorgenooi vir ete en Bosvark blad was op die spyskaart. Ek het maar vir Poppie hoender gemaak want sy wil mos nie "cute" eet nie en so ook my skoonsus. Ek en Andrè gaan verseker nie honger bly nie want die bladjie gaan net ons s'n wees. Hierdie is Man Kos.

Goed bestrooi met die speserye

Vroegoggend dam ek die blad by met my geliefde braai speserye, so blertsie suurlemoen en bietjie soja sous. Weereens niks in oormaat nie want soos julle seker nou reeds weet, ek soek die smaak van die vleis nie die smaak van die sous nie. Laaste so ligte strooisel bruin suiker en bietjie chili flakes. Dan in die yskas in vir 4 ure se marineer.

Groente en aftreksel in die pan

Vir die oond sny ek uie, wortels en seldery op en pak dit onder in die pan. Ek plaas die blad bo-op dit sodat hy nie aan die bodem raak nie en gooi toe so twee koppies water met Ina Paarman se groente Aftreksel in die pan in. Maak mooi dig toe met foelie en steek hom in die oond. Die oond is gestel 140 C ... lekker koel oond vir 3 ure. Glo vir my, so na 'n uur begin die geure die kombuis vul en my mond water sommer. Ek hou myself in toom en raak nie aan die pan nie ... hy moet dig toe bly vir 3 ure.

Nou in die oond in vir 3 ure

Kort voor sononder is die tyd om en ek haal die blad uit die oond uit ... toe ek die foelie afhaal gee my hart sommer so bokspring. Daardie varkie is murgsag en val so van die bene af. Die oondpan het alles in wat nodig is vir 'n manjifieke sousie en ek grinnik so in my binneste terwyl ek Poppie se hoender in die oond insit ...

"Ok maar lekker dom ..." dink ek terwyl ek die oonddeur toedruk.

Geurig en murgsag

Al wat ek verder gaan sê is dat die bosvark blad heerlik was ... het my nogal sterk laat dink aan skaap met net hope minder vet. Die vleis het so van die bene afgeval en was murgsag.

Die speserye het genoegsame geur gegee sonder om die regte geurigheid van die Bosvark te oordonder.

Kaal bene is al wat oorgebly het

Ek dink dis die regte metode van gaarmaak vir die blad en sal dit weer so in die toekoms doen. Miskien kan mens mos bietjie met die geure rondspeel en ek dink ek gaan die volgende blad appelkoos en heuning geur.

Kook lekker tot ek weer 'n storie skryf.

Hier is my Facebook blad.

Wees so vriendelik en "Follow" my hier en SHARE dit ook wyd en suid. Ons maak nie geld uit die goed uit nie maar dis baie lekker om te sien dat lesers die inhoud waardeer. O ja en +1 is ook belangrik.

Lees ook gerus my Briekmerke Blog.

Bosvark - Colyn braai Bosvark Rugstring

Lekker stukkie Bosvark Rugstring op die bord

So kom ons dan nou by die rugstring. Dit is die deel waaruit daar gewoonlik tjops gesny word. My stuk rugstring was die deel van waar die nek ophou, so by die begin van die ribbes tot by die einde van die ribbes. Dit bevat daardie lekker dik spiere wat so bo-op die rug van die varkie lê.

Ek het die stuk in drie gedeel en toe lekker goed met braai speserye bedek. So bietjie bruinsuiker oorgestrooi, bietjie "worcheshire" souse en suurlemoen en toe in die yskas gesit oornag. Ek was regtig versigtig met die souse want ek wil nie die vark vleis se smaak oordonder nie.

Bosvark rugstring in die marenade

Toe kosmaaktyd aanbreek die aand is dit reguit pan toe met die vleis. Aanvanklik het ek dit oorweeg om die rugstring ook in die oond te sit maar het daarteen besluit want ek wou sien wat doen die "tjops" in die pan.

Eers so bietjie olie en speserye en laat dit lekker warm word. Jy moet olie bysit want die vark het nie vet om van te praat nie.

Bosvark Rugstring in die pan

Na so 10 minute se braai het ek die dik stukkie netjies van die been losgesny en gesien dat teen die been was dit nog aan die rou kant. So ek het die los stukke verder gebraai vir nog so 3 minute en toe is dit afgehaal en laat rus vir so 6 minute. Die rus ding is belangrik want dit laat die vleis ontspan en die hitte versprei eweredig deur die vleis. Daar is dan ook baie minder sous wat uitloop as jy dit begin sny.

Nouja wat van die smaak ?

Vir my was die vleis baie lekker maar dit was aan die taai kant. Jy moet a lekker skerp mes gebruik en dun repies afsny. Volgende keer sal ek dit ontbeen en sonder die bene gaarmaak en dit op die snyplank in skyfies sny vir opdiening.

Weereens was ek ingenome met die smaak en tekstuur van die vleis. Die Bosvark is regtig goeie vleis.

Kook lekker tot ek weer 'n storie skryf.

Hier is my Facebook blad.

Wees so vriendelik en "Follow" my hier en SHARE dit ook wyd en suid. Ons maak nie geld uit die goed uit nie maar dis baie lekker om te sien dat lesers die inhoud waardeer. O ja en +1 is ook belangrik.

Lees ook gerus my Briekmerke Blog.

Bosvark - Colyn kook Bosvark nek

Bosvark nek

In die eerste aflewering van my Bosvark Verhaal het ek julle so oorsig gegee van die Bosvark en ons het die ribbetjies gebraai en geniet. Wel nou is ek by die nek, ek gaan die varkie van 'n kant af opeet.

'n Vrugtelose gesoek op die internet na advies oor hoe om 'n varknek te ontbeen het my so vir 'n wyle laat rondtrap. Maar nouja, hoe moeilik kan dit wees ?

Bosvark nek halfpad ontbeen

Ek bekyk die nek van alle kante af, dis 'n mooi stukkie vleis die. Net so strokie vet reg oor die nekwerwels en verder skoon vleis. So ek besluit om maar aan die onderkant waar die werwels sigbaar is, te begin en dan op en oor die nek te gaan en anderkant af. Dit behoort vir my 'n mooi beenlose stuk vleis te gee.

Bosvark nekbene

Lekker skerp mes en so bietjie geduld. Ek trek die lem nog so paar keer oor die slypstaal en toe pak ek die nek. Met die wegtrek voel dit asof ek net sukkel maar ek hou maar aan, bly so naby aan die been as wat ek kan. Nadat ek oor die ronding is en teen die bopunte van die nekwerwels opeindig vat ek so blaaskansie. Ek bekyk die storie nou mooi en baie krities.

Wat ek sien maak my gelukkig, die proses lyk op die regte spoor en ek sak terug in die taak in. Halfpad en dinge begin nou sin maak ... ek kan duidelik sien waarheen ek opad is en die ontbeende deel is lekker dik in my hand. Vir 'n oomblik oorweeg ek dit om die eerste helfte af te sny ... gelukkig beteul ek myself en sny nou weer afwaarts, terug na die nekwerwels toe.

Bosvark nekbene in die pot vir die sous

En daar lê hy ... pragtige stuk vleis en die nekwerwels eenkant met so bietjie vleis aan die bene. Dit pla my gladnie want ek weet wat ek met die bene gaan doen en daai stukkies vleis gaan baie lekker wees in die beplande sousie.

Ek gooi die bene in 'n ysterpot saam met so bietjie olie en speserye en laat hulle maar stadig begin braai. Daar is natuurlik nie veel vet nie so jy moet maar kyk dat jy nou nie die bene gaan staan en verbrand nie.

Ontbeende Bosvark nek

Terug by die vleis. Soos 'n  wafferse blokman maak ek die nek nou aan die kant en gooi al die klein stukkies wat ek afsny ook in die benepot. Dit het my so 30 minute gevat tot hier. Ja ek weet dis bietjie stadig maar nouja, ek is nie 'n blokman nie en het die taak met wiskunde aangepak want ek het geen onderving hiervan nie. Die volgende een sal verseker net die helfte van die tyd vat.

Bosvark nek reg vir die pan

Hierdie is vir my baie bevredigend, ek het 'n plan gehad en dit het mooi uitgewerk. Getrou aan my beginsel dat ek werklik die vleid geur wil ervaar vir wat dit is gaan ek nie oorboord gaan met die speserye nie.

Ek vryf Texan Dry Rub oor die nek, sprinkel bruinsuiker oor en dan so bietjie suurlemoen en Woestersous. Laastens so bietjie olyfolie ... die vleis het werklik baie min vet en soek so bietjie hulp.

Bosvark nek met speserye

Nou terug yskas toe terwyl die bene goed aangaan in die pot.

Bosvark nekbene lekker sag gekook

Ek het al die kante nou lekker gebraai en toe gooi ek genoeg water in om die bene te bedek. So twee teelepels van Ina Paarman se Hoender Stock Poeier, twee buisies van die hoender pasta en 'n hele opgekerfde ui. Nou moet hulle maar kennis met mekaar maak op 'n lae hitte. Dis middel van die dag en ek gaan die nek vir aandete maak ... so ek het baie tyd.

Ongeveer twee en half uur later en die bene is deurgekook. Die vleisies val sommer af as ek dit met a vurk krap. Soos 'n wafferse argeoloog krap ek elke stukkie van die heerlikheid af van die werwels af.

Bosvark nek vleisies afgeskraap van die bene af vir sous

Chaka staan by die agterdeur en met elke krap kan ek die verwyt in sy oë sien maar ek verhard my hart ... sorry my honne, die is die baas se lekkerte. Met kwylende bek gaan sit hy op sy hurke toe ek die vurke neersit en ek glimlag ... hy is darem baie slinks met sy lyftaal.

Ek vat die grootste stuk werwels en gee dit vir hom. Baie versigtig vat hy die bene uit my hand uit en stap weg ... hy en ek het lank gelede 'n deal gemaak ... ek sal hom bederf maar as hy gryp of hap dan is dit nie lekker vir hom nie ... hy weeg oor die 80 kilogram en het my al 'n keer of wat lelik seergemaak in sy oordadigheid.

Hy sak op sy pens neer en weereens verwonder ek my aan die krag van daardie kake ... hy rol die been mooi reg in sy bek en toe hoor jy net bene kraak en breek ... een byt en die werwels spat in stukke.

Die ander been gaan na die Black Russian Terrier toe en sy self het geen moeite om die bene te breek nie. Vlenters, my Jack Russel kry die laaste werwel voor die kop en hyself laat sy kakebene goed werk.

Nouja nou is die honde ook tevrede en ek gaan terug kospotte toe. Ek gooi al die fyn vleisies in die sous en sit die stoof af. Dis nou nog vroeg en die pot kan nou maar partytjie hou tot ek weer die vuur kom aansteek. Baie tyd vir almal om deeglik kennis te maak met mekaar. Ek kan duidelik ruik en sien dat hier kom 'n sous van statuur. En dis wat mens nodig het saam met so stuk vleis ... 'n lekker lang sous.

Bosvark nek word bruingebraai in die pan

Toe die son begin sak toe is ek by die stoof. Sit vuur onder die sous en sit my ou staatmaker pan op die vuur. Ek laat hom gewoonlik so 10 minute by medium hitte staan sodat hy ordentlik deur warm word.

Ek gooi van dieselfde braai speserye in die olie in die pan en toe braai ek die nek aan al sy kante.

Die nek lyk goed en ek sit hom in a oondpan op 'n draadrak. Gooi water onder in die pan met a paar stukke uie en wortel. Maak hom dig toe met blinkpapier en sit hom in die 170 C oond vir 30 minute. Terwyl die vleis in die oond is rond ek die sous af en maak kapokaartapples wat ek met gemenged kruie en swartpeper geur.

Heerlike sagte en sappige Bosvark nek

Na dertig minute haal ek die vleis uit, maak dit oop en laat dit rus vir so 20 minute voor ek dit sny.

Die nekvleis is sag en sappig en baie geurig.

Bosvark nek op die bord

Ek sal die Bosvark Nek soveel keer as wat ek kan voorberei. Die vleis is lekker en die lae vet inhoud maak dit ook baie gesond om te eet. Ek het die sous met gekerfde sampieone versterk en ook 'n lekker blerts van my chilli pynappel konfyt saam met dit bedien. Die sous was geurig en lekker dik.

Ek het twee fotos van die maaltyd ... die eerste een is nou 'n meer verfynde opdiening en die tweede een is hoe my bord gelyk het.

Ek hoop julle het dit geniet en eet lekker tot ek weer 'n storie skryf.

Daar gaan nog 'n paar oor die Bosvark wees want ek het nog die Rugstring, Saaltjie, Blaaie en Boude.

Lees die eerste Bosvark storie hier ...

Lekker Bosvark nek en dik sous

 Soos met alles is dit nie my doel om volledige resepte te gee nie want ek gee maar net bietjie my ondervinding met kos wat ons almal op een of ander manier gaarmaak.

Kook lekker tot ek weer 'n storie skryf.

Hier is my Facebook blad.

Wees so vriendelik en "Follow" my hier en SHARE dit ook wyd en suid. Ons maak nie geld uit die goed uit nie maar dis baie lekker om te sien dat lesers die inhoud waardeer. O ja en +1 is ook belangrik.

Lees ook gerus my Briekmerke Blog.

Bosvark - Colyn slag Bosvark en maak ribbes gaar

Meeste van ons ken Vlakvark of Top Gear soos my skoonpa hulle genoem het. En dan is daar sommiges van ons wat ook die befoeterde Bosvark ken. Die twee varke is bekend daarvoor dat hulle baie lekker vleis het maar nie almal hou daarvan nie. Ek is baie lief daarvoor maar ek sal ook toegee dat dit 'n "acquired taste" kan wees vir sommiges.

Soos van julle ook weet is ek gladnie tengunste van 'n gesous en gemarineer totdat daar geen smaak behalwe asyn in die vleis oor is nie. Nee, ek wil die vleis se regte smaak proe want anders kan jy maar netsowel polonie elke dag eet en dit iets anders noem.

Vlakvark het wit en rooi vleis en as dit 'n ou vark is dan is die ding hel taai en droog. Ek weet sommiges sal nou sommer dadelik dink ek is verkeerd en wil verduidelik van al die souse en vog wat in die marinade moet kom en dat dit vir drie weke of so moet lê ... maar ek soek nie dit nie ... ek soek die vleis se unieke smaak. As daar nou 'n ding is wat die wit waks uit my laat uitspring is dit die woorde ... "Hoe kry ek daai wille smaak uit die wildsvleis uit ?" Goeiste ... gaan koop dan vir jou hoender of polonie by die winkel en moenie wildsvleis koop of as geskenk aanvaar nie.

Nou het daar 'n derde rolspeler op die toneel verskyn. 'n Wildboer het so paar jaar gelede "Wild Boar" van Europa af ingevoer en die goed het so goed geaard in die Bosveld dat hy hulle nou begin verkoop. Die dier lyk so effens soos 'n kruising tussen ons Bosvark en 'n mak vark. So hy is nie heeltemal so vrees aanjaend soos ons bosvarke nie. Maar kom ons los die "looks" uit die prentjie en die gesprek uit ... Poppie het hoeka gereken die klein varkies is tog so "cute" ... en dis nie goed nie want sy gaan nie "cute" eet nie.

Nou na baie beloftes en voornemens sleep ek toe af Bosveld toe die afgelope naweek en hierdie keer was my swaer goed beaarbei ...

"Swaer, ek soek 'n vark ... as daar nie een is nie gaan ek een van jou Nyalas skiet."

Kyk ... dit was oorgenoeg inspirasie en toe ek daar by Witbank verbysleep toe kom die boodskap deur ...

"Vark hang in koelkamer. Bring jou spices."

Jis dit het my bek sommer dadelik laat water. In my geestesoog sien ek al die kole gloei en die ribbetjies lê en kry houding op die rooster.

Op die plaas aangekom is ek sonder baie stories reguit koelkamer toe. En daar hang hy, so lekker jongetjie, omtrent so meter en 'n bietjie lank aan die haak. Ek bekyk hom mooi. Eerste wat my opval is die dun lagie vet wat so kol kol oor die karkas sit. Dit lyk gesond. Tweede ding wat my opval is die tekstuur van die vleis. Die grein lyk baie fyn en die kleur laat my nogal aan bosduif dink.

Wel vir die volgende paar weke gaan julle nog heelwat Bosvark stories van my hoor want ek het die vark net in boude en blaaie gesny, die ribbes afgehaal, die nek en rugstring geskei en die hele saaltjie uitgesny. So die varkie het opgeeindig in 9 stukke.

Nou die regte ding sal wees om die karkas so vir 10 dae of so te laat hang in die koelkamer dat hy lekker ryp kan word maar vandag gaan ons nou nie die regte ding doen nie. Ek het jare laas wilde vark ge-eet en my maag grom.

Die twee ribbes word summier met braaimengsel, bruinsuker, olyfolie en suurlemoen behandel. Daar is darem so drie ure oor voor dit braai tyd is. Die res word verpak en gevries. Ek sal dit so stuk stuk aanvat en kyk wat kan ek daaruit kry ... dis nou smaak gewys.

Skuins na sononder is die vuur gepak en aangesteek ... ek het ongeduldig gewag dat die kole moet regkom. Al die ander is gefokus op hoender en bykosse maar ek wil net een ding hê en dis vark.

Eerste ding om te onthou is dat die nie skaap is nie, daar is baie min vet so jy moet verseker pasop dat jy die ribbes nie uitdroog nie ... stadige kole en baie geduld. Jy wil die regte skakering kry maar nie verkool nie.

Ek verduidelik mooi aan die braai meester hoe die ribbetjies hanteer moet word ...

"Reg so oom ... ek maak so."

Nou dis mos die regte antwoord vir 'n knormoer soos ek en ek sit rustig in my stoel terug, vat 'n lang sluk uit die groen botteltjie uit en steek 'n Camel op. Die blou rokie krul so in die aandlug op en ek voel goed ... dis lekker om 'n Afrikaner te wees ... lekker in die Bosveld en lekker by die vuur. Nog lekkerder is die geure wat van die rooster af kom.

Vannaand gaan ek nie eers oor politiek, die swak rand, duur diesel en e-Tol dink nie. Nee, vannaand gaan ek net myself oorgee en dit wat op die rooster is met oorgawe geniet.

Eerste is die benekant op die kole, altyd 'n goeie begin vir 'n ribbetjie. Dan die anderkant. By die omdraai slag word die lieslappe so bietjie bygekom met die mes want hulle krul mos alewig sleg op. Die twee hoendertjies lyk mos maar al te oninteressant daar in hulle deel van die speelveld en ek lek my lippe af. Die girls het klaar begin grom oor die arme varkie en ek smile, net soveel meer vir my om te eet. Hoender is mos eintlik net groente vir 'n vleisvreter soos ek.

Dis goed dat hulle die ribbes saam met die hoenders braai want albei het goeie stadige kole nodig en die manne kyk mooi na die vleis op die vuur.

So veertig minute later en ek gooi my oog baie krities oor die rooster.

"Manne, daai ribbes lyk nou vir my doodreg ... haal maar af."

Nou ek is 'n ou wat daarin glo dat vleis eers moet rus as dit van die vuur af kom, die vleis moet 'n kans kry om te ontspan.

'n Goue reël is dat dit tenminste die helfte van die braai tyd moet rus en ek maak nog 'n botteltjie oop. Hierdie gaan nou meditasie tyd wees ... die innerlike moet nou intens deur so bietjie goeie gedagtes sag gemaak word want die gaan 'n fees maal wees.

Uiteindelik is die ribbes op die bord en ek ruik diep aan dit. Die geur is goed en ek is hoog in my noppies oor die min vet op die vleis. Die is gesonde vleis. Poppie wil allerhande bykossies voor sit maar ek skud net my kop, daar was vetkoek en ek smeer een lekker dik met botter ... dis al wat ek soek, vleis en vetkoek.

Nou kyk, die is verseker nie die "Spare Ribs" wat jy by jou gewilde ketting braai restaurant koop nie. Die vleis val nie van die bene af nie en die goed swem nie in een of ander soet suur taai sous nie. Nee, die vleis is in sy natuurlike staat van smaak, geur en tekstuur. As jy die repe in goeie byt porsies sny met 'n lekker skerp mes dan is dit baie lekker en die effense growwer tekstuur maak dit lekker om te kou en te geniet.


Ek hou nie van die woord taai nie want dis relatief tot jou manier van sny. Ek hou van die woord substansie as dit by vleis kom. Nou hierdie ribbes het substansie. As ek die smaak en tekstuur moet saamvat dan sou ek sê dat die vleis is sag, sappig en geurig met lang vesels wat verseker gesny moet word vir die meer gekunsteldes, vir my is dit lekker om die repies so af te trek met my tande en dan stadig te kou totdat ek elke greintjie smaak daaruit onttrek het.

Ek hoop julle monde water nou kwaai ... ek het die hele naweek aan die ribbes ge-eet ... Saterdag "Brunch", en Sondag weer 'n "Brunch" en toe is dit klaar en ek pak my kar en ry terug Laeveld toe. Daar was so diepe saligheid in my gemoed en ek bewerk die vleis in my koelkas so in my gedagtes terwyl ek ry. Volgende gaan die nek wees ... hoe ... dit weet ek nog nie mooi nie ... maar verseker gaan ek nie sommer mal word en die siel uit hierdie varkie kook nie.

Soos met alles is dit nie my doel om volledige resepte te gee nie want ek gee maar net bietjie my ondervinding met kos wat ons almal op een of ander manier gaarmaak.

Hier is die tweede aflewering ... Die Nek ...

Kook lekker tot ek weer 'n storie skryf.

Hier is my Facebook blad.

Wees so vriendelik en "Follow" my hier en SHARE dit ook wyd en suid. Ons maak nie geld uit die goed uit nie maar dis baie lekker om te sien dat lesers die inhoud waardeer. O ja en +1 is ook belangrik.

Lees ook gerus my Briekmerke Blog.