Skons - Ouma se skons

Die van julle wat my ken weet sekerlik dat ek baie lief is vir skons. Oor die algemeen is ek redelik verdraagsaam met mense se gebakte goeters en sal nie sommer my bek rek nie ... wel, tensy dit regtig 'n patetiese flop is. Maar ... en dis 'n groot MAAR ... as dit by skons kom is ek vol draadwerk.

ManKos se Ouma se Skons

Die oorgrote meerderheid van die hedendaagse aanbiedinge is meer 'n "biscuit" as 'n skon en ek kan dit nie regtig verdra nie. Skons is in wese so eenvoudige ding om te bak maar so min mense doen die moeite om dit ordentlik te doen.

My ouma Hester se skons is die meetsnoer wat ek toepas en enige poging wat nie by haar standaard kan uitkom nie, is in my oë 'n flop.

Vir bykans 4 jaar het ek gesoek, gebak, geproe en dan maar weer gaan soek vir die geheim van haar skons. My ouma is dood en my ma is dood en ek kannie vra wat die geheim was nie. My familie kan onthou maar niemand weet nie. So is dit dat ek begin dink het dat die skons van Ouma Hester vir ewig verlore is vir my.

En toe so paar weke terug kom ek op 'n resep af ... sommer met die eerste oogopslag het die ding vir my reg gelyk. Laatnag en ek is in die kombuis. Meet en weeg, vryf en meng en bak. 40 minute later lê hulle op die draadrak ... lyk goed ... mooi gerys, mooi tekstuur en heerlike reuk.

Mooi tekstuur

Die eerste toets ... kan jy hom oopbreek dat hy perfek middeldeur breek sonder om 'n mes te gebruik ... wel, ek vat enetjie mooi vas en breek die kop af ... met genoegdoening sien ek hoe hy perfek uitmekaar skeur ... ja skeur. niks van 'n brekery nie. Wel dis een hekkie deur.

Volgende staar ek na die tekstuur ... lyk goed, gladnie koekerig of krummelrig nie. Dis die tweede toets.

Nou mond toe ... dit moenie droog wees nie ... en die een is reg.

Ek kou tydsaam en probeer elke dingetjie raak proe. Die een is goed, die beste van almal wat ek al gedoen het. Met genoegdoening vat ek nog 'n hap en kou terwyl ek vir my koffie maak. Die finale toets is natuurlik nog aan die kom want dis waar feitlik alles wat as skons aangebied word die kol heeltemal mis vir my. Daardie simpel bliksmaak wat die goed in jou mond agterlaat ... en ons almal blameer maar die bakpoeier vir dit ... en ek glo werklik dis dit.

Geen bliksmaak nie ... en ek glimlag breed terwyl ek nog een pleister met botter en so blerts Marmite.

Die een is goed maar hy is nie my ouma se skons nie en ek sak agter my rekenaar in. Hier het ek nou 'n ordentlike basis en dit gaan nou geduld en baie toets vat om by ouma se skons uit te kom. Vir die volgende drie weke werk ek aan die resep en vandag het ek die sesde variasie gebak. Nommer vyf was gister gedoen en hy was baie naby ... vanoggend het ek die finale verstelling gemaak en gebak ... en voorwaar ... ek staan in my ouma se kombuis en sien en proe weer haar skons. Presies soos haar skons, seker nie, maar so naby as wat ek daar aan kan kom.

Ai hoe wens ek dat ek vanoggend vir my ma een of twee kon gee saam met 'n koppie tee.

Nouja ... ek gaan nou die resep met julle deel en anders as gewoonlik gaan ek geen alternatiewe aanbied nie ... maak presies soos die resep of los dit uit.

Varkvet in die meel

BESTANDELE:
275g Koekmeel ... ek gebruik Millstone se koekmeel.
1 tsp Koeksoda ... en moenie Bakpoeier gebruik nie.
1 tsp Kremetart
1 tsp Strooi suiker
½ tsp Sout
60g Varkvet ... ek koop myne by ESKORT se winkel.
150gr Dubbelroom Yogurt.

Reg vir die drukker

1 Groot eier
+Eggwash.
METODE
1. Oond op 220°C en smeer 'n bakplaat. Ek gebruik sommer die sproei.
2. Klits die meel, sout, koeksoda, strooisuiker en kremetart goed met 'n whisk. Gebruik 'n groot mengbak.
3. Sit die varkvet in die meel. Ek druk dit so plat as moontlik bo-op die meel voordat ek dit met my vingerpunte begin opbreek in die meel.

Mooi Baksel

4. Klits die eier en yogurt saam en gooi in by die meel mengsel. Nou gebruik ek 'n kombuismes om die meel en yogurt saam te laat meng. Doen dit die heeltyd met sny bewegings. Jy moenie die mengery met jou hande doen nie want dan gaan jy die meelmengsel oorwerk en brood begin maak. Hou aan met die sny bewegings todat alles mooi gemeng is. Druk die deeg nou liggies bymekaar om 'n bal te vorm.

Heerlik met konfyt en room

5. Strooi jou werksblad liggies met meel en druk die deeg ligges plat met jou hande in 'n ovaal van omtrent 25mm dik (so om en by vingerdikte) As jy a 60mm drukker gebruik behoort jy so 6 mooies uit te kry. Maak die oorskiet bymekaar en druk saggies weer in 'n plat sirkel ... onthou, ek noem die weeskinders, hulle gaan nie meer soos die eerstes wees nie. Na die drukkery druk ek die oorskiet sommer in so langwerpige vryhand vorm. Die is belangrik want elke keer as jy die deeg bymekaar maak word die skon minder skon en meer "biscuit".
6. Pak hulle redelik naby aan mekaar op die bakplaat. Ek verf myne met geklitsde eier. Wees versigtig dat jy slegs die koppe verf. As die eier langs die skon afloop gaan hy nie mooi uitrys nie want die eier word vinnig hard en hou die skon vas. Ek hou daarvan om een of ander braaispesey mengel oor te strooi.
Bak nou vir 12 minute in die 220C oond met die rak in die middel.
Haal uit en plaas op a draad rakkie dat dit effe afkoel voor jy wegval.

Daar is hy ... maak dit en kom vertel my wat jy dink.

PS ... As jy meer wil maak, verdubbel maar die resep.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Skons - Maklike pasteitjies

As daar nou een ding is wat werklik ManKos is, dan is dit 'n pasteitjie. Baie min mans sê nee dankie vir 'n pasteitjie. Soos ek verduidelik het toe ek die basiese Skon storie vertel het, kry die skon ding onder die knie en jy kan baie ander lekker eetgoedjies maak.

ManKos Pasteitjie

Wel vandag maak ons pasteitjies met skon deeg. Die VLU tannies gaan nou natuurlik frons en die Koekedoor mense gaan net hulle koppe skud ... maar nouja ... dis soos ek is ... ek soek die maklike paadjies.

Hierdie twee stories is belangrik as jy die resep wil maak ...

1. Basiese ManKos Skon Deeg
2. Vlenter Vark

Kry jou oond lekker warm ... so 210C ... rakkie in die middel.

Moenie teveel vulsel insit nie

Begin en maak my Basiese Skon mengsel aan. Hierdie keer gaan jy bietjie harder met die deeg werk want jy soek dit nie fluffy nie maar wel bros en bietjie harder. En dit alles kry jy reg deur die deeg so bietjie brei.

Jy het ook een of ander vulsel nodig ... hoender, vis, wors, maalvleis ... ek het my Vlenter Vark gebruik.

Smeer 'n 6 gat groot muffin pan mooi en deel jou deeg in 6 ewegroot porsies. rol die balletjie deeg lekker tussen jou hande druk hom dan plat in 'n sirkel. As jy dit kleiner wil doen kan jy die 12 gat muffin pan gebruik en net die deeg in 12 verdeel.

12 minute in die oond

Sit nou die skyfie in die muffinpan en druk die deeg dun uit. die deeg sal teen die rant opklim tot omtrent amper bo. Doen al ses ... dit vat bietjie tyd. As jy klaar is begin weer by die eerste een en druk weer plat, die deeg begin rys so jy moet dit weer plat druk. Nou skep ek so twee eetlepels vulsel in. Dis baie belangrik dat die vulsel gaar en koud is. Moenie te nat vulsel gebruik nie. En moenie teveel vulsel insit nie.

Laastens sit ek 'n lekker skyf kaas bo-op soos 'n deksel ... strooi bietjie spesery oor en dan in die oond in.

Lekker korsie

Hierdie pasteitjies is gewoonlik reg so tussen 10 en 12 minute. Onthou die skon deeg is baie dun uitgedruk en die vulsel is reeds gaar. Maar moenie met 'n koue oond sukkel nie.

Hou maar 'n ogie op die baksel, dit kan maklik brand. Die deeg is dun en die oond is baie warm.

Hierdie pasteitjies kan jy maklik weer warm maak in die mikrogolf oond sonder dat die deeg taai word.

Hierdie is regte ManKos pasteitjies en enige man behoort dit maklik te kan maak. Die deeg is nie vol nonsens nie en werk maklik. Jy hoef ook nie te stress dat jy dit sal oorwerk nie. As jou vulsel reg is dan behoort die proses jou nie langer as 30 minute van begin tot in die bord te neem nie.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

SPAR Deeg - Pizza in my Braaier

Vandag se storie is 'n ding wat al baie lank in my kop maal. Sien, die ding werk so, ek het in die 80's al besluit dat Gas Braaiers is die ding vir my ... die goed is vinnig, skoon en maklik om te gebruik. Poppie braai self maklik as sy nie die stoof wil bemors met spattende vet nie. Ons kan op die ingewing van die oomblik besluit om te braai en dan 15 minute later is die vleis op die roosters.

Pizza in Braaier

Die puriste vertel jou van die smaak van hout en wie weet wat nog maar vir my is dit meesal verbeelding. As jy hout laat uitbrand tot kole is daar niks van hout reuk meer in daai vuur nie. Net hitte.

'n Goeie gasbraaier wat goed ingeloop is het heeltemal genoeg aangebrande vet op wat aan die brand slaan sodra jy vet vleis opsit. Die vlamme gee dieselfde skroei effek as 'n houtvuur wat vlamme maak. Maar dit daar gelaat ... dis 'n argument wat nooit gewen kan word nie ... omtrent soos om te stry oor wat is die beste kamera, Canon of Nikon ... of wat is die beste bakkie, Toyota of Ford.

Reg vir die vuur

Ek het 'n baie goeie braaier en hy het ook 'n toeklap deksel wat 'n lekker oond vorm. Nou het ek al oor die jare opgemerk dat as ek die oond sou gebruik dan kom daardie temperatuur baie maklik by 350C by ... iets wat my elektriese oond nie kan doen nie ... en ek twyfel sterk of daar enige huishoudelike oonde is wat dit kan doen.

Op die Braaier

Vir 'n lang tyd oorweeg ek dit al om een of ander vorm van vuur gedrewe oond ding te kry om Brood in te bak en ek het na verskeie modelle gekyk ... pryse wissel van 'n aanvaarbare R3,500.00 tot 'n obsene R24,800.00 ... almal is hout aangedrewe of houtskool aangedrewe. Ek het 'n renons in vuurmaak en behalwe dat dit hoogs onbetroubaar en onstabiel is, is dit die alewige gemors daarna asook die onvermydelike ... "Ons het nie charcoal nie." storie.

8 minute later

So kom dit dat Poppie Vrydagaand by die huis aankom met 'n bol SPAR deeg. Toe ek ernstig begin Brood bak het, het ek met die SPAR deeg eksperimenteer om my oond bestuursvernuf te verfyn. Soek maar op die blog se indeks vir SPAR Deeg en jy sal verskeie stories kry wat ek geskryf het.

Ek weet nie eintlik hoekom het sy die deeg gekoop nie want ek bak al vir byna 'n jaar Suurdeeg Brood.

Perfek vir my

Ek staan die bol deeg so en bekyk en besluit ek gaan vir ons pizzas maak. Ek het 'n fancy pizza steen vir my oond en kry gewoonlik redelike aanvaarbare resultate ... dit vat egter omtrent 20 minute per pizza. Die oond loop dan op 230C.

Lekker kors

So ruk terug het ek dit oorweeg om gewone klei teëls op my oondrak te pak en daarop brood te bak. Dit het nooit gebeur nie en die teëls lê onder in my kas. Dit is rou teëls wat my seun vir my gekoop het en het geen glasuring op nie. Was nogal baie goedkoop ook vir die pakkie teëls.

Ek besluit om die teëls in te span vanaand in my braaier. Nou my braaier het twee stelle branders, links en regs ... en die branders kan afsonderlik beheer word. Ek het al baie eende in die oond gebak deur die oondpan op die linkerkant te plaas en slegs die regterkant se branders te gebruik ... so die eend kry geen vuur onder sy pan nie. Ek beluit om dieselfde beginsel met die pizza toe te pas. Teël op die regterkant laag gestel en groot vuur aan die linkerkant. Ek steek die braaier aan die brand, sit die teël op en maak die deksel toe. Hy moet nou warm word terwyl ek die pizza bou.

Net 'n wenk, as jy jou pzza basis maak ... doen dit maar met die hand en nie 'n koekroller nie. Jy wil die pizza spesifiek maak dat hy 'n prominente rant het. Dit verhoed dat jou vulsel die hele plek vol loop en alles besmeer. Vir die teël grootte wat ek gebruik het, is so 130gram deeg 'n goeie grootte.

Ontbyt Pizza

Nou my pizzas het ek 'n tuisgemaakte tamatie bredie/sous ding gebruik. Cheddar kaas, bietjie mozarella, fyn gekapte tamatie en dun skyfies cheesy russians. Kruie en speserye waarvan ek hou en dis dit. Nou pizzas is baie persoonlik en elke mens het sy eie smaak. Bou die ding soos jy van dit hou maar ... en dit is 'n GROOT MAAR ... weerhou jouself daarvan om die bolaag oordadig dik te maak. Dis waar die meeste pizzas faal ... gaan kyk maar na 'n tradisionele pizza en jy sal sien dat die basis baie dun is en die bolaag is feitlik net 'n enkel laag ... nie stapels goeters nie. Die stapels gaan keer dat jou kors lekker stewig bak en sodra jy die pizza sny en optel gaan die bolaag afgly van die deeg af. Maar dis steeds jou keuse.

Heerlik bros

Nou vuur toe. Die oond is lekker warm en ek slide die pizza af op die teël. Maak die deksel toe en begin my tydhouer. Op 2 minute maak ek die deksel oop en draai die pizza 90 grade. Weer 2 minute en draai weer 90 grade. Die eerste draai moes ek die teël draai maar by die tweede draai was die pizza kors reeds gevorm en het ek net die pizza gedraai op die teël. Nog 2 minute en nog 'n draai ... die pizza was nou reeds goudbruin en sommiges sal hom so wil hê. Ek het spesifiek gesoek na so bietjie brandkolle soos wat jy in 'n goeie pizza houtvuur oond kry. Nog 2 minute en ek haal hom uit. 8 minute in totaal.

Kyk maar vir jouself hoe dit lyk en besluit of jy van dit sal hou.

So hou ek van Pizza

Die pizza was perfek vir my ... lekker bruin kors, krakerig en net genoeg brandmerke om die smaak te bevorder. Ek is baie tevrede met die resultate en het so dan ook nou 'n nuwe aanwending gekry vir my braaier. Die mense met WEBER braaiers kan 'n doelgeboude steen koop vir die braaier maar met so bietjie kopkrap is ek seker die teël sal ook reg werk in die WEBER.

Sondagoggend het ek besluit om vir ons 'n ontbyt pizza te maak ... 3 soorte kaas met Pomelo konfyt as basis sous. Nadat dit gebak is het ek heuning oor gedruip. Heerlik.

Hierdie manier van pizza maak is perfek vir die manne om te maak ... dis mos baie manlik om so met deeg en warm vure te werk.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Koek - Errieda se Hummingbird Koek

So paar dae terug roep 'n vriend my op WhatsApp en hy is baie huilerig. Hy het die moed bymekaar geskraap en die Hummingbird Koek gebak. Groot was sy terleurstelling ... die koek het kluitjierig uitgekom en was gladnie lekker nie. Ek is dadelik nuuskierig want dis nou een koek wat ek al lankal wou gebak het.

Errieda se Hummingbird Koek

Ek vra hom watter resep het hy gebruik en hy gee my die skakel na die resep toe. Ek sien dadelik dis een van Errieda du Toit se resepte en frons. Haar resepte is gewoonlik baie goed en deeglik getoets. Ek het nog nooit 'n flop gehad met enige van haar geregte wat ek gemaak het nie. Met die eerste oogopslag sien ek dadelik 'n paar dinge raak wat jou baie maklik sal laat struikel met die resep.

Laat ek eers verduidelik ... vir my val koeke in twee hoof afdelings ... SPONSKOEKE en VRUGTEKOEKE ... ek weet dis oorvereenvoudig maar dis hoe dit vir my werk. Koeke se sukses word grotendeels bepaal deur hoe jy die beslag meng en dan hoe jy bak, in 'n vlak pan vir 'n rolkoek, in muffin panne vir cupcakes of in groot panne vir 'n gewone koek. Sponskoeke kan al die dinge doen maar vrugtekoeke is werklik nie geskik vir rolkoeke nie tensy jy regtig dapper is en weet wat jy doen.

Eerste ding wat ek opmerk van die Hummingbird koek is dat dit 'n groot beslag is. Tweedens is daar 'n klomp nat vrugte in ... piesangs en pynappel snippers. Hierdie twee goed gaan die beslag swaar en baie nat maak en natuurlik gaan dit die baktyd baie affekteer.

Ek gesels bietjie met my vriend en vind uit wat hy gedoen het en hoe hy die metodes uitgevoer het. Dis vir my gou duidelik dat hy heel waarskynlik die koek nie deurgebak het nie. Ek weet dis 'n ding met vrugtekoeke ... die beslag is swaar en daar is gewoonlik baie suiker in ... as jou oond te warm is gaan die koek buite brand voor hy in die middel gaar is ... die swaar beslag gelei die hitte stadiger na die middel toe en die buite rante begin brand voor die middel regtig warm raak. Errieda se resep stel voor dat jy drie 23cm panne gebruik ... dit het die voordeel dat die beslag nie te dik in die panne lê nie en vinniger bak want die hitte kom goed deur van bo en van onder af. Ek probeer om die beslag so om en by 3cm maksimum diep in die panne te gooi.

Ondervinding het my geleer dat jy maar gerus die temperatuur van jou oond met 10C kan verminder vir vrugtekoeke. Ek bak ook baie selde 'n ronde koek en seker 80% van my koeke bak ek in vierkantige panne wat so 20cm x 20cm groot is. Vierkantige koek is makliker om te verpak en sny ook makliker in porsies in ... maar dis maar net my persoonlike opinie.

Ek laai die resep op my tablet en kies koers kombuis toe. My vrou is nuuskierig toe ek so vroeg oggend begin panne en meel en dinge uitpak. Ek vertel haar die storie en sy lag ...

"En jy dink jy kan dit reg kry ..."

Ek gee haar so skewe kyk ... "Poppie, mense donner koeke gewoonlik op omdat hulle nie fokus as hulle moet bak nie. Koekbak is 'n wetenskap ding en jy beter fokus of jy gaan faal. Jy kannie sommer dinge uitlos of bygooi vir luck nie en jy moet reg meet en weeg."

Mooi uitgemeet en reg gepak

Uit honderde navrae het ek al geleer dat die meeste mense lui raak as hulle 'n koek moet bak wat baie bestandele het en nie konsentreer nie. Ek het 'n goue reël as dit by koek kom ... ek meet en weeg al my bestandele af en pak dit in groepies bymekaar soos die metode voorskryf. Sodoende mis ek nie 'n bestandeel nie en ek sit ook nie iets eerste in wat eintlik laaste moes ingaan nie. Dit klink dalk bietjie omslagtig maar probeer dit gerus volgende keer as jy 'n koek bak.

Soos gewoonlik is ek nie 'n ou wat sommer resepte in my stories gee nie want dit gaan meer oor die metodes as oor die resep ... hier is die skakel na Errieda se Hummingbird Koek. Kliek op die skakel en kry die hele resep daar.

Maak seker jou oond is aan en gaan reg wees as jy klaar gemeng het ... dis baie belangrik dat jy die beslag so vinnig as moontlik in die oond kry nadat die nat en droeë bestandele bymekaar gebring is. Dink maar aan die proses as jy Enos in die glas water ingooi ... dis maar ook wat gebeur in jou beslag ... net baie stadiger.

Klits die eiers en suiker totdat jy gladnie meer suikerkorrels in die beslag kan voel nie ... vat so 8 minute in my Kenwood met die whisk aan. Gooi nou die olie stadig by terwyl die masjen steeds goed op spoed is. Hierdie is 'n belangrike stap in enige koekbak proses. As jy hier lui is en kortpad vat gaan jy sekerlik nie 'n lekker koek kry nie want daai suikerkorrels gaan jou beslag beneuk in die oond.

Errieda noem in die kommentare dat sy 'n opgehoopte koppie pynappel snippers gebruik en dan bietjie van die sap ekstra in gooi. Dis goeie raad want die beslag was effens stram ... nou die grootte van die eiers wat jy gebruik gaan ook hier 'n rol speel. Nadat ek die meel ingevoeg het was dit duidelik dat die beslag moontlik baie stram gaan wees en ek meng die pynappel en piesangs in met 'n groot metaallepel. Dis nou die tyd om die beslag te beoordeel en te besluit of jy nog so bietjie vog nodig het. Ek het so 4 eetlepels sap bygegooi om die beslag lekker glad te kry.

Mooi gebak

Die volgende stap was die verdeling tussen twee panne, korrek ... ek het net twee vierkantige panne gebruik. Ek is nogal vol draadwerk as dit by hierdie stap kom en ek weeg die panne soos ek die beslag in skep. Ek soek hulle byna dieselfde gewig ... dis baie belangrik om dit so te doen want anders bak die twee koeke nie eweredig nie. Ek weet gesoute bakkers eyeball sommer die verdeling so maar ek doen dit nie ... ek weeg en maak seker.

Nou vir die oond ... my oond is gestel op 180C FAN ASSISTED en ek bak op die middelste rak. Na 10 Minute draai ek die oond af na 160C toe. Op 20 Minute toets ek met die toetspen en die pen kom nog nat uit in die middel. Nog 7 minute en toe is die pen skoon. Die koek begin nou ook effens wegtrek van die panne se rante af.

Na 30 minute keer ek die koeke uit en hulle voel perfek.

Heerlik ... vir seker 'n wenner.

Die koek is heerlik ... klam en geurig ... ek het 'n half teelepel MIXED SPICE ingegooi ipv die Naeltjies en Neutmuskaat wat die resep aandui en ek het die pecans met okkerneute vervang. Ek het so half koppie ekstra neute ingegooi.

Volgende keer as ek hom maak ... en ek sal hom vir seker weer maak ... sal ek 'n Roomkaas en Karamel versiering maak ... pynappel en karamel is mos groot maatjies.

Ek het die fotos met my vriend gedeel en hy het onderneem om weer die koek aan te pak. Vir my was dit 'n lekker projek want ek wou nog altyd graag die Hummingbird koek gebak het. Dit het ook weereens net beaam dat Errieda se resepte werk reg ... mits jy fokus.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Melktert - ManKos Melktert to Go

Suid Afrika is tans in 'n greep van melktert malligheid en dis op almal se lippe. Ek self is baie lief vir melktert maar die tradisionele melktert het maar 'n bitter kort raklewe. Sodra die kors eers deur die yskas was dan is die magic weg want enige skilferkors is nie bestand teen die afkoeling nie. Vir my is koue skilferkors een van die onaardigste dinge op aarde om te eet.

Sarel en my Boerekos Takeaways

So klompie jare terug het ek die moed bymekaar geskraap en ingeskryf vir Kokkedoor 3 wat toe nooit gebeur het nie. My vriend Sarel, mag hy in vrede rus, was die een wat my oudisie disse moes verduur. My sakeplan was Boerekos Takeaways en ek het 'n verskeidenhed tradisonele geregte in Takeaway formaat verwerk.

My nagereg aanbieding was Melktert Pakkies ... dit het hoofsaaklik bestaan uit 'n korslose melktert wat in stafies gesny word en dan toegedraai word in 'n pannekoek ... ek het 'n verskeidenheid aanvullings in die pakkie toegedraai ... lemon curd pomelo curd, amandel en karamel, pekan en heuning.

Nouja Kokkedoor 3 het toe nooit gebeur nie en die goedjies het in die argiewe beland. So week terug hits Annelien my aan om in te skryf vir Deeghuys se kometisie en ek stof toe die Melktert Pakkies af en skryf dit in ... was nou nie suksesvol nie maar dit was baie lekker en my "toetsers" was almal gaande oor dit.

Karamel en Amandel

Hoekom is die Melktert Pakkies so sukses ... wel, eerstens het dit 'n uitstekende raklewe, tweedens is dit maklik om te eet ... in kosblikke, in 'n servet of sommer so met die hand uit die bak uit in die yskas en dae later is dit steeds heerlik.

Heerlik en maklik

Ek gaan nou nie hier staan en resepte herhaal nie want daar is duisende melktert resepte beskikbaar en nog meer pannekoek resepte. So al wat jy moet doen is om jou gunsteling melktert korsloos te bak en 'n hoop van jou gunsteling pannekoeke te maak.

Kry 'n pakkie amandel vlokkies en 'n blikkie karamel ... sny die melktert in stafies, smeer karamel by, sprinkel die amandel ... strooi met kaneelsuker, melktert is mos nie eintlik melktert sonder kaneel nie ... vou toe in die pannekoek of rol op en siedaar ... heerlike melktert to Go.

Probeer dit gerus en dalk het jy nou 'n staatmaker vir die kinders of manlief se kosblik. En dit hou maklik 'n week in die yskas ... strooi net vars kaneelsuiker oor vir bietjie kraak.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Tert - Man Kos Sitrus Tert

Roomkaas terte is iets wat ek baie geniet maar ek het ook al rillers teëgekom. Een van die grootste pyne van meeste yskasterte is die kors. Die maklikste manier is om eenvoudig net Tennis beskuitjies in die bak te pak en die vulsel oor te giet en daar gaan hy. Vinnig maar regtig verbeeldingloos. Hierdie koekie basis is vir my net so terleurstellend soos om te sien hoe fyn uitgevatte dame die Suidooster trotseer ... sy lyk pragtig en dan gee die wind daai romp so wulpse pluk en daar verstar jou blik ... daai vaal katoen onderbroek was verseker nie wat jy verwag het nie ... wel, dis seker nou nie vir almal so nie, maar vir my is dit baie terleurstellend. So voel ek oor 'n Tennis Biscuit kors.

ManKos Sitrus Tert

Dit nou daar gelaat, oor die jare het ek al vele beskuitjie krummel korse gemaak en die een wil meer terleurstellend wees as die ander een. Een van die grootste probleme vir my is dat die goed vetterig raak en na 'n dag of twee dan is dit 'n papperige, olierige vel wat daar in die yskas rondhang.

Soet Lemoen

Na ek die Lemoen Tert van Marie-Louise gesien het op Koekedoor het ek gaan sit en beplan. Natuurlik moes ek eerstens die Lemoenkonfyt in die hande kry en het besluit om maar my eie konfyt te kook.

Lekker Kors

Volgende was die kors ... ek was nie bekommerd oor die vulsel nie want daar vertrou ek my instinkte. Na baie resepte en videos kom ek tot die slotsom dat 'n goeie beskuitjie krummelkors haalbaar is mits jy bereid is om te fokus en mooi te dink terwyl dit maak.

Die kors wat ek hierdie keer gemaak het, het baie goed gewerk. Ek het gemmerkoekies gebruik vir smaak en tekstuur en Mariebeskuitjies vir die volume en bindkrag. Die kors was lekker stewig, smaakvol en gladnie olierig nie. Die tert is oor 'n periode van 6 dae opgeëet en het goed gebly tot die laaste happie. Na baie vloek en swets dink ek dat ek nou die perfekte koekiekrummelkors gekry het. Nou gaan daai Suidooster vir jou ietsie wys wat jou hart vinniger gaan laat klop.

Nagereg - Man Kos Kluitjies

Man Kos Kluitjies

Menige man is baie lief vir so ietsie soets aan die einde van die ete. Ek persoonlik is nie baie lief vir warm nageregte nie maar hierdie een is die uitsondering. So ruk gelede het Dine van Zyl my gevra of ek nie 'n lekker maklike nagereg het wat op die vuur gemaak kan word nie en dit het my so bietjie laat sit en dink ... en toe kom ek met die een op.

Dis 'n baie eenvoudige resep en die bestandele is nie ingewikkeld nie.

Eenvoudige bestandele

Hierdie nagereg kan op die stoof of op die vuur gemaak word. Dis vinnig en baie lekker. Dit is
verseker ryk maar nie te soet nie.
Die resep lewer 6 tot 10 porsies, afhangende van hoe honger die mense is maar as jy dit in koppies opskep behoort jy maklik 10 koppies te kan vul.
Die is 'n regte Man Kos nagereg waarvan vrouens ook hou. Meer belangrik, dis baie maklik om te maak en die kluitjies is altyd lekker lig.

Karamel en water in die pot

Bestandele:
1x Blikkie Nestle Caramel Treat
1x Houertjie 500ml Vars Room
1x Blik 410gr ingelegde Appelkose (Jy kan Perskes ook gebruik)

Perskes en room bygevoeg

Nota: Die poeding is glad nie baie soet nie. As jy dit meer soet wil maak kan jy so 2 eetlepels goue
stroop in die sous sit. Lekker fynbos heuning is vir my 'n beter opsie. Ek stel voor jy maak dit een maal en proe self of dit soet genoeg is. Ek persoonlik verkies 'n nagereg wat nie te soet is nie. Ek hou maar die bottel heuning byderhand sodat die gaste self besluit hoeveel hulle wil by sit.






Sous:

Kluitjie deeg

Plaas die karamel in 'n ysterpot en dreineer al die stroop in die vrugte blik ook in die pot in. Gooi
nou een en 'n half maal van die karamel blikkie vol water by en verhit. Roer maar gereeld totdat
alles mooi opgelos is. Moenie omgee as dit lyk of die karamel skif nie.
Haal nou die pot van die hitte af en maak jou kluitjies aan.

Kluitjies ingeskep

Hierdie stap is belangrik want as jy die kluitjie deeg aanmaak moet dit vinnig gebeur anders gaan jy die veerligte tekstuur verloor as jy te lank wag voor jy dit in sous skep. Daarom kook ek die stroop en maak dan die deeg aan.


Kluitjies:
250 ml koekmeel – 1 Koppie
125 ml wit suiker - ½ Koppie
5 ml bakpoeier – 2 Teelepel
2 ml sout - ½ Teelepel
40 g margarien

Kook lekker vinnig

1x eier en genoeg koue water om saam 100 ml op te maak. Die is belangrik want dit gaan bepaal hoe hanteerbaar is jou rou kluitjie deeg.





Meng al die droë bestandele saam en vryf dan die margerien of botter in soos waneer jy skons bak.

Deksel toe

Gooi nou die room in jou SOUSPOT en laat dit goed en vinnig kook. Gooi nou die perske stukke ook in die sous en meng solank jou meel met die eier-water mengsel.

Meng nou die meel mengsel en eier-water ... moenie getempteer raak en meer water by sit nie. Jy soek 'n taai deeg. Jy moet nou vinnig werk want jou pot kan oorkook.

Lekker lig en romerig

Nou gebruik ek 'n grootlepel en skep sulke hompies deeg in daardie borrelende sous in. Werk vinnig en maak die deksel toe. Draai die hitte nou laag af en los die pot uit vir 30 minute. Moenie die deksel oplig nie want die stoom proses is baie nodig om jou kluitjies gaar te kry.

Na 30 minute sit jy die hitte heeltemal af en laat die pot net so staan vir nog 30 minute. Jy kan loer as jy wil maar dis beter om nie die deksel op te lig nie. Die kluitjies is veerlig en gaan nou staan en die sous ordentlik opslurp.

In die koppies

As jy jou kluitjies bietjie droër wil hê kan jy die halwe blikkie water uitlos wat jy in die begin ingooi, met ander woorde jy gooi net 1x blikkie water in die sous.

Jy kan kaneel of mixed spice ingooi as jy wil om so bietjie feestelikheid in die pot te sit.

Die nagereg is heerlik saam met geklopte room of roomys ... jy kan ook vla by bedien as jy wil ... ek doen dit nie want die poeding is souserig genoeg.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Skons - Annelien se Lepel Skons

As daar nou een debat onder ons Boerekos mense is wat seker nooit regtig tot 'n eengesinde uitkoms sal kom nie dan is die storie oor skons. Die meer geletterde VLU bakkers sal jou dadelik vertel dat as jy die deeg in muffin pan inskep is dit dadelik nie meer skons nie. Skons is ook bekend as botter broodjies maar ek is nie geskiedskrywer of navorser nie en ek gaan my nie op hierdie pad begewe nie.

Man Kos Skep Skons

Die groot ding is dat ons baie maklik na bondeltjies deeg verwys as skons waar dit in werklikehid eintlik maar net 'n muffin is. As jy dan weer na die regte skons goeters gaan kyk dan kom jy ook gou agter dat die meeste mense maak 'n ding wat die Amerikaners 'n biscuit noem en dan noem hulle dit 'n skon.

Dit nou daar gelaat ... Man Kos is daarop gefokus om kos te maak wat mans voor lief is en waarvan vrouens ook hou. My grootste doelwit is om kos te maak wat mans ook redelik maklik kan maak ... ek maak die goed waarvoor ek lief is en dan vertel ek my storie op so manier dat 'n man dit ook dalk interresant gaan vind en self die taak aanpak.

So rukkie gelede het Annelien Pienaar 'n resep op haar blog gesit vir wat sy noem Lepel Skons ... dis ook bekend as Skep Skons en dit word in muffin panne gebak.

Laat ek dit duidelik stel ... ek kan egte regte skons bak, my ma het my geleer en Ambeleen Fandamaly het my onlangs weer so bietjie leiding gegee maar dis 'n proses wat nie baie mans sal aanpak nie want jy het geduld nodig en as dit by die botter in die meel vrywery kom dan skud baie manne hulle koppe. Jy kan jou food processor gebruik maar dis gevaarlik want binne sekondes is die botter klonte te fyn en dan is dit nie meer skons nie.

Annelien se basiese resep is die regte resep vir mans om aan te pak. En onthou ek praat nou van mans wat nie bak nie. Hier volg my variasie op haar resep. Die regte Lepel Skons is hier op die skakel.

Die bestandele is eenvoudig en ek gaan dit so vereenvoudig as moontlik.

1 Pakkie Snowflake EasyMix Savoury Muffin Mix. (500gr) Dit is bruismeel ... 4 koppies.
2 Teelepels bakpoeier.
2 Eiers
1/4 koppie olie ... ek gebruik SPAR se Olive Cooking Oil
1/4 teelepel sout ... ek glo alles moet sout inkry.
(2 teelepels suiker as jy dit soet wil maak. )
3 koppies melk.
1 teelepel suurlemoensap of asyn.

Reg vir die oond

Kry nou vir jou twee mengbakke ... een lekker groot vir die meel en so middelslag kleintjie vir die melk en olie en eiers.

Sit jou oond aan op 200C en die oondrak op die onderste derde.




Gooi die meel, bakpoeier en sout in die groot bak en klits dit goed deurmekaar met 'n whisk. As jy nie 'n whisk het nie moet jy maar sif.

Lekker goudbruin

Gooi al die melk in die kleiner bak en gooi die suurlemoensap of asyn nou in die melk.
Wag so 5 minute en jy sal sien die melk begin klonte maak.
Breek nou die twee eiers in die melk in en gooi die olie ook by.
Nou moet jy hierdie mengsel regtig goed klits. Handmenger, staanmenger, whisk of outydse eierklitser ... net wat jy voor lus het of beskikbaar het .... ek gebruik 'n outydse eierklitser want dis makliker om skoon te maak.

Dis regtig belangrik dat jy nie die meel en melk bymekaar bring voordat jy nie reg is vir die oond nie. Die bakpoeier is die ding wat jou skepskons moet laat reis en die goed werk amper soos Enos. As dit vog kry begin dit aktiveer en jy wil dit vinnig in die oond kry om die beste rys uit dit uit te kry.

Man Kos Lepel Skons

Smeer nou die muffin panne ... die mengsel maak 18 normale grootte muffins.

Sodra jou oond gereed is kan jy die melk by die meel voeg en meng vinnig met 'n metaal lepel. Ek gebruik so groot desert lepel, hy is ook reg om die skons mee te skep. Dit is 'n baie slap deeg.

Skep nou in die panne in en kry dit in die oond. My oond is effe hitsig so ek bak vir 12 minute teen 200C en dan draai ek af na 180C toe vir nog so 6 minute. Hierdie tye word baie beiinvloed deur die weer en humiditeit. So hou maar 'n ogie op die oond.

En dit is so maklik as wat dit is.

Hierdie resep wat ek gegee het is wat jy kan noem 'n basiese resep en kan die basis vorm vir 'n swetterjoel variasies.

Ek het sulke klein mozarella balletjies by My spar gekoop, omtrent so groot soos duif eiers. Ek het en bo-op elke muffin gesit en die deeg ingedruk ... moenie deurdruk tot op die bodem van die pan nie want dan gaan die kaas smelt en onder in die pan sit.

Ek het ook a 3/4 koppie vark kaiings in die meel ingemeng en so bietjie kaiings bo-oor gestrooi voor dit oond toe is.

Jy kan enige snipperde varkvleis gebruik, fyn gekapte biltong, neute of droeë vrugte.

Jy kan enige kaas in blokies sny en gebruik in plaas van mozarella.

Gebruik die Blueberry Muffin Mix en maak dit a soet dingetjie ... gooi bessies in jou deeg en sit s skeppie konfyt in a holte bo-op die muffin.

Gooi speserye in die mengsel ... kaneel, gemmer, koriander ... net waarvoor jy lus is. Eksperimenteer en leer wat werk.

Raak romanties ... gebruik skoon bruismeel en sit suiker in, vervan die melk met Appelkoos Yoghurt en los die suurlemoen uit.
Gooi chocolate chips in jou deeg en druk so paar chips bo in nadat dit in die pan geskep is. Klits vars room en vou 'n lekker likeur in die room in. Bedien dit saam.

Raak gevaarlik ... maak die soet deeg met die yoghurt maar snipper vars rissies fyn en meng in die deeg in ... druk repies groenvy in die deeg in in die pan. Hierdie een gaan jou verlei met soetigheid en so nou en dan gaan hy sê ... HOESIT !

Hierdie goedjies is so aanpasbaar dat jy omtrent enige ding met dit kan maak ... jy kan dit vir a voorgereg maak of a nagereg ... teetyd of sommer peuseltyd. Jy kan dit saam met 'n lekker stew of kerrie bedien en die koekies vervang die gewone rys of aartappels.

Die belangrikste ding is dat dit maklik is om te maak.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Lekkernye - Nina se Florentines

Dis my mening dat menige man diep onder sy vel 'n belustiging vir 'n soetigheidjie het, party meer as ander. Ek hou van soetgoed maar in baie klein porsies.

Nina se Florentines

So kom dit dan dat Nina Timm so dag of wat terug op die skerm verskyn met 'n dingetjie wat sy 'n Florentine noem ... ek het nog nooit van dit gehoor nie en ek lees haar storie aandagtig deur.

Wat waar is, is dat hierdie koekie omtrent net bestaan uit dinge wat vir my lekker is ... soos Kellog's Corn Flakes ... ai man die goed is soos drugs vir my en ek koop dit byna nooit nie want as dit in die huis is moet dit in my keel af. Enige tyd van die dag of nag, 'n goeie handvol in 'n bakkie, yskoue volroom melk oor en twee lepels suiker. En dan word dit vinnig gehap want ek is mal oor die kraak van die vlokkies ... pap Cornflakes is soos 'n koue garage pastei ... gaggas op sy beste.

Nog iets is gevlokte Amandels ... iets wat ek sommer so handvol oor 'n bakkie Griekse Yoghurt strooi, met heuning bedruip en dan sit en smul.

Rooi glanskersies ... ag nee man ... ek eet die goedjies soos popcorn.

In die pan

Rosyntjies ... iets uit my kinderdae ... die dae toe dit al beter met my ouers gegaan het hulle sulke groepe gevorm het wat droeë vrugte van die Kaap af bestel het. As die bokse dan daar aanland was dit 'n groot saamtrek en gekuier terwyl die inhoud sorgvuldig tussen elke aandeelhouer verdeel word. Onthou die was in die tye toe daar nog 'n brief geskryf is, en 'n posorder in die brief toegevou is vir die produkte, en dan was dit die lang wag vir die stasie om te bel en te sê die pakkie het aangekom.

Heerlik

Goeie tye daai ... so is daar ook wyn gekoop uit die Kaap uit.

En dan ... kondensmelk ... dis iets wat vir menige mense 'n baie spesiale betekenis het. Dis 'n lekkerte wat omtrent elke kind se verbeelding aangryp en al gelei het tot menige lang sessies in die toilet na so oomblik van onbesonnenheid. Ek myself was een van die ... teveel kondensmelk met custard poeier en Jersey room ... en ja ... die gevolg was angswekkend.

Nouja, meng al die goed saam en kroon dit met donker sjokolade en dis 'n stukkie lekkerte wat my tot in my tone laat ril.

Ok hier is die Nina se Resep ... volg die skakel om haar hele storie te lees.

Nina se Florentines

Makes 24
Ingredients
5 x 250 ml Kellogg’s Cornflakes
150 g Safari flaked almonds
250 g Moirs Glaze Cherries
250 g Safari Seedless Raisins
250 g dark chocolate chips
1 x 397 g tin condensed Milk
Method
Preheat oven to 180 C. Place all cornflakes, nuts, cherries and raisins in a big bowl and add the condensed milk. Stir through and make sure that everything has a light coating of condensed milk.  To make the Florentines is a bit messy, but here is my easy way. Spray two baking sheets with Spray ‘n Cook and get hold of a cookie cutter or food stacking ring( 7 cm in diameter) as well as a small glass with a bottom that fits in the ring or cookie cutter. Oil the cookie cutter or stacking ring on the inside as well as the bottom of the glass. Place the stacking ring on the baking sheet and spoon a big spoonful of the mixture in the ring and flatten with the oiled bottom of the glass, pushing it through the ring onto the baking sheet. Repeat until you have used up all of the mixture. Bake for 10-15 minutes or until cookies have turned a light caramel color. Remove from the baking sheet and cool on a wire rack. Melt the chocolate in a bowl over boiling water and spread on the bottoms of the Florentines.  When completely cooled down, pack in a beautiful tin and tie a bow around it……

Ek het haar resep mooi gevolg en presies gemaak soos sy sê.

Eerste het al die droeë goed bymekaar gegooi in 'n lekker groot bak en dit goed gemeng. Volgende het ek die kersie versnipper en met versiersuiker besprinkel en rondgerol, dit help dat mens nie so klont kersies in jou mengsel kry nie.

Laaste het ek die kondensmelk ingegooi en baie goed gemeng met 'n staal lepel.

Toe kom die koekie makery. Ek weet nie hoe jy dit gaan doen sonder a opdien ringetjie nie.

En toe is dit oond toe ... soos ek al geleer het, my oond is aan die hitsige kant en op 12 minute het ek die oond afgesit en die koekies vir 5 minute in die oond gelos. Ek glo dis belangrik sodat die kondensmelk ordentlik kan taai word.

Die geur van gebakte neute en die Corn Flakes het deur my kombuis gedwarrel en ek staan met a groot smile op my bakkies terwyl ek die koekies versigtig oorplaas na die drad rakkies toe. Werk maar mooi ... hulle kan nou nog maklik uitmekaar breek.

Twee ure later en dis ek en die sjokolade. Hierdie keer het ek natuurlike impulse beteul en die glasbak in 10 sekonde sarsies in die mikrogolf oond gesit. Na so paar sessies toe sit ek met lekker gesmelte bruin bodybuilders in die bak.

Die goedjies is verruklik en ek glo mans sal dol wees daaroor want daar is oorgenoeg crunch.


Kook lekker tot ek weer 'n storie skryf.


Hier is my Facebook Bladsy ... Man Kos ... like hom as jy wil.

Snaxie - Jellie rolletjies

Jellie rolletjies

Hierdie is nou verseker nie regte Man Kos nie maar dis iets wat die manne maklik vir die kinders kan maak.



Dis maklik en vinnig maar dit lyk sommer lekker en is pret.


Jy benodig ...

Min bestandele

1x Pakkie Jellie
1/2 koppie water
9 groot Marshmellows
200mm x 200mm glasbak.









Dis belangrik dat die bak die regte grootte is want anders is die lagies te dik of te dun.

Spuit die glasbak liggies met jou koekie sproei en vee die bak dan mooi uit met kombuispapier. Jy soek 'n baie dun lagie sproei in die bak.

Jellie is opgelos

Eerste stap ... gooi die jellie en 'n 1/2 koppie water in a mengbak en klits goed.

Sit nou in die mikrogolf oond vir 60 sekondes en klits weer. Maak seker al die jellie is goed opgelos.

Voeg marshmellows by jellie

Snipper nou die 9 groot marshmellows op. Jy kan die kleintjies gebruik as jy dit kan kry. Jy soek 1 koppie marshmellows.

Gooi dit by die jellie en roer.

Marshmellows is opgelos

Sit die bak nou vir 30 sekondes in die mikrogolf oond. Die marshmellow behoort nou gepof te wees. Roer goed sodat alles mooi kan oplos. As jou marshmellows nie heeltemal oplos nie, sit vir nog 10 sekondes in die mikrogolf.

Reg vir die yskas

Gooi die mengsel nou in jou gesmeerde glasbak en sit in die yskas. Die twee bestandele sal skei tydens die stol proses. So uur of wat. Moenie te haastig wees nie.

Sny los en begin rol

Haal die gestolde bak uit die yskas en sny die kante versigtig los met a skerp messie.

Maak een kant versigtig los en en begin die rolletjie.

Onthou om versigtig te wees, die marshmellow klou dadelik vas as dit aanmekaar raak.

Reg om gesny te word

Rol nou mooi styf op en haal die rol versigtig uit die bak uit en plaas op jou snyplank.
Ek het myne met dental floss gesny. Jy kan garing of vislyn gebruik. Ek trek die toutjie onder die rol in, en sny so 20mm dik skywe. Met die lyn onder die rol, bring die twee punte op en gaan oorkruis. Trek nou styf. Die lus sal deur die rolletjie sny.

Jellie en marshmallow rolletjie

En daar het jy dit ... pragtige, prettige jellie en marshmallow rolletjies.

Jy kan die rolletjies in jou koekstruif gebruik vir bietjie styl.

Kook lekker tot ek weer 'n storie skryf.






Hier is my Facebook bladsy ... Man Kos ... Like hom as jy wil.