Prima Rib - Fees vir Vleisvreters

1.8kg Grotman Chop

So twee weke gelede stap ek by my gunsteling vleiswinkel in en ek steek dood in my spore vas. Daar in die vertoonyskas staan 'n stuk vleis op 'n houtplank, kompleet met 'n bankskroef. Mensig maar dis 'n mooi prentjie. In my geestesoog sien ek al hoe die mes teen die been afgly ... en my mond begin water.

Ek wink vir Wimpie nader ... "Hoeveel vir die stuk vleis en die bord ?"

Sag en sappig

Tien minute later sit ek in my kar en skud my kop ... ek gesels kliphard met myself. Ek beter hulp gaan soek ... hierdie ding van my en vleis is nou besig om handuit te ruk. Ek steek 'n Camel aan die brand en kyk hoe die blou rook rustig by die venster uit trek .... Nee ek kort nie hulp nie ... ek is 'n man en ek is 'n vleisvreter.

My grootste uitdaging was om te besluit wie gaan ek nooi om hierdie pronkstuk saam met my te eet ... dis 'n reuse stuk vleis ... 1.8kg ... dis baie en hoe hy gaar gemaak moet word is baie belangrik. Daar is geen manier dat hy "medium well" kan wees nie ... dit sal omtrent dieselfde wees as om 'n aandpak aan te trek op 'n jagtog ... hoogs onvanpas en moet net eenvoudig nie gedoen word nie.

Teen die tyd dat ek by die huis aankom het ek my besluit geneem. Ek sal my oudste, Jacques, nooi vir die fees ... hy is baie lief vir vleis  ... die ideale gas vir die geleentheid.

Lekker man

Ek gaan nou nie Poppie se presiese woorde herhaal wat geuiter is toe ek by die kombuis instap en die stuk vleis en plank op die kombuistafel neer sit nie ... al wat ek gaan sê is dat daar wilde gesigsuitdrukkings was wat gewissel het tussen totale stomheid en passievolle uitlatings ... heeltemal teveel F's in vir publieke publikasie.

Nouja ... met sorg lê ek die pronkstuk neer in my yskas se onderste laai ... dis waar ek my vleis verouder ... hierdie kneuwel is wel reeds verouder maar ek gaan hom beslis nog so 14 dae of wat gee.

Die opvolgende dae doen ek baie navorsing ... ek is nie 'n man wat skrik vir vleis op die vuur nie maar hierdie is 'n baie groot stuk vleis ... 1.8kg en so 35mm dik ... nie jou tradisionele braaivleis biefstukkie nie.

En so breek die dag aan ... Sondag ... en ek haal die Grotman Chop uit die yskas uit. Eers smeer ek hom mooi met Suurlemoen gegeurde olyfolie en dan strooi ek gemaalde peper lekker ruimskoots oor die vleis. Ek druk die peper mooi vas en maak die pan toe met kleefplastiek. Nou moet hy rustig lê tot hy by kamertemperatuur is.

Twee uur gan die stuk bees rooster toe. My braaier, 'n gas braaier is op sy warmste en die temperatuur onder die deksel klim tot by 450C. 6 minute aan elke kant en toe skuif ek hom van die roosters af na die sogenaamde "infra-rooi" braaiplaat toe. Die interne temperatuur van die vleis is nou 38C maar daar is 'n mooi kors op die vleis. Nog 3 minute op elke kant en die temperatuur is 63C.

Vleisvreters

Ek lig die vleis af van die braaier af en op die plank. Nou moet hy 8 minute rus ... seker die belangrikste deel van die kook proses.

Almal in die kombuis staar met groot oë na die chop ... vir my is dit 'n kunswerk.

Agt minute later gly die mes teen die been af en die vleis lyk heerlik. Ek sny dit op in repies, vra die Seën en toe sak ons twee manne in daai vleis in. Daar word min gepraat ... net gekou en lippe word afgelek.

Net vleis en brood ... ManKos uit die boonste rakke. Nie sleg vir 'n eerste poging met so reuse stuk vleis op die braaier nie. Volgende een sal ek afhaal op 60C.

Ek koop my vleis by El Madre Slaghuis in Nelspruit. Vra maar vir Wimpie.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Bees - Beesstert bly darem lekker

Daar is baie mense wat sommer dadelik aan die ril gaan as jy net die woord afval noem en daar is ook baie mense wat gladnie beesstert koop nie ... maar ek het ook al gesien hoe dieselfde mense gretiglik skep as daar 'n beesstert potjie iewers gemaak word.

So tydjie terug het Foodlovers Market 'n spesiale aanbod op Beesstert - 69.00 / kg. Na twee mislukte besoeke kry ek toe op die laaste dag darem 'n kans.

Ek sien op die pak dat die vleis kom van Argentinië af ... en terwyl ek die pakkie se etiket lees verdwyn omtrent 70% van die pakkies uit die yskas in trollies in. Een man langs my laai twee trollies vol.

Ons is baie lief vir beesstert maar genade die goed het darem duur geword en ek pak met mening in my mandjie in.

Tradisonele Beesstert

Tuis gekom en ek meng my tradisionele "afspoel" water in 'n mengbak. Poppie staan my en aankyk terwyl ek elke pakkie mooi afvee met 'n vadoek wat ek in die bakkie water nat maak. Water, bietjie Jik en so blerts suurlemoensap. Ek gee nie om oor wat sy dink nie maar dis hoe my ma my geleer het en ek is nogal gatvas oor kieme in my kos.

Twee stapeltjies van vier en een weeskind. Ek pak die agt pakkies in die vrieskas en glimlag ... vir die afsienbare toekoms hoef ek nie weer te knor oor duur beesstert nie.

Die weeskind gaan yskas toe ... dit gaan Sondag se ete word.

Sondag so by die middel van die dag is dit tyd vir ek en die beesstert. Ek trek 'n lekker ysterpan nader en maak vuur onder hom. Mense berei beesstert op basies twee maniere voor ... Vaal Stert waar die stert in 'n pot gegooi word en saam allerhande dinge gekook word tot hy sag is of ... jy braai die stert stukke in 'n lekker warm pan of pot dat dit sulke mooi bruin korsies maak. Vandag doen ek die braai eers en kook later ding.

Ek braai so paar stukke op 'n slag tot mooi goudbrun en toe plaas ek dit in my stoompot. Grof gekapte uie en wortels en drie medium aartappels so met skil en al. Ek kook altyd die aartappels so in die stoompot as ek 'n bredie gaan maak want daai stoomgekookte aartappel help om die sous te verdik want dit val uitmekaar in die finale stadium. Twee hooggehoopte lepels van Ina Paarman se Vegetable Stock poeier en grofgemaalde peper. Nou gooi ek so twee koppies water in.

Dan laat ek tegnologie maar sy ding doen, ek gebruik 'n AEG Elektriese stoompot ... daai goed wat op die stoof moet staan vervul my met angs en vrees. As jy nie 'n drukkoker het nie kan jy die aanvanklike proses in 'n oondbak doen met 'n deksel en dit vir 3 ure op 140C laat bak.

Natuurlik kan jy die hele proses ook in 'n potjie op die vuur doen.

50 minute later slaan die pot oor na "WARMING" toe en ek laat dit maar staan. Dis skrams na 14h00 en nog te vroeg vir aandete.

Teen 16h00 begin ek met die afronding ... ek bou 'n lekker basis vir 'n goeie sous in 'n ysterpot ... braai uie in varkvet, voeg gemaalde peper en "roasted masala" by en toe koekmeel om 'n lekker pasta te vorm. Ek gooi die aftreksel af  uit die stoompot en gooi dit oor die sousbasis. Roer verwoed met 'n sterk metaallepel en maak seker ek skraap elke stukkie aanpaksel van die pot bodem af los. Weldra kalmeer die woeste kokery en ek sien hoe die sous verdik. Ek pak nou alles uit die stoompot uit in die sous in behalwe die aartappels en wortels ... hulle is goed gaar en ek hou dit eenkant in 'n bakkie ... dit sal later teruggaan in die pot in net om op te warm.

Biscuits and Gravy

Tot dusver het ek nog aan niks geproe nie want die kanse is goed dat dit maar goor gaan proe want niks is nog gebalanseer nie. Nou is die tyd vir jou om bietjie meer smaak in die pot te gooi en jy kan enige bottel sousies, stropies en poeiertjies by gooi om jou smaak te pas.

Ek laat die pot op 'n baie lae vlam prut en roer elke 15 minute met die metaallepel. Soos die tyd aanstap begin daai bredie nou houding kry. Na 45 minute is dit tyd om nou die finale afronding van die smake te doen.

Eerste wil ek die suur smaak regkry en gooi a goeie blerts suurlemoensap in die pot ... jy kan asyn ook gebruik. Proe ... as jy die suur goed kan proe is dit Soet se beurt.

Nou die soet kan jy doen met suiker of heuning of konfyt ... sit bietjies vir bietjies by totdat jy net die soet kan begin proe maar die suur moet ook daar wees. Moenie nou sout insit nie, dit gaan jy heel op die einde doen.

Dik beesstert sop

Ek gooi nou gekerfde groenboontjies in die pot en sit ook die wortelstukke in. Laastens sny ek die aartappel in wedges en plaas in die bredie. Roer versigtig want jy wil nie die groentes teveel opbreek nie.

Laat prut nou vir nog 15 minute en dan toets jy vir sout ... kry dit reg en as die sous bietjie dunnerig is kan jy dit nou verdik met met mielieblom, Maizina.

En dit is dit vir die beesstert. Ek maak nie stysel by nie maar dis jou keuse. Ek bedien die bredie in diep borde saam met vars Brood om daai sous op te slurp.

Aartappel Skywe

In my huis het ek en Poppie van die groter stukke geskep Sondag aand en die res is yskas toe.

Maandag aand het ek skons gebak en ons het die oorskiet op die Amerikaanse Biscuits en Gravy manier voorgesit.

Die oorskiet is weer yskas toe, nou was al die groter stukke weg en die bak het slegs lekker sous met beesstert flenters in gehad.

Dinsdagaand het ek aartappel skywe gemaak ... die Amerikaners noem dit Potatoe Planks. In die oond gebak in varkvet, jy kan olie gebruik, totdat dit sulke "oversized crispy chips" was. Ons het dit geëet saam met die laaste sous wat nou maar net 'n dik sop was.

En so trek daai R109.00 se pakkie beessstert ons deur 3 maaltye.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Bees - Kerrie met stamina

Deesdae is ek baie ingestel op die maak van smaaklike kos wat nie mens se begroting uitmekaar ruk nie. Ek glo al die kookprogramme wat ek kyk het my al sterk beinvloed en dis ook reg so.

Dis waarmee ek begin

Ons almal sien hoe kospryse net bly styg en vir baie mense begin dit ernstig raak. Ons as Afrikaners is tradisioneel nie baie puntenerige mense as dit by kosmaak kom nie want ons kook om gesinne te voed. Ons is ook baie geneigd om die goedkoop vleisnitte half skeef aan te kyk.

So vir die volgende paar stories gaan ek daarop fokus om lekker kos te maak wat nie 'n arm en 'n been kos nie.

Vleis afgensy van die bene af.

Vandag se storie gaan oor kerrie en die moontlikhede daarvan. Dit is egter baie belangrik om daarop te let dat die geure absoluut in jou hande is, ek gaan jou net so paar metodes wys wat die finale dis baie aantreklik gaan maak.

Jy benodig ...
1. Gekapte uie
2. Wortels wat in ringetjies gesny is
3. Gekerfde boontjies
4. Aartappel wat in blokkies gsny is

Braai die vleis bietjie

5. Braaivleis spesery, kerriepoeier, tamatiesous, suurlemoensap, suiker, sout peper en Worcestershire sous.
6. Koekmeel
7. Ina Paarman se boepens botteltjies met sous poeier in. Ek verkies die Chicken of Bruin Uie sous.
8. Brisket stukke.

Gebraaidse uie en vleis

Ek begin met 'n pakkie Brisket en soos ons almal goed weet, dit kan maar 'n taai storietjie wees. As ek die bredie tipe disse maak dan werk ek op so 150 gram vleis per persoon. Ek maak so bietjie toegewings vir die vet en bene in my berekening. 'n Pakkie van so 400 gram tot 500 gram is genoeg vir twee groot mense en gaan so bietjie oorskiet laat vir die volgende dag se snaxie.

Sous mooi aan die gang

Ek begin deur die vleis van die bene af te sny en dan in blokkies van so 25mm. Ek plaas die blokkies in 'n bak en begin my speserye by te voeg. Jy kan regtig dit gebruik waarvan jy hou en een van die kerrie mengsels van die rak af gebruik. Ek meng maar my eie kerrie mengsel maar dis nie belagrik nie. Maak seker jy geur die blokkies lekker ... en dis net poeier, niks vog nie.

Nou gebruik ek 'n lekker swaarboom pot en skep so twee eetlepels varkvet in ... jy kan olie gebruik, sonneblom of canola ... nie olyfolie nie. Sodra die olie lekker warm is gooi ek so half teelepel growwe peper en en so bietjie masala in die olie ... jy kan enige van jou spesery mengsel gebruik. Skep ook nou 'n goeie lepelvol van jou gekose kerriepoeier in. Dis belangrik dat jy die kerrie poeier kans gee om lekker warm te word.

As jy sien die speserye begin skuim, gooi die vleis in en roer vinnig met 'n houtlepel. Nou moet jy die vleisies kans gee om te braai. Sodra dit mooi gebraai is skep jy dit uit in 'n bakkie en hou een kant.

Kyk of jy genoeg olie/vet in die pot oor het en gooi by as jy sien dis bietjie droog. Braai nou jou gekapte uie in dieselfde pot. Jy wil dit net sag en deurskynend kry. Skep dit ook nou uit in 'n bakkie vir later. Ek haal altyd my uie uit want as jy dit in los en die kerrie kook gaan jy die uie wegkook.

Klaar en reg vir opdien

Nou moet jy weer kyk of daar genoeg olie in die pot is ... top maar op as dit nie genoeg is nie, jy soek so om en by 3 eetlepels se vet in daai pot. Jy sal ook merk dat daar nou al heelwat goed in die pot bodem begin aanpak ... dis wat jy wil hê. Sodra die olie/vet weer lekker warm is, gooi twee eetlepels koekmeel in die vet en roer ... jy soek so olie/meel pasta. Roer goed en gee dit so minuut of wat om bietjie deur te kook.

Gooi 500ml koue water in 'n maatbeker saam met twee opgehoopte teelepels van die Ina Paarman sous poeier van jou keuse. Roer maar, dit gaan klonterig lyk maar dis ok want die poeier hou nie eintlik van koue water nie.

Die olie/meel pasta behoort nou redelik dik aan te pak in jou pot. Gooi die helfte van die sous water nou in die pot in. Dit behoort regtig kwaai te spoeg en spat, gebruik nou 'n metaal lepel en krap al die aangepakte goed los ... die mengsel behoort baie vinnig te verdik, voor dit weer begin vas brand, gooi die res van die water mengsel in. Roer baie goed en skraap daai pot mooi skoon. Op die stadium behoort daar nou lekker dik sous in die pot te wees en nou draai jy die hitte af na laag toe.

Skep die gebraaide vleis nou in die pot en as die sous bietjie dik lyk, gooi 'n koppie water by. Op die stadium gooi ek ook die bene in die pot in, daar is baie smaak in die bene. Roer goed en sit die deksel op ... nou moet hy prut vir so 30 tot 45 minute sonder om aan te brand. Roer maar so elke 10 minute met die metaal lepel en skraap daai bodem terwyl jy roer. Ek is nie bang vir die ekstra water nie want ek kook dit af op die einde, as jy te min water insit gaan jy sukkel met aanbrand.

ManKos Bunny Chow

Na 45 minute gooi jy weer water in as die sous te dik lyk vir jou, onthou, nou moet jy die groente gaar kook saam met die vleis en dit gaan so 30 minute neem, as jou sous aanvanklik te dik is gaan dit maklik aan brand.

Sodra jy tevrede is dat die groente sag is gooi jy die uie terug in die pot ... roer mooi deur en laat prut vir so 5 minute.

Nou is die tyd om die pot af te rond, gooi 'n goeie blerts tamatiesous in en 'n spuit Worcestershire sous. Roer deur en nou begin jy proe.

Die eerste proe kan dalk baie moontlik redelik sinneloos proe maar jy moet weet waar jy begin.

Heel eertse gooi jy nou suiker in ... of appelkooskonfyt of heuning ... roer deur en proe ... jy moet nou die soet kan proe.

Volgende kom die suurlemoen of asyn ... gooi bietjie by, roer deur en proe ... jy moet die soet kan proe en die suur ... die vat soms bietjie oefening maar ek noem dit nou sodat jy weet waarheen mik jy. Tot op die stadium het ek nog geen sout ingesit nie ... die rede hiervoor is dat baie van die mengsels wat gebruik is, het sout in. Sodra jy tevrede is dat die soet en suur mooi in balans is, dan moet jy besluit oor die sout ... onthou, sout is 'n smaakmiddel en nie 'n geurmiddel nie. Sout verbreed die smaakprofiel ... wees versigtig. Ek skep gewoonlik so teelepel vol sous en dan sprinkel ek sout op dit en proe ... dit gee my 'n goeie idee hoeveel sout ek moet bygooi.

Nou is alles mooi in balans en as jy voel dat die kerriesous nie hard genoeg skop nie, gooi maar so paar druppels peri-peri sous in soos Tabasco.

Nou het jy 'n lekker stewige kerrie stew in daai pot wat jy op verskeie maniere kan opdis. Pap, aartappel, rys, koring of net in 'n uitgeholde broodjie as 'n bunny chow.

Natuurlik is daar miljoene smaak variasies moontlik maar my doelwit is net om jou die basiese idees van die metodes te laat snap. Om die kerrie te maak gaan so twee tot twee en half uur neem, so dis nie kitskos nie.

Vir bietjie luuksheid steek ek die sous met die kerrie/masala en dan op die einde maak ek hom mak met lekker dik room wat ek by roer.

Wat belangrik is om op te let is dat ek alles in die een pot gedoen het. Soos die proses aangeloop het het elke keer geure en smaak van die vorige proses oorgedra na die volgende stap toe.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Lewer - Bees is lekker

Baie mense trek hulle neuse op vir afval oor die algemeen en lewer word skeef aangekyk. Ek kan dit verstaan maar ek kan dit nie regtig klein kry nie. Lewer is baie lekker vir my maar daar is darem so bietjie kuns in die voorbereiding. Die grootste fout wat die meeste kokke maak is om die lewer dood te kook ... wel dan eindig jy op met 'n taai, rubberige droeë ding wat jy moet af wurg.

Lewer en soet uie

Ons leef in 'n tyd waar meeste van ons maar die sente moet omdraai en vleis het duur geword. Lewer is oor die algemeen baie bekostigbaar en goeie waarde vir geld.

Onthou ... op die jagveld word die lewer soms sommer net so rou ingesluk en jy hoef dus nie regtig die stuk vleis te kook of braai dat hy soos 'n skoensool uitdraai nie. Wat jy soek is ligpienk sonder vry bloed.

Lewer en veral bees lewer is baie goeie waarde vir geld. Ek koop my bees lewer deesdae by PnP en hulle sny dit in lekker hanteerbare skywe. Ek sny die skyf so bietjie kleiner, omtrent so groot soos my hand want ek het nie so groot pan wat die hele skyf kan hanteer nie.

Ek vra om verskoning vir die gebrek aan fotos, ek het nie regtig gedink ek gaan die resep ooit publiseer nie.

Om lekker lewer op die bord te sit is eintlik verspot maklik mits jy weet hoe om dit te doen.

Eerstens week ek die lewer in melk vir so 30 minute en dit laat die lewer ook min of meer by kamertemperatuur kom. Ek gebruik 'n vierkantige glasbak sodat die stukke mooi plat lë. Moenie die lewer in te klein stukke sny nie want dan gaan jy dit baie maklik te gaar maak.

Volgende gebruik ek 'n plat bak en gooi koemeel daar in. Ek gooi ook braai speserye en kruie soos Robertson's se Mixed Herbs in die meel en meng dit goed. Moenie snoep wees met die meel nie want dan gaan jy sukkel met die bedekking van die lewer. Ek bêre die oorskot meel in 'n bottel in my yskas vir volgende keer.

Kry nou 'n lekker braaipan op die stoof en laat hom warm word. Ek gebruik gietyster panne ... as jy 'n pan met 'n dun bodem gebruik moet jy wakker staan. Jy soek medium hoë hitte, Ek gebruik 'n mengsel van varkvet en klapper olie om in te braai maar jy kan dit gebruik waarmee jy gemaklik voel. Ek sal nie botter gebruik nie want dit brand te maklik. Jy wil 'n goeie lagie olie, so om en by vuurhoutjie dikte in die pan hê ... tipiese vlakbraai.

Ek gaan aanvaar dat jou lewer so om en by 10 tot 15mm dik gesny is ... so min of meer vinger dikte.

Net melk en meel

Lig die lewer uit die melk en plof dit in die meel. Draai so keer of wat om dat die snykante mooi bedek is met meel ... die natuurlike kante sal nie sommer meel vat nie maar dis nie belangrik nie.

Ek sit die stukke op 'n droeë bord om pan toe te vat. Bedek net genoeg stukke vir die pan, jy wil nie dat die stukke lê met die meel aan nie want dan gaan dit nat word en afval as jy dit in die olie sit.

Die olie behoort nou lekker warm te wees ... strooi jou gunsteling braaispeserye in die warm olie ... ek gebruik deesdae Robertson's se Chicken Spice. Jy sal sien die speserye begin skuim ... dis wat jy soek.

Let daarop dat ek gladnie eier gebruik nie ... net die melk en meel.

Wees geduldig dit is die moeite werd

Plaas die stukke versigting in die pan en maak seker jy hoef nie dit rond te skuif nie. Dis baie belangrik dat hy net so doodstil bly lê to die korsie gevorm is. As jy dit te vroeg rondskuif gaan jy die korsies breek en verloor want die lewer stel baie vog vry terwyl dit braai en dit wil die kors afdruk. Nou strooi ek my braaispeserye oor die roukant so in die pan ... en let daarop dat ek geen sout opsit nie. By die omdraai slag gaan die speserye deel vorm van die korsie.

Moenie rondloop nie ... staan by die pan en hou die lewer dop ... dis maar net so 5 of 6 minute. Sodra jy sien die kors het gevorm en dat daar bloederigheid of skuim bo-op die lewer vorm, gebruik 'n spatel en keer die lewer versigtig om ... ek gebruik 'n klein eierspaantjie. Druk die spaan versigtig onder die lewer in en maak seker jy kry die korsie mooi los van die pan voordat jy dit oplig.

Nou op die tweede kant gaan hy so knertsie stadiger braai want die pan is effe koeler maar meer belangrik, die braai het vog opgedruk in die lewer in en dit gaan nou op die warm pan beland. Weereens wees geduldig ... laat die kors vorm en dan is dit moontlik dat daar so effense bloederigheid tussen die reeds gebraaide kors kan deurkom.

Die lewer is nou baie naby aan reg ... flip hom weer om, net vir 30 sekondes en plaas dan in 'n bak met handoekpapier. Laat die gaar lewer net so rus in die bak vir tenminste 5 minute voor jy dit opdien. As jy die lewer sny behoort dit nou so mooi ligpienk te wees met die lekker korsies.

Tradisioneel word lewer bedien met gebraaide uie wat effe soet gemaak is. Ek hou daarvan om suurlemoenstroop in die uie sous in te werk.

Soos met alles, gaan jy beter word hoe meer jy dit doen. Volg my riglyne en jy is op die regte pad na heerlike sagte sappige bees lewer. Gelukkig is dit goedkoop sodat jy kan oefen. Vermy "overcooking" want dis die soort ding wat mense afsit van lewer.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Biltong - Maak dit self

Biltong ... dis byna 'n towerwoord vir Suid Afrikaners en daar is legendes oor die maak en gebruik van biltong. Wintertyd was tradisioneel biltongtyd maar moderne tegnologie het daardie duidelike seisoen heeltemal laat vervaag. Die rewolusie het al in die 70's begin toe slagters besef het hulle kan die proses ontkoppel van seisoene deur waaiers in hulle koelkamers in te span.

Mellerware kassie met Springbok biltong

Deesdae is daar nie meer baie mense wat hulle eie biltong maak nie want billtong is orals vrylik beskikbaar. Wat die kwaliteit aan betref ... wel dis heeltemal 'n ander storie ... sommige aanbiedinge is werklik 'n klad op die naam biltong.

Ek is 'n biltong verslaafde gewees en vir baie jare was daar altyd 'n houtbak met biltong in my kantoor. Natuurlik moet biltong so lekker strokie vet ook aanhê anders is dit nie regtig biltong vir my nie. Toe tref 'n ramp my so 3 jaar terig en my tande gee die gees. Vir bykans twee jaar was ek in konstante pyn en ongerief met mond en kaak infeksies en my biltong etery het afgeplat en vervaag.

Gelukkig kom ek toe te hore van 'n wonderlike tandarts en na 'n "makeover" van formaat is ek weer slaggereed vir alles wat gekou moet word.

Sirloin Steak in die pekel

Vreemd genoeg kon ek nie regtig weer vat kry aan biltong nie en dit was so met geleenthede dat ek so bietjie gekou het. Toe op 'n dag vertel my vriend Marcelle my van sy biltong makery en wys my 'n foto van sy biltong kassie. Toevallig het my oudste seun so paar jaar terug vir my so kassie gegee vir Kersfees en die boksie lê in my stoorkamer ... daar gesit en daar gelos want ek was nie in die bui vir biltong nie. Marcelle het my egter aangesteek en ek begin toe rondkyk.

In die verre verlede het ek altyd vir my skoonpa die wild en bees biltonge gesny en gemaak as dit slagtyd was op die plaas en ek is nogal handig en vaardig met dit.

Steak in die kassie

So stap die dae verby en ek sien op 'n dag 'n artikel op Facebook van 'n man wat begin het om sy eie biltong te maak. Toevallig gebruik hy dieselfde Mellerware kassie en ek besluit ... nou of nooit. Hy gee toe ook die besonderhede van die befaamde Stefaans Blaauw se speserye resep.

My eerste poging was met 'n Springbok boud wat ek as geskenk gekry het. Eerste sit ek die kassie aanmekaar en die boer in my frons, die dingetjie lyk maar tingerig. Maar nouja, ek is begeesterd en bereid om alles een keer te probeer. Ek slaan egter 'n wasgoed draadrak op in 'n spaarkamer en sit die waaier reg ... net ingeval die Mellerware kassie faal.

Lekker Biltong

Wel die kassie het my beindruk ... feitlik geruisloos en so in sy stille enigeheid staan hy daar op die kombuiskas en doen sy ding. Drie dae later toe is dit smultyd. Ek was gehaak. Met nuwe begeestering sleep ek in dorp toe om te gaan biltong vleis soek ... wild is lekker maar niks is beter as 'n lekker sagte beesbiltong met so strokie vet aan nie ... dis mos ware biltong. Wildsbiltong is proviand, beesbiltong is koningskos.

My SPAR verkoop sulke grootmaat pakke Sirloin en die prys is goed. Ek staan vir 'n wyle en wik en weeg besluit toe maar ... probeer dit een keer.

Wel ... wat 'n wonderlike resultaat. Die Mellerware kassie doen sy ding en by dag drie sit ek met biltong wat net die regte graad van droog het vir my. Ek het gladnie die gloeilamp in die kassie gesit nie.

Ek dink nie ek sal sommer weer biltong koop nie ... ek is moeg vir die ewige angs of die goed nie teveel sout op het nie en of daar een of ander vreemde spesery ingesluip het nie. Die Sirloin biltong is lekker porsie grootte vir my en hulle pas mooi in die toebroodjie ziplock sakkies in die vrieskas. Ja ek vries my biltong want ek hou niks van houtdroog bees biltong nie.

Met die wildsbiltong het ek met 3.6kg vleis begin en 1.3kg biltong gekry. Met die bees het ek met 2.1kg begin en 1.4kg biltong gekry. Dit behoort jou 'n idee te gee van wat die vleis jou werklik kos.

Hier is Stefaans Blaauw se resep:

Biltong Stefaans Blaauw
Ingredients:
For every 1kg meat – mix the following spices:
18 grams salt
2 grams black pepper
1 gram brown sugar
4 grams coarse coriander
Worcestershire sauce
Method:
1. Sprinkle meat with spice mix and Worcestershire sauce alternatively. Use the Worcestershire sauce sparingly.
2. Let it rest for 12 hours and mix well again.
3. Let it rest for another 12 hours and hang in well ventilated room or in front of the fan, or in a Biltong Cabinet WITHOUT WARM AIR!



Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Steak - 'n Man Kos Feesmaal

Ek het al in die verlede genoem dat my Poppie reken mos dat 'n man eintlik net vleis en brood wil eet. Nouja, sy is nie regtig verkeerd nie ... die Grotman in my is 'n vleisvreter en daar is niks wat ek daaraan wil doen nie.

Man Kos Feesmaal

Soos ek ook voorheen al genoem het, is ek op 'n mission om lekker kos te maak, smaaklik en vullend, sonder om die bank te breek. Kos is besig om baie duur te word en prima kos raak soms onbetaalbaar. Steakhouses ruk jou 'n lelike bedrag vir 'n goeie stuk steak en menigmaal is ek erg bedonnerd as ek by die deur uitloop ... so R450.00 later vir my en Poppie en dan was dit ook nie regtig die geld werd nie. Dis die probleem vir my, ek kan self die meeste goed maak op die spyskaart en gewoonlik nog beter as wat hulle bedien.

Nou vandag gaan ek maak soos Poppie sê en vir ons vleis en brood maak ... maar dit is vleis en brood sos wat jy nie maklik op 'n spyskaart sal sien nie.

Lekker vars brood

Eerste maak ek die brood en botter, ek gebruik a sakkie SPAR Deeg vir die brood ... ek het hom twee dae terug gekoop en in die yskas laat lê ... nou het hy so effe surige reukie aan hom as jy die sak oopskeur ... perfek. Hanteer die deeg nou versigtig en rek hom so effens dat jy so langwerpige deeg kry. Ek smeer 'n bakplaat lekker met so drie eetlepels olyfolie en dan rol ek die deeg versigtig daarin en maak seker die hele bol is goed geolie. Die heletyd werk ek baie sagkens met die deeg sodat ek hom nie te plat laat val nie want die gis is teen die tyd redelik poegaai. Maak jou oond lekker warm, ek sit myne op 210C. Terwyl die oond warm word laat ek die deeg in die pan lê en net voor ek dit insit sprinkel ek fyngemaalde growwe sout oor die deeg ... dis maar hoe ek daarvan hou. Dan gaan die brood in die oond in en ek stel die horlosie vir 20 minute. Na 20 minute draai ek die temperatuur af na 170C vir nog so 15 minute. Die deeg kos so om en by R11.00.

Vars botter

Terwyl die brood bak maak ek gou 'n bolletjie lekker vars botter deur 205ml room af te karring met my elektriese klitser. Jy kan die proses hier gaan lees ... Maak jou eie Botter. As jy Clover se room gebruik gaan jy so in die omgewing van R15.00 betaal ... ek koop ons plaaslike Jersey melkery se room vir R8.50.

Nou vir die vleis ... ek het regtig ultra "rich" gegaan en 'n pragtige stuk verouderde rump gekoop. So net onder die 800gr. Die vleis se prys is R95.00 per kilogram en die stuk wat ek vat is R74.50. Kyk, ek weet dis duur maar dis verseker nie die gehalte wat Steakhouses vir jou gaan aanbied nie ... tensy jy 'n baie spesiale eetplek kry en bereid gaan wees om so in die omgewing van R300.00 per bord te betaal nie.

Pragtige stuk Steak

Dit is 'n pragtige stuk steak en ek bestrooi hom lekker dik met gemaalde swat peper en 'n braai sout mengsel. Dan bietjie olyf olie en ek vryf dit mooi in die vleis in, draai hom om in die bak en doen dieselfde aan die anderkant. Nou laat ek die bakkie met vleis rustig rus op die toonbank. Die beste is dat die vleis nou kamertemperatuur bereik voor jy dit op die vuur sit.

Reg vir die vuur

Die brood is reg en die botter is in die yskas.

Nou gaan die steak vuur toe ... en dit moet a warm vuur wees. Hierdie deel van die proses moet jy maar liewer konsentreer want die steak gaan so om en by tien tot veertien minute op die vuur wees. Hierdie steak vereis jou volle aandag en is nie reg vir die normale braai aande nie want dan gaan jy die vleis oordoen.

Lekker warm vuur

Nou is die vleis reg en ek laat dit nou rus. Ek laat die vleis so sewe minute rus. Dis die tyd wat ek die borde regsit, die brood sny en die botter uit yskas haal.

Uitgerus en opgekerf

Ek vat 'n plank en maak so paar hopies sout, speserye en vars kruie blaartjies. Dan plaas ek die steak op hierdie plank en sny dit in mooi repies. Die is nou plankie steak uit die boonste rakke.

Die vleis was murg sag en daar het so paar repies oorgebly vir 'n lekker toebroodjie later.

Die ete se bestandele het R94.00 gekos ... vir twee mense is dit gladnie sleg nie, veral as jy in gedagte hou dat dit prima bestandele is en daar het vleis oorgebly. Nou na ek die storie geskryf het, is dit vir my meer duidelik as voorheen ... ek sal nie sommer steak bestel by 'n eetplek nie.

Sommige mense kan dalk frons oor die gebruik van SPAR deeg ... wel, ek kan brood van "scratch" af bak maar vir my is die vraag, teen die prys vir die sakkie deeg ... waarom moet ek dit doen ... ek is steeds van opinie dat die manier waarop jy bak die grootste deel vorm van die sukses van die brood.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Snaxie - Weer 'n steak broodjie

Ek het die storie oor steak broodjies al voorheen vertel maar die een was so lekker ek moet dit deel.

Lekker steak

Een lekker super stukkie rump ... en ek kan hom gaarmaak presies soos ek daarvan hou want niemand gaan hier saam eet nie.

Rare is presies wat die stukkie bees verdien.

Twee lekker snye bruin brood, so bietjie uitgebraaide varkvet ... ek kry dit as ek kaiings maak en twee goeie skywe lekker kaas.

In die pan

Sny repies van die steak, smeer korrelmosterd op die brood, pak die kaas, dan steak en dan weer kaas.







Maak die toebroodjie toe en smeer liggies met varkvet aan die buitekante.



Nou in a medium pan, moenie te warm wees nie want jy wil dat daar a lekker bros kors vorm en die kaas moet begin smelt.

Lekker Man Kos

Draai die broodjie om en doen die anderkant.


Siedaar ... Man Kos uit die boonste rakke.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Steak - Kry myle uit hom uit

Soos baie van julle seker al agtergekom het, is ek deesdae op 'n missie om lekker kos ekonomies te maak en ek doen dit op maniere wat dit moontlik maak dat die manne ook kan kook.

Almal van ons weet dat goeie steak deesdae baie duur geword het en ons tradisionele manier van braai is van nature geneig om tot ernstige vermorsing te lei. Daar word chops, wors en steak op die rooster gegooi om 'n weermag te voer en dan word daar nog braaibroodjies, papterte en bakke vol slaaie gemaak. Aan die einde is die kombuis vol halfgehapte stukke vleis en borde vol sous besmeerde slaai. Kyk ek weet dit klink bietjie rof maar elkeen wat eerlik met homself wil wees sal presies weet waarvan ek praat.

Vir my het porsie beheer baie belangrik geword spesifiek omdat die vetrolletjies deesdae erg onder die vergrootglas is ... dan is daar nog die tsunami van eetplanne en elkeen reken sy plan is die beste.

Nouja Man Kos fokus deesdae op maniere om eet lekker te maak sonder die noodwendige vermorsing en gepaardgaande skuldige gewetes.

Heel eerste is om porsie beheer toe te pas en dan om die aantal disse te beperk. Ek steek vas by drie disse op die bord en net een mag stysel wees.

Saterdagmiddag kom ek en Poppie terug van die Kaap af en terwyl ek my kar vol diesel maak glip ek by my gewilde Vleiswinkel in ... ek was nou lus vir 'n ernstige stuk vleis. Twee weke van hoender en vis is genoeg vir eers ... nou wil ek bees eet.

Goeie Rump

Ek kry 'n lekker stuk rump, grasvreter en droog verouderd ... hemels.

Die stuk vleis is meer as genoeg vir drie mense en ek suig stadig aan my Camel terwyl die vlamme om die bees dans. As jy so stuk vleis braai moet jy dit met die nodige respek en toewyding hanteer ... fokus op wat jy doen want dis maar net so 10 tot 12 minute en dan is dit oor.

Volgende plaas ek die gaar steak op 'n plank en stel die horlosie ... hy moet nou 5 minute rus. Hierdie is baie belangrik want dit laat die vesels ontspan nadat die vuur hulle nogal erg gespanne laat raak het.

Reg vir opdien

Na die rus periode sny ek die vleis in repies, sit so hopie growwe sout op die plank en dan gaan hy tafel toe.



Natuurlik 'n lekker vars brood. Dis my stysel.

Net drie disse

Ek het 'n mengelslaai gemaak van  groen ertjies, soet rissie, chilli, peer en rosyntjies. Eetlepel kondensmelk en swartpeper. Sout na smaak en so blerts suurlemoen.

Die slaai maak ek deur 'n eetlepel vol van elke bestandeel per persoon af te meet. Dit help kwaai vir die oorskiet want oorskiet slaai is gewoonlik nie lekker nie.

Dit was die maaltyd op die braai aand. Ons was net twee mense en derhalwe het daar 'n stuk rump oorgebly wat nie gesny was nie. Die vleis het ek in die yskas geplaas.

Man Kos Toebroodjie

Maandag middag en daar is so klein hol kolletjie wat gevul moet word. Heerlike vars brood, lekker plaas botter en so paar repies oorskiet steak.

En dis die tweede ete uit die oorspronklike rump steak uit.











Toe kom Dinsdagaand en die bees lewer die finale ete.

Lekker sous

So een derde koppie lekker olie in die pan, grof gekapte uie, knoffel, swartpeper en gemengde droë kruie. Laat hulle maar lekker kuier tot die uie sag en deurskynend is, moenie die knoffel laat brand nie.

Nou gooi ek so koppie vol klein tamaties in die mengsel en twee teelepels suiker. Een eetlepel asyn en sit die deksel op ... laat hy nou maar smoor tot die tamaties oop bars.

Heerlik

Intussen sny ek die steak in blokkies so groot soos ertjies en gooi die stukkies met vet in die smoor in. Onthou die steak is reeds gaar so jy wil dit net warm laat word.

Ek maak pasta gaar en dan gooi ek so paar eetlepels room in die smoor ... maak seker daar is genoeg swart peper in en sout na smaak. Roer goed en verdik met mielieblom as die sous te loperig is. Nou gooi ek die blokkies vleis in en roer en laat prut vir so twee minute.

Skep op en geniet dit.

Die bees het sy kant gebring en jou beursie sug van verligting.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Bees - Ma se tjop

 Man Kos is mos vleis en brood ... en dis hoe dit by my huis werk. Male sonder tal sien ek op Facebook hoe mense vra ...

Suiwer Bees

"Hoe kry ek my steak sag ?"

Net een antwoord vir dit ... Koop die regte steak by die regte plek.

So is dit dan dat ek by my geliefde vleiswinkel inloop en daar word ek begroet deur 'n groot glimlag.

Waarde vir geld

"Oom ... vandag het ek net die ding vir oom. Dis dry aged grassfed bees ... die beste in die geweste en ons het die naweek juis die Masechop op SPECIAL !"

Wimpie straal en hy hou trots 'n helse stuk bees in die lug sodat ek beter kan sien.

Nou kyk ek het al baie van die dry aged ding gehoor en baie gewonder. Nou reken hy nog ook dat die bees net gras gevreet het sy hele lewe lank. Die vleis lyk baie goed en ek hou van die kleur van die vet. Ek moet dit eenvoudig probeer.

Nouja en so is dat dan dat ek hier in my kombuis staan met die moerse chops op die tafel. Poppie is baie skepties, sy is nie eintlik 'n groot vleisvreter nie en o ja ... die ding moet dood gebraai word. Met die soort steak gaan dit verseker nie werk nie en ek sê maar liewer niks ... al wat ek weet is dat vir so hoë gehalte stuk bees is daar net een manier ... Medium Rare.

Net die minimum speserye

Nou hierdie bees moet met respek behandel word ... niks van souse en smere en onderdompelings nie ... ligte lagie olyfolie en dan 'n ordenlike laag growwe swart peper en Roberson's se nuwe Spicey Shisanyama mengsel. Dit was mos betyds vir Nasionale Braaidag ontwikkel.

Warm vuur

Verseker ook nie 'n gekuier in die bak na die spices op is nie ... net so 10 minute en dan op die vuur, 'n baie warm vuur. Om hierdie pragstuk vleis gaar te maak vereis fokus, niks van 'n dronkgat kuiery om 'n drom kole nie ... nee jy moet gefokus wees en die vleis met baie respek en toewyding hanteer.

Dis 'n dik stuk vleis en dis 'n warm vuur ... maar as daar een ding is waarvoor hierdie boerseun nie skrik nie, dan is dit vleis en vuur.

Vir 18 minute word die stukke bees deur die vlamme begelei en vertroos. Alles word met presisie gedoen en sonder 'n gesels ... hier moet respek wees en dit vereis toewyding.

Nou moet hy rus

Af van die vuur af en in 'n groot bak. Die tafel is reeds gereed en my vrou en jongste staar grootoog na die bak met vleis. Ek kan sien hulle kwyl al maar ek stel die alarm.

"Agt Minute se rus ..." is al wat ek sê terwyl ek wegstap na my kantoor toe. Ek gaan 'n twakkie vat en myself in die regte geestestoestand kry vir die fees.

 Die klokkie lui en toe begin die finale voorbereiding ... ek sit een tjop op my gunsteling plank en haal die groot mes uit sy blok. Daardie stuk Duitse staal glip langs die been af soos 'n warm naald in 'n blok botter in. Geen slagtery, net 'n netjiese bestuur van die lang lem. Die vleis is murgsag en sappig en my bek water. Die been word eenkant toe geskuif en sonder enige inspanning verdeel daai lang mes die stuk vleis in mondpas skyfies.

Man Kos

Die mooi deel van die goeie rus is dat die plank nie vol sap is nie ... so bietjie sousies wat langs die some glinster. Hierdie is nou Man Kos ... Man Kos wat vrouens ook sal like.

Eerste hap wat ek vat is sonder enige sout ... ek moet eenvoudig eers proe hoe pure suiwer grasgevoerde bees ... hemels ... enige tyd so sag soos fillet maar net tien maal meer smaak. Die volgende repie tik ek so teen die hopie growwe sout op die plank en dis 'n smaak ervaring wat ek nie maklik kan beskryf sonder om simpel te raak en allerhande sinnelose frases en brabbel taal te gebruik nie.

Ek het darem 'n lepel vol aartappelslaai ook gevat.

Weereens is dit bewys ... 'n goeie steak op jou bord begin by 'n goeie vleiswinkel wat goeie steaks verkoop.

As jy in Nelspruit is dan gaan soek jy vir Wimpie op by El Madre Slaghuis en sê virhom jy soek van daai bees wat hy aan oom Colyn verkoop het.

Kook lekker tot ek weer 'n storie skryf.


Hier is my Facebook Bladsy ... Man Kos ... like hom as jy wil.

Bees - Lekker dik ribbes

Vandag se storie gaan oor 'n snit van die bees wat nie eintlik baie algemeen gebruik word nie. Die ribbes van die bees beland gewoonlik in a pot as 'n stowegereg of sommer stew of dit word gebruik in 'n rol en dan word die gestroopte ribbes as chuck of iets dergliks verkoop. Normaalweg gesien as goedkoop en minderwaardig.

Mooi porsie dik rib

Deesdae is dit darem ook so dat met die invloed van ons ander landsgenote word die dun skywe lekker bros gebraai en is nog altyd vir my lekker so. As kind het ons die dun skywe sommer so in 'n skopgraaf of ou ploegskaar gebraai dat die vet borrel en die vleis kraak. Die gedagtes laat my verlang na die goeie ou nat en mistige dae op Wakkerstroom. Daar agter in my pa se werkswinkel het hy die graaf vol vleis gebraai en dan het ons so met ons hande geëet en elke kort kort 'n stuk varsbrood deur die vet gesleep ... dit was in dae toe ons nog nie regtig geweet of omgegee het vir kolesterol en al die nuwe siektes wat men dan nou kwansuis van Man Kos kan kry nie.

So rukkie terug sien ek hoe Ruben Riffel dikrib gaarmaak vir sy feesmaal met sy familie en ek dog by myself ... ek moet bietjie by my vleiswinkel hoor van die ding. In Kuweit het ek die eerste keer kennis gemaak met dik beesrib en dit was lekker.

Onthou net een ding ... moenie dink jy gaan sagte vleis kry soos met fillet nie ...nee, die ribbes is harde vleis met a growwe grein maar o genade ... geur soos min.

My pa het mos altyd gesê ... "The closer to the bone, the sweeter the meat."  Dit was nou nie noodwendig met verwysing na beesrib as sulks nie ... eintlik niks met beeste te doen nie maar laat ons dit liewers daar laat.

Heerlik sag en sappig

Na 'n lekker gesprek met my vleisman, Wimpie, is ek daar weg ... die belofte was dat ek die ribbes oor drie dae kan kom haal.

Nouja ... Vrydag middag staan ek met die pakkies ribbes in my hande en ek besluit terstonds dat een sommer nou oond toe moet gaan. Met groot waardering kyk ek na die stuk rib in die pan, Wimpie het regtig mooi geluister en mooi snitte gemaak. Elk pakkie het 'n oorvloed van marinade sous in so ek dop die pakkie net in die pan uit met al die sous, plaas die rib so dat die bene boontoe wys en in die oond in. Nou hier kom die ding. Dis in 'n oop pan en die oond is op 110C. Jy kan nou wortels, uie en seldery in die pan sit om meer geur te gee. Jy kan selfs dit toemaak met foelie om dit goed te laat stoom. Maar ek doen dit nie ... ek wil dit soos braaivleis gaar laat word. Oop en sonder ander geure en smake ... ek soek die vleis se smaak en geur.

Vier ure later is die sulke tyd. Die ribbes lyk lekker en al die vet het uitgebak. Nou moet ek bieg, die sou seker lekker gewees het met die hele tradisionele oorrompeling met rys, aartappels, pampoen en boontjies maar ek het dit nie gedoen nie ... ek wil die rib eet ... nie die goed wat die bees eet om die ribbes te maak nie.

Dis mos Man Kos

Ek het 'n lekker brood gebak met so kraakvars korsie. Dit saam met vars plaasbotter en dis al.

Die geur en smaak was baie lekker ... amper aards. Die brood was daar om die sousies op te vee.

As jy lus voel vir iets anders ... gaan vra gerus vir Wimpie.

Lekker kook tot ek weer 'n storie skryf.

Hier is my Facebook bladsy ... Man Kos ... like hom as jy wil.

Steak - T-Been is darem lekker

Vandag gaan ek skryf oor T-Been ... daar is baie manne wat mal is daaroor maar vrouens skram weg want die goed is te groot. Verder is dit so dat as jy die stuk vleis kleiner wil kry dan word hy dunner gesny en dan eindig jy met 'n stuk leer op jou bord.

T-Been in die pan

Ek dink daar is eintlik meer romantiek agter mans se T-Been etery ... dis mos erg "Grotman" om so stuk vleis met been en al op die bord te kry ... aards en primitief ... alles dinge wat rooibloed mans se harte warm laat klop.

Nouja ... ek het my oerdrange baie jare terug al hokgeslaan as dit by die snit kom. Braaivleis vure en T-Bene is maak byna net so min sin as stilletto skoene, sykouse en die bosveld grasvlaktes.

Laat ek meer verduidelik want ek is seker daar is nou 'n paar diepkeep fronse voor 'n klomp rekenaarskerms ... party probeer die stillettos imagine maar ek dink die meeste frons oor die "lekker" T-Been op die laaste braaivleis vuur.

Braai die beenkant goed

T-Been is verseker nie sagste vleis aan 'n beeskarkas nie en dis net daai stukkie fillet aan die eenkant as jy gelukkig en hy is nog daar. Die res is redelik hard en kan maklik baie droog wees. Kokke en braaiers het allerhande slenters met souse en bedruiping om die eienskappe te verberg maar op die einde as alles weggeskraap word is dit maar weer net die stuk vleis.

In die oondpan in

Hierdie renons van my in T-Bene het my nog altyd gepla want ek het gedurig gevoel ek verraai my herkoms deur so antagonisties te wees teenoor hierdie snit. So elke keer as ek daar by my geliefde vleiswinkel inloop dan sien ek die T-Bene in al hulle verskillende verpakkings, staan en kyk vir so rukkie en dan loop ek liewer weg.

So kom dit dan dat ek op laat herfs middag weer by die slaghuis inloop en daar in die vertoonkas lê 'n versameling van die Grotman snitte ... vir 'n wyle talm ek en toe neem ek die besluit ... ek gaan hierdie stuk vleis tem vanaand. Dis net ek en my poppie en vat 'n stuk wat so skrams onder die een kilogram weeg.

Nou moet hy goed rus

Ok, verseker gaan die ding na 'n vuur toe nie want ek weet dis selde of ooit 'n sukses. My kop maal en ek flip deur al die dinge wat ek van vleis kan onthou. Toe besluit ek ...

Pragtig pienk en sappig

Eerste braai ek al die kante in 'n vuurwarm pan ... die rook trek uit die pan uit ... geen speserye of sout nie. Laaste staan hy op die been in die pan en ek laat hom maar goed les opsê want ek wil hê die hitte moet mooi optrek in die been in.

'n Goeie porsie

Nou op 'n oonpannetjie met rooster ... gooi hom lekker met speserye en 'n koppie water onder in die pan. Dis maar net om te keer dat die sousie en vet te erg aanbrand. Twee lourierblare in die pan en toe oond toe ... 180C vir so 15 minute. Toe uit en ek laat hom rus vir 20 minute. Die is baie belangrik want dit gee die vleis kans om te ontspan na die hitte aanslag en dit laat die kookproses ook natuurlik tot stilstand kom.

Toe die tyd om is to begin ek die vleis te sny ... kyk mooi op die foto hoe ek dit gedoen het. Die T-Been is mooi medium gaar en feitlik geen sous loop uit soos ek sny nie.

My vrou was in haar noppies met die resultaat want nou kon sy die vleis regtig geniet en die helfte is nie weggebrand nie. Die hele snit is mooi gaar en niks word gemors nie. Ons het albei geëet en daar was oor vir so lekker Man Kos toebroodjie vir die volgende dag.

Nouja ... ek het die T-Been getem en vandag is dit 'n snit wat ek gereeld gebruik maar verseker nie op 'n oop vuur nie.

Lekker kook tot ek weer 'n storie skryf.

Hier is my Facebook bladsy ... Man Kos ... Like hom stukkend as jy wil.