Vrydag, 24 Januarie 2014

Rice Krispie koekies met 'n kinkel ...


Ai die heerlike krakerige soet goedjies ... Rice Krispy Koekies ... laat my terugdink aan my koshuis dae. My ma het altyd dit deel van die kosblik gemaak en ek het myself mooi gerantsoeneer vir die kwartaal. Nou dat ek daaroor dink, hier teen die einde was hulle eintlik nie meer so lekker nie.
Nouja, nostalgie kan ons mos soms aan die kook sit en so was dit vir my met die koekies.


Ek het 'n post op 'n Facebook blad gelees oor die goedjies en terstons besluit ek moet dit verseker maak.

Ek was egter lus vir so bietjie vernuwing hier en die Facebook post het genoem dat daar a Bar One bygesit is. Vir my het die kinkel begin toe ek die Rice Krispies wou koop ... daar was nie maar ek sien toe die van Jungle raak ... Oat Crispies.

Wel so gesien en so gemaak ... ek pak die boksie maar in die trollie. Nouja, op sy beste is die maar 'n morsige spulletjie want daai gesmelte marshmellows is nou nie iets wat eintlik respek het vir goeters nie, waar hy raak is dit taai.

By die afmeet slag sien ek toe die boksie het net vier en a half koppies in en die resep soek ses koppies. My eerste instink is om die resep te verminder maar toe dog ek ... hoekom ... gooi ietsie by. Aanvanklik neig ek na gekapte appelkose en cranberries maar my vroutjie reken peanuts is 'n beter opsie. So ek gee toe in en gooi maar een en half koppie gekapte en geroosterde peanuts in. Ek het eers darem al die doppies afgevryf en verwyder.
Laat ek net nou noem ... sodra jy die taai goeters alles gesmelt het, en pasop vir te warm want dan brand dit, dan moet jy katstaan want daar is nie tyd nie. Gooi die krispies in die pot en roer met a houtlepel. Steek hom diep in en dop om, steek en dop om en so gaan jy aan totdat jy alles mooi gemeng het. Wees versigtig om nie die krispies te vermorsel nie.

Nou moet jy dit blitsig in jou pan in kry. Spuit die pan vooraf met koekie sproei ... hmmm die laat my altyd glimlag ... Ek het 'n goeie tip op Faceboek gesien ... maak jou handpalm nat met water en druk die koekspul vinnig plat. Wees nogal ferm want hoe stywer jy dit druk hoe beter is die eindresultaat.

Nou kan jy effens ontspan. Ek laat sommer dadelik warmwater in die pot inloop en krap die taai goeters los met die houtlepel. Jy wil nie die storie laat koud word nie want dan gaan die pot skoonmakery nou regtig 'n taai stryd afgee.
Sodra die pan goed afgekoel het plaas ek dit vir so 10 minute in die vrieskas. Keer die pan om op a snyplank en met 'n lekker skerp mes sny jy die koekies op in porsies.

Dis baie lekker en die krispies is beter vir my as die Rice Krispies waaraan ons gewoond is. Ek sal verseker dit weer maak maar dan gaan ek cranberries en appelkose insit, vir my is dit bietjie te soet maar my seun hou daarvan. Die koekies is lekker crunchy en die Bar One en Peanuts gee dit 'n ander dimensie.









Hier is die resep ...
Helena Kruger
Ok ek het dit ook gemaak maar met net so n kinkeltjie by*Bare-Ones **
RICE CRISPIES KOEKIES
Helena Kruger
*My Verwerking*
3½ eetl botter
40 marshmallows [in stukkies gesny]
6 kop Rice Crispies
1 t vanilla geursel
1x100gr Bare-One [in stukkies gesny]
knippie sout
Smelt botter, voeg Marshmallows en Bar-One by en roer teen lae hitte
Vat pot weg van hite en voeg vanilla geursel en sout by en roer
Voeg Rice Crispies by en roer goed
Krap in bak,[gesmeer] wag tot afgekoel en sny in blokkies*
Baie lekker*3/12/13
http://lekkerreseptevirdiejongergeslag.blogspot.com/2013/05/rice-crispy-koekies.html