Mieliepap - Korsies met styl

Ons boerenasie is oor die algemeen groot papeters en vir baie van ons is die brandsel byna onweerstaanbaar.

ManKos Papkorsies

Om 'n goeie brandsel in die pot te kry verg so bietjie vaardigheid en baie geduld ... maar as jy dit eers reggekry het dan is dit die groot rede hoekom jy pap maak. Daardie stukkie bros brandsel met suiker, botter, room, kaiings ... net wat jy wil ... die krakende kouery en die die vingers aflekkery ... dis mos ManKos.

Nouja om 'n goeie brandsel te kry is daar so paar punte van belang ...
1. 'n Lekker swaar pot.
2. 'n Goeie skep botter in die kokende water voor jy die meel ingooi.
3. 'n Ordentlike tweetand vurk om die pap mee te roer. Moenie die kors breek as jy roer nie.
4. Baie geduld. 'n Oordentlike kors word op 'n stadige hitte gebou. 90 minute minimum.

Maar nouja vandag se storie gaan oor die maak van die kors sonder om 'n pot pap te maak.

Die resep wat ek gebruik is eenvoudig en ek gebruik Plaasjapie se growwe braaipap meel. As jy gewone meel gebruik moet jy die water so bietjie verminder.

Bestandele:

1/2 koppie growwe pap meel.
1 en 1/2 koppie water.
1/4 teelepel sout.
1 goeie eetlepel botter - Moenie snoep wees met dit nie.

Hierdie mengsel is net genoeg vir die maak van 12 korsies in 'n muffin pan.

Metode:

Na mikrogolf sessies

Meng alles in 'n glas mengbak. Moenie bekommerd wees oor die meel wat nie in die water inmeng nie. Sit nou vir 1 minuut in die mikrogolf oond op hoog. Roer weer met 'n vurk en terug in die mikrogolf oond. Herhaal die proses so 3 of 4 maal. Nou sal jy sien dat jy 'n redelike stewige pasta het. As daar nog vry water in die bak is moet jy maar aanhou met die mikrogolf ding tot dit alles weg is. Die krag van jou oond speel 'n rol en die tipe meel wat jy gebruik.

Verdeel mooi in muffin pan

As jy nie 'n mikrogolf oond het nie, kook die mengsel in a potjie terwyl jy dit die heeltyd roer. Dis belangrik om die pap naby aan gaar te kry voor dit in die oond ingaan.

Skep nou met 'n eetlepel in die gaatjies van 'n muffin pan. Probeer om redelik akkuraat te verdeel want as jy dit oneweredig verdeel gaan party begin brand voor die dikker korsies reg is.

Bak tot goudbruin

Sit nou die pan in 'n 150C oond. Hier sal jy maar moet eksperimenteer want alle oonde is nie dieselfde nie.

Wees maar geduldig ... na sowat 40 minute behoort die korsies te begin kleur wys ... moenie oorhaastig raak nie.

Groot maat

Vanaf sowat 45 minute moet jy maar gereeld kyk en haal maar die korsies uit wat lekker bruin gebak het ... die kans is groot dat almal nie presies gelyk reg gaan wees nie.

As jy groter maat wil doen kan jy die resep verdubbel of meer ... hou die verhoudings reg. Druk dit mooi dun uit in 'n bakpan en sny mooi in blokkies. Ek gebruik a pizza cutter vir dit. Soos met die muffin pan moet jy dit maar mooi dop hou en sodra dit begin mooi kleur kry moet jy die uithaal wat reg is.

Ek het die resep 3x gemaak en die laaste keer het ek te min botter ingesit ... dis 'n fout.

Gebruik die korsies vir byna enige vingerhappie ... soet of sout.

Dit hou goed in 'n lugdigte houer maar smaak nie meer lekker na 'n dag nie.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Mieliepap - Slappap is heerlik

Ek het al heelwat stories oor mieliepap geskryf en ek het al die soorte pap makery beskryf. Vandag wil ek egter weer vertel van 'n groot lekkerte vir my ... so bederfie wat ek sommer enige tyd maak as ek mistroostig voel.

Heerlike Slappap

Daar is min dinge wat my so salig laat voel soos 'n bakkie romerige slappap. Dit laat my vêr terugdink, laat my verlang na my kinderdae, koue wintersoggende op die Hoëveld, trietsige aande in Zululand en veral eensame aande in my buitekamertjie in Muckleneuk. Maar dit laat my ook terugdink aan nagte langs die viswater ... bibberende koue terwyl ek geduldig wag vir die karp om te byt en dan die yskoue nagte in 'n tentjie in Dullstroom langs die forelwater.

O hemel ja, en moenie die koshuispap vergeet nie, aaklige goed wat omtrent soos gom geproe het en wat geen hoeveeleid suiker beter kon laat smaak nie ... die goed wil ek gladnie onthou nie.

Slappap was menige maal in my lewe die enigste kos vir die dag. As dit die dag bietjie beter gegaan het kon ek darem 'n stukkie boerewors verfrummel en oor die pap strooi en dan ... as dit goed gegaan het was daar bietjie fyn biltong. By my ouma op die plaas was dit kaiings wat oor die pap gestrooi is. Ai dit was lekker tye.

Vandag se dae word ons gebombardeer met allerhande opgesmukte en opgetertde geregte en vertel van die hemelse smake ... ons word ook vertel van polenta en daar word gemaak of dit nou so grênd is ... ek skud maar net my kop.

Ek gaan nou vir julle 'n reseppie gee vir 'n heerlike porsie slappap en as jy meer wil maak moet jy maar net alles vermeerder per porsie.

ManKos Slappap:

60ml Mieliemeel (4 eetlepels) ... ek verkies lekker growwe braaipap meel.
250ml water (1 Koppie)
125ml melk (1/2 Koppie)
1 eetlepel botter (Opsioneel)
Sout na smaak.

Meng die water, melk, meel en sout goed met a whisk. En sit op die stoof. Ek het so klein potjie wat omtrent 500ml kan hanteer.
Moenie getempteer word om meer meel in te gooi nie, in die begin gaan dit hopeloos te min lyk.
Sodra die potjie begin warm word roer die botter by.
Ek staan maar by die potjie want die proses neem net sowat 25 minute. Ek roer die pap gereeld met die whisk en maak seker ek skraap die bodem goed. Jy wil geen klonte in die mengsel kry nie.
Jy wil hê die mengsel moet borrelend kook. Na 10 minute kan jy die plaat afdraai na medium toe maar bly maar roer. Jy sal sien dat daar water teen die rant van die pot vorm en skuim bo-op die mengsel. Bly maar net whisk en werk alles heeltyd goed in. Mettertyd gaan die skuim weg en jy sal sien die mengsel word al dikker. Bly maar roer elke twee minute of so. Ek sit die dekseltjie op tussen die roerdery.
Na 25 minute behoort dit heerlik gaar te wees en lekker romerig. Sit die plaat af en laat staan net so vir so 10 minute.
Roer nou weer goed en keer die potjie uit in a lekker papbakkie.
Ek sit 'n klont botter in en strooi suiker. Dan so bietjie kaneel.
Jy kan stroop, heuning of molasses oorsit ... alles na jou smaak.
Dan kan jy nog biltong, kaiings, maalvleis oor sprinkel.

Vir my is die pap met botter, suiker en kaneel die beste laatnag snaxie.

Ek daag jou uit om dit te probeer, jy sal nie spyt wees nie.

Geniet dit heerlik warm saam met 'n glas melk.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Snaxie - Crunchies is ManKos

Meeste van ons wat in die sestiger jare grootgeword het, het opgegroei met so paar ikoniese koekies. Koekies wat 'n glimlag na jou gesig toe bring en wat jou mond laat water. Koekies wat gebore is in 'n tyd toe mense oor die algemeen arm was en sekere bestandele bitter skaars was. Maar ons ma's en oumas was vindingryke mense en het altyd met iets lekker opgedaag.

ManKos Hawermout Krakers

Vir my is die koekies wat ek die beste kan onthou, Hertzoggies, Rice Krispy koekies, Koffiekoekies en dan was daar die hawermout krakers gewees .... ons noem dit sommer Crunchies. Daar is iets byna magies aan die koekies ... die smaak van die gekarameliseerde suiker en botter, die klapper en hawermout wat gerooster is en bowenal ... daardie kenmerkende neuterige kraak as jy die goedjies kou. Laatnag in die koshuis dan het die koekies my huistoe laat verlang, op 'n koue wintersaand het dit my na my ma laat verlang en tot vandag is die crunchies een van my groot gunstelinge.

Staan maar stil en hou mense dop in 'n padstal of tuisgebak plek, die ouer mense sal altyd by die rak ronkrap waar die Hawermout Crunchies is. Dis ook gewoonlik die koekies wat die vinnigste uitverkoop by die oggendmarkte en kerk bazaars.

Die internet wemel van resepte en fotos van die koekies en elke keer as so resep op Facebook opduik dan is daar tonne reaksies.

Dis belangrik om te AUTOLYSE

Om die koekies te maak is regtig nie moeilik nie maar baie mense struikel oor die bak proses. Die grootste klagte is gewoonlik dat die koekies nie krakerig genoeg is nie. Nou weet ek ook dat sommige mense hou daarvan as die koekies sag is maar die werklike toets van so Crunchie is tog maar in sy kraak.

Soos julle almal weet, is ek nie een wat sommer resepte deel nie maar meer fokus op die maak van ander mense se resepte. Met die Crunchies gaan ek egter maar my resep deel want die storie is eintlik net 'n storie omdat dit gaan oor die maak van die koekies.

Druk die deeg mooi plat en styf

In die afgelope jaar het ek twee keer van die koekies gebak ... een keer met Annelien Pienaar se resep en een keer met Wessel van Koekedoor faam, se resep. Albei was lekker maar nie een van die twee het vir my gesmaak soos my ma s'n nie.

Kersfees is mos ook koekie tyd en so twee dae terug besluit ek om weer Crunchies te maak nadat daar weer 'n foto en resep van die koekies op een van die Kosgroepe opgeduik het. Nou soos julle sekerlik weet, ek is 'n ernstige broodbakker en dis my een groot passie, suurdeeg brood. Brood bak leer jou dink oor die bestandele, die prosesse en bowenal maak dit jou baie attent op hoe jy jou oond inspan.

Laat effens afkoel voor jy sny

Ek sit met die drie resepte oop op my rekenaar en ek sit almal op 'n spreitabel (spreadsheet) ... ek was nou op 'n missie en gebruik al my kennis en ervaring in die analise van die resepte. Ek begin om my eie resep te bou uit die inligting in die drie resepte en ek grou diep in my brein rond vir die dinge wat sin maak.

So uur later het ek wat ek beskou as 'n goeie begin vir 'n lekker resep en dra die inligting oor na my tablet toe. Nou is dit ek en die kombuis. Ek weeg en meet al die bestandele afsonderlik af en maak seker ek doen dit akkuraat want met koekies kan 'n paar gram hiernatoe of daarnatoe sommer 'n groot verskil aan jou resultaat maak.

Hier is die resep:

Mankos Hawermout Krakers
Oond temperatuur is 180C en jy het 'n pan van so 20cm by 30cm nodig.

Glasbak of Pot:
235gr Bak Margerine (Botter werk ook maar kan galsterig raak na 'n tydjie)
1 1/2 Eetlepels goue stroop. (Moenie heuning gebruik nie want die stroop bak beter)
1 1/4 Koppie Bruinsuiker (Jy kan wit gebruik maar bruin bring die karamel smaak in jou koekie in)

Mengbak:
2 1/2 Koppies Oats (Die is belangrik want dit gaan bepaal of jou koekie olierig is of nie)
1 Koppie Koekmeel
1 Koppie Klapper (Die stel olie vry as dit bak en help met die kraak in die koekie)
1 Teelepel Bakpoeier (As jy bruismeel gebruik het los die uit)
1 Teelepel Koeksoda
1/2 teelepel sout (Sout verbreed die smaakprofiel)
1 Koppie gemengde vrugtekoek vrugte (Ek koop myne by Bakers Bin)
1 Koppie gekapte neute (Gebruik wat jy van hou en jy kan maar meng ook)

METODE:

1. Gebruik jou hande en meng die meel en hawermout ordentlik met al die ander bestandele in die mengbak. Maak seker die vrugte stukkies is almal mooi los en bedek met die meel. Jy wil nie klonte in die mengsel hê nie. Werk met jou vingers soos waneer jy botter in meel moet inwerk.

2. As jy gekies het om 'n pot te gebruik dan is dit nou die tyd om die pot op die stoof te sit en die mengsel stadig te verhit. Sodra die margarine mooi gesmelt is en die suiker begin oplos, maak die plaat warmer. Pasop vir brand, jy wil dit verhit totdat die mengsel begin skuim. Sodra dit skuim moet jy die pot van die hitte afhaal.

Ek het myne in die mikrogolf oond gedoen ... 1,000 watt oond ... 1 minuut en roer. Nog 'n minuut en roer en daarna elke 30 sekondes geroer totdat dit begn skuim het.

Gooi nou die gesmelte botter en suiker in die mengbak en begin meng. Ek het 'n staal lepel gebruik. Meng mooi en werk maar die klonte uit. Nou is dit belangrik om jou eie diskresie te gebruik. As jy goed gemeng het en jy sien dat daar sulke plassies botter vorm dan moet jy maar so bietjie hawermout bygooi. Jy wil nie die plassies botter/olie sien vorm nie.

Nou vir 'n proses wat broodbak my geleer het ... maak jou mengbak toe vir so 30 minute ... die proses staan bekend as autolyse in brood bak ... wat nou gebeur is dat die hawermout en meel suig die vog in om hulleself te hidreer. Jy kan elke 5 minute die mengsel deurroer met die metaal lepel. Na elke roer sal jy sien dat die botter onder in die bak begin al hoe minder raak ... dis wat jy soek.

Sit bakpapier in jou oondpan en laat dit so bietjie opstaan oor die rant. Skep nou die mengsel in die pan in. Ek skep eetlepel vol hopies om die mengsel te vresprei. Vat nou die agterkant van die staal lepel en begin die mengsel platdruk in die pan. Gebruik geduld en doen dit mooi. Hoe stywer en meer eweredig jy die deeg versprei en saampers, hoe beter gaan die koekies bak.

OOND:

Sit die pan op die middelste rak and laat bak vir 10 minute teen 180C ... die is slegs 'n aanduiding want oonde verskil. Jou grootste vyand is aanbrand en dit gebeur binne minute omdat daar baie suiker en stroop in die mengsel is.

Na 10 minute draai die oond af na 160C vir nog 10 minute. Nou sal die koekies gaar wees en jy kan die pan nou uithaal. Dis nou hier waar jy 'n besluit moet neem ... as jy dit baie krakerig wil hê moet jy nou die oond afsit en die deur op 'n skrefie ooplos en die pan in die oond los vir nog so 10 minute. Hou maar jou oog op dit want jy kan vind dat die goed te donker word in 'n japtrap.

Sodra jy die pan uit die oond uit haal moet jy versigtig wees want die koekies gaan nog baie sag wees. So hanteer dit maar versigtig en moenie die pan hard neersit nie. Wag so 5 minute en trek die hele mengsel op die papier uit die pan uit op snyplank ... ek sleep dit uit op die graniet van my werksblad. Laat dit nog staan vir so 5 minute en sny dan in blokkies.

Hoe meer dit afkoel hoe brosser en harder gaan dit word. Los dit nou uit om heeltemal af te koel.

Hierdie resep het twee eienskappe ... jy sal vind dat daar nie veel vetterigheid aan die koekies gevoel word nie want die metode laat toe dat die hawermout baie van die vet absorbeer. Om die mengsel deur 'n AUTOLYSE fase te laat gaan is iets baie bakkers verseker sal laat frons.

Tweedens het dit 'n heerlike kraak.

Ek strooi Muscavado suiker oor die hele mengsel voordat ek dit in die oond sit ... dit smelt en gee 'n lekker karamel smaak aan die koekie.

Nouja ... daar is dit ... heerlike ManKos Hawermout krakers.

Lees maar my storie mooi deur en jy sal dit maklik regkry.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Snaxie - Lekker gesonde gummies

Passion Fruit en Muskadel

So tydjie gelede lees ek op 'n webtuiste, waar huiskokke kuier, van die vrou wat "gums" maak vir haar kinders, Wat my meer fasineer is die feit dat sy die "gums" versterk met verskeie vitamines en minerale. Sodoende kry die kinders hulle aanvullings so kou kou in sonder stories. Wel ek het gelees en gelees en hoe meer ek lees hoe meer kom ek agter dat daar letterlik honderde gebruike is vir die eenvoudige "gums".

Apple Sauce en Magnesium

Nouja, Man Kos is mos daar vir die manne en dit gaan oor die kos wat manne kan maak en soms, net soms dan is dit dieselfde kos waarvan vrouens ook hou. Vandag gaan dit oor lekkergoed wat mans kan maak en die kinders gaan dit baie geniet.

Daar is min bestandele en min skottelgoed en binne so uur of wat kan dit geniet word.

Die proses bestaan daaruit dat jy 'n vrugte mengsel maak, dan voeg jy die aanvullings in en dan die gelatien. Die gelatien word baie sterk gemaak sodat die goedjies "gums" kan wees en nie slap jellie goedjies nie.

Hier is die basiese resep.

Bestandele:
1/2 Koppie koue water
1/2 Koppie kookwater
1/2 Koppie vrugte pulp
1 Knippie sout
1 Eetlepel heuning
3 Eetlepels ongegeurde gelatien

Dit is die basiese bestandele wat ek in al my "gums" gebruik.

Metode:
Eerste taak is om te besluit watter vrugte pulp jy wil gebruik.

Die volgende vrugte is nie geskik vir gummies nie want dit skei 'n ensiem af wat keer dat die gelatien stol.
1. Pynappel
2. Vye
3. Guava
4. Kiwi
5. Papaja
6. Gemmer

Al die bestandele

Ek het gebottelde Apple Sauce gebruik, vars Grenadella en bevrore Raspberries in die drie wat ek gemaak het. Die opsies is wyd en jy kan eksperimenteer na hartelus. Ek het die bessies tussen my vingers stukkend gedruk want ek wou die tekstuur behou en nie met 'n voedselverwerker verpulp nie. Weereens, dis jou keuse hoe jy dit doen.

Vrugte Pulp

Meng die pulp en heuning goed saam. Jy kan self besluit of jy meer of minder heuning in wil gooi. Dis belangrik dat jy jou mengsel proe en staatmaak op jou smaak om jou te lei. Sout doen wondere om smaak te verbeter. As jy tevrede is met jou pulp se smaak dan gaan jy verder.

Kook solank jou ketel water.

Ek gebruik die mini pannetjies

Voeg nou die gelatien by die 1/2 koppie koue water en roer maar moenie klits nie. Los dit nou dat die gelatien kan "bloom". Dit vat so minuut of twee. Sodra dit in a pasta verander het met geen sigbare "los" water nie, gooi dit by die pulp. Roer versigtig, probeer die mengsel mooi glad te kry sonder baie borrels. Voeg nou die 1/2 koppie kookwater by en meng goed.

Indien daar skuim gevorm het kan jy dit afskep.

Gelaai met Vitamine C

Nou het jy alles klaar en kan jy die mengsel in vormpies giet of eenvoudig in 'n glashouer giet. As jy die glashouer gebruik dan sny jy die gummies in blokkies nadat dit gestol het ... dis maklike en vinnige manier.

Sit in die yskas vir so sestig minute om te stol.

Aanpassings:

Passion Fruit

Ek het 2 Teelepels Magnesium poeier saam met die Appel Sous gebruik. Hierdie mengsel is baie goed vir kinders om hulle te help om rustiger te slaap. Pasop net vir teveel op 'n slag want die Magnesium help ook om hardlywigheid te voorkom. My seun gee een so gummie vir sy dogtertjie voor sy gaan slaap.

Saam met my Grenadella Gummies het ek 2 teelepels Vitamine C poeier gesit. Pas net op, die vitamien poeier maak baie skuim. Jy moet dit maar tyd gee om te settle voor jy die gelatien aanmaak.

Ek het ook Passion Fruit gebruik en 'n kwart koppie Muskadel bygegooi. Dit was baie lekker.

Soos ek reeds gesê het, die opsies en die mengsels is onbeperk. Eksperimenteer ... dis nie a duur proses nie maar dit kan 'n klomp pret wees.

Wine Gummies

Ek het ook "gummies" gemaak met wyn, brandewyn en Coke, met Passionfruit, wyn en Sprite. Eksperimenteer ... hou net by die verhoudings van vloeistof en gelatien.

Hoe langer jy hulle in die yskas hou, hoe sterker word die "gum". Hierdie "gummies kan a baie prettige byvoeging tot 'n kaas bord wees. Jy avontuurlustig raak en cocktail mengsel gebruik ... gaan wild en lag daaroor.




Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Beskuit - Man Kos Krakers

Beskuit, dis iets wat na aan omtrent elke Afrikaner se hart lê. Karringmelk beskuit in besonder is iets waaroor daar baie gepraat word en baie resepte voor bestaan. Maar karringmelk beskuit is ook baie verwarrend, veral die woord karringmelk.

Gewone beskuit en Krakers

NB ... As jy van plan is om die beskuit te maak dan sal ek jou sterk aanraai om die hele storie mooi deur te lees voor jy begin.

Regte karringmelk kry mens as jy botter maak. Dis gewoonlik nogal aan die soetsuur kant. Dit wat ons in die winkels koop is maar 'n vaal verskoning vir karringmelk. O ja en daar is ook die mense wat reken as jy suurlemoen by gewone melk gooi, dan maak jy sommer jou eie karringmelk. Niks is verder van die waarheid af as dit nie. Wat jy daar maak is suurmelk of dikmelk. Karringmelk is baie laag in bottervet want jy haal die meeste van dit uit in die bottermaak proses.

Maar dit nou daar gelaat ... ons ken beskuit hoofsaaklik in drie formate.

1. Boerbeskuit met al sy variante soos mosbolletjies, anysbeskuit en krakelinge. Al die beskuit het een ding in gemeen ... dit word met suurdeeg in een of ander vorm gemaak en dit word baie goed geknie. Dit gaan deur twee rys fases en die beskuit se tekstuur is draderig ... dis van die rys en die gluten stringe. Die hoof bestandele is meel, water, sout en suurdeeg. Druiwemos en anys is gewilde byvoegings. Die beskuite self word styf in panne gepak en dis diep panne wat die beskuit forseer om na bo uit te rys.

2. Karringmelkbeskuit en sy variasies. Hier word nie gis gebruik nie en die meel word met botter ingevryf soos waneer jy skons maak. Dis bakpoeier wat die rys agent is. Die nat element is gewoonlik karringmelk, dikmelk of yoghurt. Die beskuit word baie min geknie, inteendeel jy moenie dit baie knie nie want dan kan dit klinkers word. Jy moet ook baie seker maak jy gebruik goeie botter of bak margerien ... as jy smeer margerien gebruik gaan jou beskuit hard wees en nie bros nie. Hierdie les het ek op die harde manier geleer.

3. Gesondheidsbeskuit in sy duisende variasies. Die basis van die beskuit is normaalweg maar karringmelkbeskuit basis maar daar word allerhande sade, bessies en koring of hawermout elemente ingevoeg. Muesli mengsels is ook gewild. Heuning, stroop, bruinsuiker, molasses en dies meer vir soetigheid. Die nat element kan enigeiets wees soos yoghurt, dikmelk, karringmelk, room, kondensmelk of vrugte stroop.

Nou gaan ek bietjie vertel van my beskuit proses en ek gaan vertel hoe ek dinge doen. Dis verseker nie die "Holy grail" van beskuit maak nie maar dit werk vir my en ek het my ondervinding opgedoen deur dosyne baksels. My resep wat ek vandag hier gaan gee is spesifiek ontwikkel vir die Man Kos Krakers maar kan vir groter beskuit ook gebruik word, jy kan bolletjies maak of jy kan dit in blokkies sny.

Dit is wat gaan benodig: (Ek gaan nou nie taalsuiwer probeer wees nie.)

1kg Selfraising Flour
200ml suiker ... wit of bruin, jou keuse.
250gr Botter of bak margerien. Botter kan galsterig raak as jy die beskuit lank wil bêre.
3 koppies hawermout
2 eiers
5ml sout
10ml bakpoeier
1 koppie Safari Dried Fruit Cake Mix
2 eetlepels olie ... jy kan olyfolie gebruik.
1 blikkie kondensmelk ... dis so 380gr maar wissel van maak tot maak.
1kg Appelkoos gegeurde yoghurt. Jy kan enige geur gebruik.
4 eetlepels fyn appelkoos konfyt. Weereens, enige fyn konfyt, jou keuse. Jy kan selfs heuning of stroop gebruik.

Nou vir die metode.

Moenie te styf pak nie

Sit jou oond op 200C en laat hom warm word terwyl jy die goed gaan meng.

Die belangrikste is om al die benodighede uit te pak op jou tafel. Maak seker alles is daar en bymekaar voor jy begin om enigeiets te doen of te meng. Jy het hoofsaaklik drie houers nodig.

Kry 'n lekker groot bak waarin jy die meel gooi. Skep nou die sout en bakpoeier in die meel in en whisk dit.

Mooi baksel

Volgende rasper jy jou botter in die meel in. Jy kan dit ook in blokkies sny en ingooi.
Gebruik nou jou vingers en vryf die botter en meel inmekaar in totdat dit goed opgebreek en versprei is. Die slimmes reken dit moet soos krummels lyk ... wel ek kyk maar so met die oog en as dit lekker geel is sonder groot klonte, dan is ek tevrede.

Nou vir die droog

Gooi nou die vrugte en hawermout in die meel in en meng deur met jou vingers. Wees kalm en mediteer terwyl jy so met die meel werk. Dis nogal opvallend hoe jou siel tot rus kom as jy so met die meel vroetel.

Net reg vir die kies

Sit nou a mengbak, medium grote op jou skaal en ZERO die ding. Gooi die blikkie kondensmelk uit in die houer in. Die skaal sal nou vertel hoeveel dit is. Volgende skep jy die fyn appelkoos konfyt in. Nou vir die yoghurt ... jy soek die totale massa in die mengbak moet 600gr wees. Skep yoghurt in tot by 600 gram.

Breek nou die eiers in die mengsel en gooi die olie en suiker ook hier in. Nou moet jy die mengsel ordentlik meng. ek gebruik 'n whisk maar jy kan 'n handmenger ook gebruik.

Lekker Krakers

Gooi nou die natmengsel by jou meel en meng rustig en kalm. Moenie rof of haastig raak nie. Jy wil al die meel mooi klam kry sonder om die gluten angstig te maak in die proses. Spoedig sal jy 'n lekker hanteerbare mengel in die bak hê wat nie aan jou hande vasklou nie. Ek werk net met een hand in hierdie fase.

Kry nou jou panne reg ... ek het een groot plat pan van so 260x380mm en een van 200x200mm gebruik.

Spuit die panne mooi met koekie sproei en nou is jy reg vir die tandetrek deel van die proses. Ek weeg die deeg af in brokkies van so tussen 22 en 25gr, rol ligies in balletjie en pak in die pan. Jy wil nie die goed te styf pak nie. As ek gewone beskuit bak dan maak ek die balletjies 45gr.

 Nou oond toe ... draai die oond op 190C en laat die beskuit bak vir 15 tot 20 minute, ek kyk waneer daar 'n mooi ligbruin korsie begin vorm.

Draai nou die oond af na 170C en laat bak vir nog 20 minute. Die is beskuit en nie koek nie, so dis beter as dit so bietjie "overbake".

Haal uit die oond en laat koel af vir so 5 minute. Dop die beskuit uit op 'n vadoek en breek vesigtig uitmekaar.

Nou moet jy dit laat uitdroog. Ek pak myne in plat oondpanne maar baie mense pak dit op draadrakkies. Maak soos dit jou pas. My beskuit doog teen 70C vir so om en by 5 ure.

Die doel van hierdie Krakertjies is om 'n lekker snaxie te maak. Ek is moeg daarvoor dat my huismense die beskuit se koppe afbreek en verslind ... die krakers is my antwoord vir die soort wangedrag. Die manier waarop ek bak verseker lekker korsies. Die aanvanklike hoë hitte laat die botter vinnig smelt en bak die korsies mooi bruin.

Ek meng bruinsuker met kaneel soos vir pannekoek en strooi dit oor die balletjies voor ek begin bak.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Snaxie - lekker Corn Dogs

Man Kos is mos iets wat maklik geëet kan word ... vat dit sommer so met die hand en daar gaan jy. Nou hierdie Amerikaanse snaxie is baie lekker en verseker pure Man Kos.

Corn Dogs

Met al die publisiteit rondom al die goed wat ons mag eet en wat ons nie mag eet nie en dit wat ons verseker gaan dood maak en dit wat ongetwyfeld vet maak, word mens soms erg depressief as jy net aan kos dink.

Vir my is die belangrikste reël dat ek moet darem 'n redelike goeie idee hê van waar kom my kos vandaan. So het dit dan gebeur dat ek oor die laaste klompie jare al die gewone worsies, polonies, hoenderlewers, burger patties en viskoekies vermy soos die pes. Die goed leen hulle by uitstek daartoe dat ons allerhande gemors gevoer kan word en ons is salig onbewus daarvan.

Beslag in die glas

Hier in Nelspruit is 'n slaghuis, Meat Delights ... en by hulle koop ek die worsies waarvan so baie van ons hou. Ek vertrou die slagter dat sy nie long, poepol en tong in my worsies sal sit nie en dis goed genoeg vir my.

Rol in die meel

Corn Dogs is uit en uit 'n Amerikaanse skepping en die laaste klompie jare sien ons dit by feeste en Saterdag Markte. Sover ek kon vasstel is die naam Corn Dog blykbaar omdat daar mieliemeel in die beslag gesit word. Ek sit Jan Pap se Braaipap meel in myne want dis lekker grof. Jy kan enige mieliemeel insit wat jy het, ek sien dat sommige mense polenta in sit.

In die diepvet braaier

Nou wat presies is die Corn Dog ... dis eenvoudig ... bloot net 'n worsie wat op 'n stokkie gedruk word, in die beslag gedoop word en dan in diepvet gebraai word. Klink eenvoudig maar jissie ... dis lekker.

Die belangrikste ding is dat jy moet jou beslag aanmaak en dan gooi ek dit in 'n glas, 'n Glas wat diep genoeg is sodat die worsie mooi in die beslag ingedruk kan word. Dis belangrik want anders gaan jy sukkel. Tweede ding is, maak seker jou gekose worsies is mooi droog, ek droog hulle af met papierhandoek. As jy dit nie doen nie gaan jy probleme kry met die vog in die diepvet en jou beslag gaan nie lekker klou nie. Laastens is dit nodig dat jy die worsies in koekmeel rol voordat jy dit in die beslag doop.

Nou as jy al die dinge gedoen het dan kan jy redelik seker wees die braaiery gaan goed afloop. Ek maak my olie so 175C to 180C warm. As jy nie 'n diepvet braaier het nie, gebruik 'n groot pan want dis belangrik dat die worsie met stokkie en al mooi in die olie kan ingaan.

Hier is die resep ...

6 sausages / hotdogs - Ek gebruik gewoonlik Frankfurters of Russians.
1 Koppie Self Rising flour - as jy nie het nie. Gewone meel plus 1 Teelepel bakpoeier.
1 Koppie Mieliemeel
1 Koppie melk
1 eier
Sout en Peper ... ek gooi ook Braaivleis speserye in.
Olie vir die diepbraai.

Gooi alles in 'n bak en meng goed. Dis 'n baie stywe beslag en dis wat jy soek.

Steek nou stokkies in die worsies en doop in die beslag. Dan olie toe. Vir so 7 tot 8 minute. Moenie die olie te warm maak nie want dan gaan die deeg brand.

Hier is 'n video van hoe dit gedoen word ... Corn Dogs

Ek het al omtrent al die worsies wat hulle maak so gebraai, ek hou nogal van die Russians maar my familie verkies die gewone Frankfurters.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Snaxie - Man Kos Muffins

Die debat oor skons en muffins sal seker nooit eindig nie maar dis ook nie belangrik nie ... wat belangrik is, is hoe smaak dit en hoe maklik is dit om te maak.

By Man Kos is dit my missie om goed te maak waarvan mans hou en wat mans self kan maak. Nou elke man hou daarvan om so ou peuseldingetjie op te tel en dan rustig te staan en eet terwyl sy gedagtes op vêr paaie gaan.

Vir my is daar min dinge so lekker soos 'n souterige muffin en ek het al baie resepte gemaak om die een te kry wat vir my die NOMMER EEN is. Na baie eksperimente dink ek dat ek nou die regte een het ... dis een wat maklik is en omtrent altyd reg uitkom. Meer belangrik is die feit dat mans die goedjies self kan bak.

Ek gaan nou eers oor die vulsel praat en dit is belangrik dat jy die met 'n oop kop lees want die moontlikhede is onbeperk.

Almal van ons beleef die realiteit van oorskiet vleis na 'n braai of groot aansit ete. Elke stukkie vleis wat oorbly kan werk vir hierdie Man Kos Muffin.

Begin deur die vleis in klein blokkies op te sny. Jy soek stukkies omtrent so groot soos 'n ertjie pit. Jy het omtrent 'n poedingbakkie vol nodig. Ek kerf ook suur uitjies in. Ek sit hierby nou so blêrtsie blatjan en een baie fyn gekapte rooi rissie. Die vulseltjie moet krag hê. Toets hom maar mooi voor jy ontspan, hy moet amper te sterk wees.

Nou rasper ek ook so handvol lekker sterk cheddar kaas.

Die grootste fout wat jy kan maak is om oordadig te raak met die vulsel per muffin. Volg my aanwysings en kyk na die fotos.

Kry jou oond nou warm ... 230C

Nou vir die deeg ... en die is baie eenvoudig.

Bestandele

BESTANDELE:

1 x Koppie melk
2 x Groot eiers
1/2 x koppie olie ... Jy kan enige olie gebruik en kies maar na smaak.

Klits nou die mengsel baie goed.

Voeg nou by ...

Eerste lagie deeg

1 x Koppie koekmeel
2x Teelepels Bakpoeier
1/4 x Teelepel sout.

Jy kan nou speserye na smaak byvoeg soos growwe swartpeper, cumin, coriander, ginger, mixed herbs ensovoorts ... enigeiets wat vir jou lekker smaak.

Kaas

Meng die nou by jou melkmengsel en klits goed met 'n whisk sodat jy 'n mooi gladde deeg kry. As die deeg nie lekker loperig is nie kan jy so bietjie melk byvoeg.

Vat nou 'n 12x holte muffin pan en spuit met koekie sproei.

Vulsel

Nou is dit belangrik dat jy nie kop verloor en sommer deeg in die pannetjies begin gooi nie. Sit nou een eetlepel deeg in elke pannetjie in.
Dan so klein bietjie kaas in elkeen.
Nou so eetlepel van jou vleismengsel.
Weer so paar stringetjies kaas.

Nou gooi jy een eetlepel deeg bo-oor alles. Versprei dit mooi en werk maar saggies met die lepel om die deeg mooi in te kry. Hierdie volume is net genoeg vir 12 muffins.

Nog kaas

Probeer vinnig werk want onthou, sodra die bakpoeier vog kry begin dit aktiveer en jy wil darem soveel as moontlik rys uit die muffins kry.

Laaste sprinkel ek nog so paar stringetjies kaas en so bietjie braai sout.

Oondrak in die middel en die pan is in.

Laaste deeg lagie

Onthou, die oond is baie warm en die mengsel het baie olie in. Daardie warm oond is baie belangrik om die muffin 'n lekker bros korsie te gee.

Hou maar dop ... jy soek die muffins so goudbruin kleur. Dit vat so tussen 10 tot 15 minute.

Klaar gebak

Hierdie is baie lekker en is so aanpasbaar dat jy nooit weer oorskiet vleis sommer net verlore laat gaan nie. Ek het al braaivleis, hoender, lewer, niertjies en wors gebruik om die muffins te maak.

En dit is my Man Kos Muffins wat mans maklik kan maak.

Hierdie muffins hou goed in die yskas en dit is baie lekker om in 'n kosblik te pak.

Die olie maak seker dat dit nooit droog en soos wurgkoek proe nie.

Jy kan die resep maklik aanpas om ook soet muffins te maak. Gooi net so twee eetlepels suiker in die deegmengsel en dan gebruik jy glansvrugte of droë vrugte vir die vulsel.

Heerlik

Ek sit soms gemengde groente net so uit die gevriesde pakkie in en dan gebruik ek die muffins by etes in plaas van rys of aartappels.

Dis veral lekker saam met kerrie en 'n lekker sous. As jy dit by kerrie gebruik dan verkies ek om die soet variasie te maak.

Nooit droog nie

Gebruik jou verbeelding en dink so bietjie buitekant die boksie ... hierdie is 'n baie aanpasbare resep en kan sommer maklik nuwe vonk in 'n gewone maaltyd sit.

Jy kan die vulsel met ingemaakte vrugte maak en saam met 'n slim spesery mengsel en 'n lekker vla is dit sommer 'n slim nagereg.



Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Snaxie - Weer 'n steak broodjie

Ek het die storie oor steak broodjies al voorheen vertel maar die een was so lekker ek moet dit deel.

Lekker steak

Een lekker super stukkie rump ... en ek kan hom gaarmaak presies soos ek daarvan hou want niemand gaan hier saam eet nie.

Rare is presies wat die stukkie bees verdien.

Twee lekker snye bruin brood, so bietjie uitgebraaide varkvet ... ek kry dit as ek kaiings maak en twee goeie skywe lekker kaas.

In die pan

Sny repies van die steak, smeer korrelmosterd op die brood, pak die kaas, dan steak en dan weer kaas.







Maak die toebroodjie toe en smeer liggies met varkvet aan die buitekante.



Nou in a medium pan, moenie te warm wees nie want jy wil dat daar a lekker bros kors vorm en die kaas moet begin smelt.

Lekker Man Kos

Draai die broodjie om en doen die anderkant.


Siedaar ... Man Kos uit die boonste rakke.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Snaxie - Jellie rolletjies

Jellie rolletjies

Hierdie is nou verseker nie regte Man Kos nie maar dis iets wat die manne maklik vir die kinders kan maak.



Dis maklik en vinnig maar dit lyk sommer lekker en is pret.


Jy benodig ...

Min bestandele

1x Pakkie Jellie
1/2 koppie water
9 groot Marshmellows
200mm x 200mm glasbak.









Dis belangrik dat die bak die regte grootte is want anders is die lagies te dik of te dun.

Spuit die glasbak liggies met jou koekie sproei en vee die bak dan mooi uit met kombuispapier. Jy soek 'n baie dun lagie sproei in die bak.

Jellie is opgelos

Eerste stap ... gooi die jellie en 'n 1/2 koppie water in a mengbak en klits goed.

Sit nou in die mikrogolf oond vir 60 sekondes en klits weer. Maak seker al die jellie is goed opgelos.

Voeg marshmellows by jellie

Snipper nou die 9 groot marshmellows op. Jy kan die kleintjies gebruik as jy dit kan kry. Jy soek 1 koppie marshmellows.

Gooi dit by die jellie en roer.

Marshmellows is opgelos

Sit die bak nou vir 30 sekondes in die mikrogolf oond. Die marshmellow behoort nou gepof te wees. Roer goed sodat alles mooi kan oplos. As jou marshmellows nie heeltemal oplos nie, sit vir nog 10 sekondes in die mikrogolf.

Reg vir die yskas

Gooi die mengsel nou in jou gesmeerde glasbak en sit in die yskas. Die twee bestandele sal skei tydens die stol proses. So uur of wat. Moenie te haastig wees nie.

Sny los en begin rol

Haal die gestolde bak uit die yskas en sny die kante versigtig los met a skerp messie.

Maak een kant versigtig los en en begin die rolletjie.

Onthou om versigtig te wees, die marshmellow klou dadelik vas as dit aanmekaar raak.

Reg om gesny te word

Rol nou mooi styf op en haal die rol versigtig uit die bak uit en plaas op jou snyplank.
Ek het myne met dental floss gesny. Jy kan garing of vislyn gebruik. Ek trek die toutjie onder die rol in, en sny so 20mm dik skywe. Met die lyn onder die rol, bring die twee punte op en gaan oorkruis. Trek nou styf. Die lus sal deur die rolletjie sny.

Jellie en marshmallow rolletjie

En daar het jy dit ... pragtige, prettige jellie en marshmallow rolletjies.

Jy kan die rolletjies in jou koekstruif gebruik vir bietjie styl.

Kook lekker tot ek weer 'n storie skryf.






Hier is my Facebook bladsy ... Man Kos ... Like hom as jy wil.

Snaxie - Man Kos Twisters

Soos ek manne ken is hulle altyd lus vir ietsie om aan te knibbel of te kou. Die pikante klein vingerhappies is gewoonlik gewild maar dit is so fraai en fyn dat die manne sommer hande vol moet vat en dit laak die ouens soos vrate lyk.

Man Kos Twisters

Hierdie twisters van my is nie iets nuut nie en daar is honderde voorbeelde op die internet. Enigste verskil is ek het so bietjie ingeklim en mooi gedink voor ek die goed gemaak het. Myne het so bietjie lyf en die manne kan een op 'n slag vat sonder om verfynd te voel.

Min bestandele

Begin met twee rolle blaardeeg (Skilferkors of Puff Pastry)

Strooi meel op jou werkbank en rol een versigtig oop. Ek dop hom dan om sodat die plastiek bo is. Rol hom nou liggies met die koekroller. Dis meer om die krakies wat kan vorm plat te kry.

Sit jou vulsel op

Dop die vel nou weer om sodat die plastiek onder is. Ek doen dit want netnou gaan jy die deeg nogal sterk uitrol en die plastiek gaan help om te keer dat dit vasplak.

Strooi nou lekker sterk cheddar kaas oor die vel. Moenie swig voor die versoeking om dit te dik te strooi nie. As jy dit te dik maak gaan jy sukkel.

Maak die pakkie toe en rol

Sprinkel nou jou keuse van braaispeserye oor die kaas. Ek strooi ook so bietjie chili flakes oor en rooi peper.

Pak nou een lagie Lays tjips oor die kaas.

Rol die tweede vel ook nou oop en rol liggies. Moenie die plastiek aftrek nie. Lê nou die tweede vel bo-oor die eerste een sodat alles toe is onder die deeg kombersie.

Sny jou repies

Nou moet jy redelik sterk rol om die twee velle deeg met mekaar te laat kennis maak. Dit is hoekom jy nie die vulsel te dik te pak nie want anders gaan die twee velle nooit iewers kontak maak nie en dan gaan jy sukkel.

Sprinkel nou weer so bietjie speserye en fyngemaakte chips oor die deeg en rol weer liggies.

Nou sny ek die hele pakkie oor sy lengte middeldeur. 'n Pizza cutter werk nogal goed maar jy kan 'n lekker lang skerp mes ook gebruik. Pasop net dat jy nie die ding uitmekaar trek as jy die mes oplig nie.

Nou kom jy by die groot besluit ... gaan jy dit klein en fyn doen of gaan jy Man Kos maak. Ek sny my stroke so om en by 15mm wyd. Sny almal klaar voor jy begin om die repies op te tel.

Vat jou platpanne en spuit met koekie sproei. Lig nou die strokies versigtig op en draai twee draaie. Pak op die koekie panne. Verf almal mooi egalig met geklopte eier en sit die panne in jou vrieskas.

Sit in vrieskas vir so 20 minute

Sit nou jou oond op 200C ... dit vat myne so 20 minute om warm te word. Dis genoeg tyd om die deeg in die yskas ferm te kry.

Heerlik en met lyf vir die manne

Dis belangrik dat die oond goed warm is want daardie hitte is nodig om die deeg te laat pof. Na sowat 15 minute draai ek die oond af na 170C toe vir nog 20 minute. Hierdie tye is aanduidings, hou die goed dop dat dit nie brand nie.

Nouja sowat 30 minute later het jy lekker Man Kos Snaxies.

Speel met die vulsel ... jy kan poeier biltong tussenin sit.

Lekker kook tot ek weer 'n storie skryf.

Hier is my Facebook bladsy ... Man Kos ... like hom as jy wil.